பயாஸ்கோப் பேசிய பாலிடிக்ஸ் – 20

This entry is part of 32 in the series 20070607_Issue

சாய் (என்கிற) பேப்பர்பாய்



திண்ணை.காம்’ இணைய இதழில் ‘நகைச்சுவையும் வித்தியாசமானவையும்’ பகுதியில் பிரசுரிக்க

பயாஸ்கோப் பேசிய பாலிடிக்ஸ் – 20

சாய் (என்கிற) பேப்பர்பாய்

டேக் 20
‘சைடு ரீல்கள்’ !

சுமார் முப்பது வருடங்களுக்கு முன்பெல்லாம், ‘ விரைவில் வருகிறாள் ரிவால்வர் ரீட்டா ‘ ; ‘ உங்கள் அபிமான திரையரங்கில் எதிர் பாருங்கள் மாய மோதிரம்’ என்றெல்லாம் சினிமா கொட்டகைகளில் டிரெய்லர் காண்பிப்பார்கள். மெயின் பிக்சருக்கு இடையில் இண்டர்வெலில் கலர் சோடா, பட்டாணிச் சுண்டல்களுக்கு போட்டியாக இந்த சைடு ரீல்களும் சுவாரஸ்யமாகவே இருக்கும்.

திராவிட இயக்கமோ அல்லது தேசிய இயக்கமோ, எதாவது ஒரு இயக்கத்தை திரையில் தங்களின் ‘விசிட்டிங் கார்டு’ ஆக காண்பித்துக் கொள்வது கல்லா பெட்டிக்கு safety என்கிற கெட்டிக்காரக் கணக்கோ அல்லது இயல்பான அபிமானமோ எதுவோ பாலிடிக்ஸ் ஊறிப் போயிருந்த தமிழ் பயாஸ்கோப்பில், இதுவரை நாம் பார்த்த மெயின் கலைஞர்களுக்கு இடையில் கட்சி காலட்சேபம் நடத்திய மற்ற சிலரும் உண்டு. சுவாரஸ்யமான சில சைடுரீல்களை பற்றி கொஞ்சம் பார்ப்போம்:

ரவிச்சந்திரன்

தமிழ் சினிமாவில் ஜேம்ஸ்பாண்டு பாணி ‘டுமீல் டுமீல்’ படங்களும் – அரசியலில் திமுகவும் இளைஞர்களை காந்தமென ஈர்த்திருந்த 1960களின் மத்தியில் அறிமுகமான நடிகர்கள் ரவிச்சந்திரன், ஜெய்சங்கர் ஆகியோரை இந்த வரிசையில் முக்கியமாக குறிப்பிட வேண்டும். எம்ஜிஆர்- சிவாஜிக்கு அடுத்த தலைமுறை இளம் இரட்டையர்களான இவர்களில் திமுக கலரை வெளிப்படையாகக் காண்பித்துக் கொண்ட ரவிச்சந்திரன், முதலில்:

1964ல் ‘காதலிக்க நேரமில்லை’ படத்தின் மூலம் அறிமுகமானவர் ரவிச்சந்திரன். வசீகர முகம். சண்டைக்காட்சிகளில் சுறுசுறுப்பு. நடனக் காட்சிகளில் துடிப்பு. ரவிக்கு ‘சின்ன வாத்தியார்’ என்ற பட்டப் பெயர் ஒட்டிக் கொண்டது (பெரிய வாத்தியார் ? = வேறு யார் ! எம்ஜிஆர் தான்) . கிடைத்தப் பட்டப் பெயருக்கு ஏற்றார்போல் ரவியும் தன்னை திமுக அபிமானியாக காண்பித்துக் கொண்டார். 1967ம் ஆண்டு சட்டமன்றப் பொதுத் தேர்தலின் போது ரவி, திமுகவுக்காக ஒரு சில ஊர்களில் நேரடியாக பிரச்சாரமும் செய்தார். சந்தர்ப்பம் கிடைத்த போது சில படங்களில் ‘அண்ணா பக்தி’ப் பாடல்களையும் பாடினார், ‘பெரிய வாத்தியார்’ பாணியில்.
” நமது அரசு ; நமது நாடு;
நமது வாழ்வு என்பதெது ?
நமது தலைவன்; நல்ல அறிஞன்
ஏற்றுக் கொண்ட பதவியது.
அன்னைத் தமிழின் அருந்தவப் பிள்ளை
அண்ணன் போலே பிறந்தவரில்லை
அடங்கி நடப்போம் அவனது சொல்லை.
மதியும் நிதியும் பொருந்திய மேதை
மன்னன் செல்வது தருமத்தின் பாதை
காண்பதெல்லாம் புதுமை
என்றும் வேண்டும் அவனது தலைமை;
கடலின் அலைகள் அவன் புகழ் பாடும்
காற்றும் வந்தே மாலைகள் போடும்…”

– இது, 1967ல் திமுக ஆட்சிப் பொறுப்பேற்று அறிஞர் அண்ணா முதலமைச்சரான சூட்டோடு சூடாக 1968ல் வெளியான ‘பணக்காரப் பிள்ளை’ படத்தில் டி.எம்.சவுந்திரராஜனின் குரலுக்கு ரவி வாயசைத்தப் பாடல். அண்ணா, முதலமைச்சராக பதவியேற்கும் காட்சிகளெல்லாம் இடையில் படத் துணுக்குகளாகக் காண்பிக்கப்பட்டு தியேட்டர்களில் கரை வேட்டிகளின் கைத்தட்டலை சம்பாதித்தப் பாடலும் கூட.
…………………………………………..

அண்ணா முதலமைச்சரான சந்தோஷத்தை அதே ஆண்டு – 1968ல் வெளியான ‘ நாலும் தெரிந்தவன்’ படத்தில் ” நரி ஒன்று சிரிக்கின்றது…” எனத் தொடங்கும் பாடலிலும் பூடகமாக குறிப்பிட்டும் பகிர்ந்துக் கொண்டார் ரவி. அந்த வரிகள் :

” நாலும் தெரிந்தவன் அரங்கத்தில் வந்தால்
நாடே திரண்டு வரும்….”

——————————–

அதே படத்தில், ஒரு காட்சியில் நடிகர் மனோகர் கதாபாத்திரமும் கதாநாயகன் ரவிச்சந்திரனும் பேசும் ஒரு டயலாக்:
மனோகர் : ” அரசியலில் ஆர்வம் அதிகமுண்டோ?”
ரவி : ” அப்படியில்லை. அறிஞரின் கருத்துகளை ஆர்வத்துடன் படிப்பதுண்டு.”
————————————-
இதுவும் ‘நாலும் தெரிந்தவன்’ படம் தான். ” எங்க மாமா செல்ல மாமா…” என்ற தொடக்கத்துடன் பாடலொன்று வரும். அதில்,
” பொறுமையிலே காந்தியைப் போலே
கடமையிலே நேருவைப் போலே
பண்பினிலே அண்ணாவைப் போலே…”

– என்று குழந்தைகளுக்கு அட்வைஸ் செய்வதைப் போல ரவி பாட, திரையில் குளோசப்புக்கு வரும் அறிஞர்அண்ணாவின் போட்டோ.
———————————–
ரவிச்சந்திரன் கதாநாயகனாக நடித்து 1968ல் வெளியாகி சக்கைப் போடு போட்ட படத்தின் பெயரே ‘மூன்றெழுத்து’. ( இப்படத்தின் மையக் கருவே ஒரு புதையல் இருக்குமிடத்துக்கான வரைபடத்தின் ரகசிய குறியீடாக மூன்று எழுத்துகளைத் கதாபாத்திரங்கள் தேடுவது தான். அந்த மூன்றெழுத்துகளோ ‘தி..மு..க..’. ஆனால் படத்தில் அது ‘திமுக’ அல்ல; ‘கமுதி’ என்கிற ஊர் பெயராக சொல்லப்படுவது வேறு விஷயம்.)

திமுகவுக்காக அந்நேரம் எம்ஜிஆர், பொன் வைத்துக் கொண்டிருந்த வேளையில் தன் பங்கிற்கு பூவையாவது வைத்து திருப்திப்பட்டுக் கொண்டார் ‘சின்ன வாத்தியார்’. அத்தோடு சரி. பூவைப் போலவே பயாஸ்கோப்பில் ரவியின் பாலிடிக்ஸ்சும் தற்காலிகமானதாகவே ஆகிப் போனது.

*************************************

ஜெய்சங்கர்

ரவிச்சந்திரனுக்கு ஓராண்டு ஜூனியர் ஜெய்சங்கர். 1965ல் ‘இரவும் பகலும்’ மூலம் அறிமுகமானார். வந்த வேகத்திலேயே ரவிக்கு நேரடித் தொழில் போட்டியாளரானார் ‘ தென்னகத்து ஜேம்ஸ்பாண்டு’. ஆனால் அரசியல் விஷயத்தில் முன்னவர் போல கலரை பட்டவர்த்தனமாக காண்பித்துக் கொள்ளவில்லை இவர். அதேசமயம், திராவிட இயக்க அபிமானமுள்ள இயக்குனர் அல்லது தயாரிப்பாளர்களின் கைக்கருவியாக திரையில் இருக்கவும் தயங்கியதில்லை ஜெய்.

1967ல் சட்டசபைத் தேர்தலில் திமுக வென்று அண்ணா முதலமைச்சராவதற்கு முன் அதே ஆண்டு வெளியான ‘சபாஷ் தம்பி’ என்ற படத்தில் ஒரு பாடலில் ஜெய்சங்கருக்கு திமுக கலர் பட்டையாகப் பூசப்பட்டது. ஜெய் உருவில் டி.எம்.எஸ். குரலில் அறிஞர் அண்ணா, தனது கட்சித் தொண்டர்களுக்கு ஊக்கமூட்டி தேர்தலுக்கு அவர்களைத் ஆயத்தப்படுத்துவதாக அர்த்தம் கொள்ளத்தக்க கணீர் பாடல் அது. அண்ணா அன்புடன் எழுத்திலும் சொற்பொழிவிலும் தனது கட்சியினரை பாராட்டும் ‘சபாஷ் தம்பி..’ என்ற விளித்தலுடன், சும்மா கணீரென Echo Effectல் ஆரம்பமாகும் பாடல் :
” சபாஷ் தம்பி..சபாஷ் தம்பி
உன் செய்கையைப் போற்றுகிறேன் – நீ
ஒருவன் மட்டும் துணையாயிருந்தால்
உலகை மாற்றுகிறேன்.
தேறுதல் சொல்லத் தேவையில்லை- உனக்கு
ஆறுதல் சொல்லத் தேவையில்லை.- நல்ல
மாறுதல் வேண்டி நீ செய்யும்
சேவையைப் போலொரு சேவையில்லை.
காலம் வந்தது பொறு தம்பி – நீ
கவலைப் படாமல் இரு தம்பி.
காத்திருந்தாலென்ன தம்பி – உன்னை
காப்பாற்றிடுவேன் தம்பி.
கொடியவர் தம்மை எதிர்க்கையிலே
குறுக்கே வரலாம் பெரும் புயலே
வருவது வரட்டும் தம்பி – நான்
வந்து காட்டுறேன் பார் தம்பி ”

– தனக்கு உதவப் போய் வில்லனிடம் சிக்கிக் கொண்ட சிறுவனை காப்பாற்ற போகும் வழியில் கதாநாயகன் பாடுவதாக மேலெழுந்தவாரியாக சாதாரணமாகத் தெரிந்தாலும் இப்பாடல் உள்ளுக்குள் எத்தனை சங்கதிகளை பொத்தி வைத்துள்ளது பாருங்கள்..! சினிமாவை திராவிட இயக்கம் கையாண்ட லாவகம் இருக்கிறதே, அது சாமானியப்பட்டதில்லை. உலகளவில் அரசியல் இயக்கங்கள் ஆராய்ச்சி செய்து பார்க்க வேண்டிய ஆச்சரியமே!!
——————————-

பொதுவாக, எம்ஜிஆருக்கும் ஜெய்சங்கருக்கும் அவ்வளவாக சுமூக உறவு இருந்ததில்லை என்ற ஒரு பேச்சு கோலிவுட்டில் உலாவியதுண்டு. அதன் நம்பகத்தன்மை பற்றிய அகழ்வாய்வு இப்போது தேவையில்லை. ஆனால், அவ்வாறு சொல்லப்பட்ட ஜெய்சங்கரோ, 1967 சட்டசபைத் தேர்தலுக்கு முன் அண்ணாவுக்காக குரல் கொடுத்த வேலையை , பத்தாண்டுகள் கழித்து 77 தேர்தலுக்கு முன் எம்ஜிஆருக்காக செய்தார் என்பது கவனிக்கத்தக்கது.

எம்ஜிஆர் முதலமைச்சராக வர வேண்டுமென வெளிப்படையாகவே விருப்பம் தெரிவிக்கும் பாடல் ஒன்றுக்கு உற்சாகத்துடன் வாயசைத்தார் படத்தின் கதாநாயகன் ஜெய்.

” ஜானகியின் நாயகனே ராமச்சந்திரா..
நீ நாடாள வரவேண்டும் ராமச்சந்திரா
தருமம் ஜெயிக்குமென சொன்னவனே ராமச்சந்திரா.
ஒரு தவறும் புரியாமல்
பதவி விட்டு சென்றாய் – பொருந்தாத
பரதர்களிடம் கொடுத்துச் சென்றாய்.
சூரிய வம்சத்தில் வந்தவன் நீயே
வாரி வாரி தந்தவனும் நீயே.
சத்தியத் தாய் பெற்றெடுத்த பிள்ளையல்லவா – நீ
சத்தியத்தின் வழி நிற்பவன் அல்லவா.
மாதம் மும்மாரி பொழிய வேண்டும் ராமச்சந்திரா – அதற்கு
நீ வரவேண்டும்- வழி செய்ய வேண்டும் ராமச்சந்திரா ”

– தேர்தலில் ஜெயித்து எம்ஜிஆர் முதன்முறையாக ஆட்சியை பிடிப்பதற்கு முந்தைய ஆண்டு அதாவது 1976ல் வெளியான ‘ பணக்காரப் பெண்’ என்ற படத்தில் இடம் பெற்றது தான் மேற்படி பாடல். 1977 சட்டசபைத் தேர்தல் சமயத்தில் அதிமுக தேர்தல் பிரச்சாரப் பொதுக்கூட்டங்களில் ஒலிபரப்புமளவுக்கு ‘அரசியல் பிராண்டு’ பெற்றிருந்தது இப்பாடல்.
————————————-

அதே படம் தான். கதாநாயகன் ஜெய்சங்கருக்கும், அவரது தாயார் கதாபாத்திரத்துக்கும் இடையே நடக்கும் உரையாடல் காட்சி:
ஜெய் : ” பொது கணக்குன்னா கேள்வி கேக்க தான் செய்வாங்க.”
தாயார் : ” கேக்கரது சுலபம்டா. நிர்வாகம் பண்ணினா தான் அதோட கஷ்ட நஷ்டம் தெரியும் ”
ஜெய்: ” பார்த்துகிட்டே இரு. நாங்க நிர்வாகம் செய்யற காலம் வரத்தான் போகுது ”

————————–

பின்னர் இதே ஜெய்சங்கர் தான், எம்ஜிஆர் ஆட்சிக்கு வந்ததும் அவரை கடுமையாக எதிர்த்த கலைஞர் மு.கருணாநிதியின் கைக்கருவியாகவும் ஆனார். 1972ல் மகன் முத்துவை களமிறக்கி வெற்றி காணாத மு.க., 1977க்கு பிறகு எம்ஜிஆருக்கு எதிராக கொம்பு சீவி இறக்கி விட்டது ஜெய்சங்கரையே.

மு.க.வின் கைவண்ணத்தில் உருவான ‘வண்டிக்காரன் மகன்’ (கதை மட்டும் அறிஞர் அண்ணா) மற்றும் ‘ஆடுபாம்பே’ ஆகிய படங்களை இதற்கு சரியான உதாரணங்களாக சொல்லலாம். வசனங்களும், பாடல்களும் நெருப்பை கக்கின. சாம்பிளுக்கு பாடல்களை பார்ப்போம்:

” உழைக்கும் இனமே; உடன்பிறப்பே
என்னோடு வாருங்களேன்
பசுவின் உருவில் ஊரில் உலவும்
புலியை காட்டுறேன், பாருங்களேன்.
மனிதரில் சிலபேர் புனிதரைப் போலே
இருப்பார் புவி மேலே;
மான்களின் கண்களை மயங்கிட வைக்கும்
கானல் நீர் போலே.
ஏட்டைப் புரட்டி சுயநலக்காரனை
கேட்பேன், நானொரு கேள்வி – அவன்
பூட்டை திறந்து காட்டுவதற்கு
என்னிடம் உள்ளது சாவி!
ஏய்ப்பவன் தன்னை மேய்ப்பவன் என்று
எண்ணியிருக்கும் ஆடு- நல்ல
ஆறறிவுள்ள மனிதரும்
அது போலிருந்தால் சிரிக்கும் நாடு.
மின்மினிப்பூச்சி வெளிச்சத்தினாலே
இருட்டில் பாதை தெரியாது.
மின்னுவதாலே உப்புக்கல் தான்
வைரம் போலாகாது.
சிங்கக் கூட்டம் தூங்கியிருந்தால்
சிறுநரி ஆட்டும் வாலை
அதன் தூக்கம் கலைந்தால், நடப்பது என்ன?
சரித்திரம் சொல்லும் நாளை ! ”

– ( ‘ வண்டிக்காரன் மகன் ‘ – 1978 )

———————————————

” ஒரு தவறும் செஞ்சறியா உத்தமரை மத்தவரை
கொத்திப் பழி வாங்க வந்த குட்டிப் பாம்பே – உன்
கொட்டத்தை நான் அடக்கப் போறேன்
முகமூடியை நான் கிழிக்கப் போறேன் கெட்டப் பாம்பே !
பாம்பே… நீ ஆடு பாம்பே;
ஆடும் வரை ஆடு பாம்பே.
பல வேஷம் போட்டு வந்த குட்டிப் பாம்பே !
அதிகாரம் கொண்ட பாம்பே
அகங்காரம் நிறைஞ்ச பாம்பே
கீழிறங்கி வா..வா..கெட்டப் பாம்பே.
கூழுக்கும் வேலையின்றி
குடிலுக்கும் ஓலையின்றி
ஏழைங்க துடிக்கையிலே
பாலுண்டு நீ இன்று – பழமென்று உண்டு
பத்திரமாய் நடிக்கிறியே !
பீடத்தில் ஏறிக் கொண்டு
பிடிவாதம் பண்ணிக் கொண்டு
ஆட்டங்கள் போடாதே.
வேஷமும் கலையுற நேரம் நெருங்குது
வேதனைத் தீயில் விலங்குகள் நொறுங்குது
நாசமும் மோசமும் நாளைக்கு முடியுது நச்சுப் பாம்பே…”

– ‘ஆடுபாம்பே’ (1979).

————————————————
ஜெய், இப்படி ‘வாய்ஸ்’ கொடுத்தது கூட கொஞ்ச காலம் தான். பூசப்பட்ட அரசியல் கலரையும் சீக்கிரமே கழுவி துடைத்து விட்டு ஒரு கட்டத்தில் சில படங்களில் வில்லனாகவும் அதைத் தொடர்ந்து குணச்சித்திர வேடங்களிலும் நடித்து சில ஆண்டுகளுக்கு முன் காலமானார் ‘ மக்கள் கலைஞர் ‘ .

************************************

சோ

சிறந்த நகைச்சுவை நடிகராக மட்டுமின்றி பிரபல பத்திரிகையாளராகவும் அரசியல் விமர்சகராகவும் தமிழ் மக்களுக்கு நன்கு பரிச்சயமானவர் ‘சோ’ ராமசாமி. சினிமாவில் அவர் வாயைத் திறந்தாலே அரசியல் நையாண்டிகளாக சகட்டுமேனிக்கு வந்து விழுந்தன. அடிப்படையில் காமராஜர் அபிமானியாக அறியப்பட்ட சோ, சினிமாவில் திராவிடக் கட்சிகளையும், இந்திராகாந்தி இருக்கும் வரை அவரையும் விமர்சித்தார் தனக்கே உரிய பாணியில்.

தமிழ் டாக்கியில் முழுக்க முழுக்க அரசியல் நையாண்டியுடன் வெளியான முதலாவது முழு நீளத் திரைப்படம் ‘முகமது பின் துக்ளக்’ தான். சோவின் கதை, வசனம், இயக்கம், நடிப்பில் உருவான படம். 1971ல் ரிலீஸாகி பெரும் பரபரப்பை உண்டாக்கிய படம். மேலோட்டமாக அனைத்துக் கட்சியினரையும் கிண்டலடிப்பதாக தென்பட்டாலும், அப்போதைய பிரதமர் இந்திராகாந்தியையும், முதலமைச்சர் மு.க.,வையும் குறி வைத்து எடுக்கப்பட்டதாக அர்த்தம் கொள்ளப்பட்டு கழகக் கண்மணிகளுக்கும், இண்டிகேட்டார்களுக்கும் ரத்தக் கொதிப்பை எகிற விட்ட படம். மாநில சுயாட்சி, தேசிய மொழி, ரூபாய்க்கு மூன்று படி அரிசி போன்ற அம்சங்களை கடுமையாகக் கிண்டலடித்தும் கிளி ஜோசியக்காரியாக இருந்து துணைப் பிரதமராகி தில்லுமுல்லு செய்யும் மனோரமா கதாபாத்திரத்தை பாப் ஹேர்ஸ்டைல் தலையும் ‘காந்திமதி’ என்ற பெயருமாக காண்பித்து கலக்கியிருப்பார் சோ.

சிவாஜி கதாநாயகனாக நடித்து 1974ல் வெளியான ‘தங்கப்பதக்கம்’ படத்தில் கரகரத்த குரல்; தெருவைப் பெருக்கும் தோள் துண்டு; சுத்தி நான்கைந்து கைத்தடிகள் சகிதம் ‘மாவட்டம்’ ஆக தி.இ. கெட்டப்பில் வந்து “ஒரு ரூபாய்க்கு 3 கிளிகள்” தருவதாக லூட்டி அடிக்கும் சோ…மறக்க முடியாதவர்.

திரையில் சோ, ஏவியிருக்கும் அரசியல் நையாண்டி அஸ்திரங்களை பட்டியலிட்ட புறப்பட்டால் அது சிந்துபாத் கதை கணக்காய் நீண்டு போகும்.

**********************************

கே.எஸ்.கோபாலகிருஷ்ணன்

தமிழ் சினிமாவில் முக்கிய வசனகர்த்தா – கம்- இயக்குநர்கள் வரிசையில் ஒருவர் கே.எஸ்.கோபாலகிருஷ்ணன். கதர் கட்சி அபிமானி. சிவாஜி குரூப் என்று அறியப்பட்டவர். எம்ஜிஆரை வைத்து ஒரு படம் கூட எடுக்காதவர். திராவிட இயக்கத்தின் மீது தனக்கிருந்த கோபத்தை தனது படங்கள் சிலவற்றில் பதிவு செய்துள்ளார் இந்த ‘இயக்குநர் திலகம்’.

1972ல் அப்போதைய திமுக ஆட்சியில் மதுபானக் கடைகள் திறக்கப்பட்டதை விமர்சித்து, தனது கதை வசனம் இயக்கத்தில் வெளி வந்த ‘குறத்திமகன்’ (1972) படத்தில் ஒரு பாடலில் குத்தி காட்டியிருப்பார் கே.எஸ்.ஜி. ” சேத்துப்பட்டு நாத்துப்பட்டு…” எனத் தொடங்கும் அப்பாடலில்,
” முன்னாடி இருந்தவங்க மூடியிருந்தாங்க;
பின்னாடி வந்தவங்க தொறந்துபுட்டாங்க;
அப்புறம் எப்படி முன்னேற்றமுங்க? ”

———————————-

இதை விட, 1973ல் வெளியான , நத்தையில் முத்து’ படத்தில் ஒரு பாடலில் ‘அட்டாக்’ சற்று கூர்மையாகவே இருந்தது. கதாநாயகனும் நாயகியும் குழுவினரோடு ராட்டையில் நூல் நூற்றுக் கொண்டே பாடுவதாக அமைந்த
அப்பாடல்:
” ஆடு ராட்டே.. நீ ஆடு ராட்டே !
சிந்திக்க தெரியாத மனிதரெல்லாம் – நாட்டை
சீர்திருத்த வந்தாரென ஆடு ராட்டே.
சந்திக்கு சந்தி நின்று பேசுவோரால் – தேசம்
சந்தி சிரித்து நிற்குதென ஆடு ராட்டே.
பூப்பந்தல் போலிருந்த வாழ்க்கை நலத்தை – சிலரது
வாய்ப் பந்தல் சாய்த்ததென ஆடு ராட்டே.
தாய் பிள்ளை போலிருந்தோரை – கட்சி
நோய் வந்து கலைத்ததென்று ஆடு ராட்டே.
மாறுதல் வேண்டுமென மக்கள் நினைத்தால்- அதற்கு
தேர்தல் உண்டென்று ஆடு ராட்டே.
தேர்தல் புரியாமல் தேர்ந்தெடுத்தால் – இனி
தேறுதல் இல்லையென ஆடு ராட்டே.
ஆறுதல் இல்லையென ஆடு ராட்டே ! ”

********************************

விஜயகுமார்

இப்போது படங்களில் கஞ்சி விறைப்பில் முழங்கையை தாண்டிய சட்டையும் வேட்டியுமாக ஊர் பெரிய மனுஷன், நாட்டாமை வேடங்களுக்கு ஏக குத்தகைக்காரராக வரும் நடிகர் விஜயகுமாரும் ஒரு காலத்தில் பயாஸ்கோப்பில் பாலிடிக்ஸை லேசாக தொட்டுப் பார்த்து கையை இழுத்துக் கொண்டவர் தான். 1973ல் பொண்ணுக்கு தங்க மனசு’ படத்தின் மூலம் அறிமுகமான விஜயகுமார், பல படங்களில் கதாநாயகனாக நடித்தார். அதிமுக கொடியை தனது கையில் பச்சைக் குத்திக் கொள்ளுமளவுக்கு அக்கட்சியின் தீவிர அபிமானியாக அடையாளம் காண்பித்துக் கொண்டவர். 1978ல் வெளியான, ‘மாங்குடி மைனர்’ படத்தில் கழுத்தில் எம்ஜிஆர் படம் பொறித்த டாலர், கையில் அதிமுக கொடியுடன் அறிஞர் அண்ணா சிலையைப் பார்த்து,
” அண்ணா – நீங்க நினைச்சபடி நடந்திருக்கு
புரட்சித் தலைவர் கையில் நாடிருக்கு ” – என்று பாடியவர் இந்த விஜயகுமார்.

*********************************

விஜயகாந்த்

1979ம் ஆண்டு ‘இனிக்கும் இளமை’ என்ற படத்தில் மிகச் சிறிய ரோலில் அறிமுகமானவர் விஜயகாந்த். ஆரம்பத்தில் சில படங்களில் சிவந்த கண்களும் சிவப்பு சட்டையுமாக ” எரிமலை எப்படி பொறுக்கும் ; நம் நெருப்புக்கு இன்னுமா உறக்கம் ?” ( ‘சிவப்பு மல்லி’ – 1981) என்று கேட்டு கம்யூனிசம் பேசினார். ‘சாதிக்கொரு நீதி’, அலைஓசை’ போன்ற படங்களில் கறுப்புச் சட்டைக்காரராக பேசினார். எம்ஜிஆர் ரசிகராகவும் அதே சமயம் கலைஞர் கருணாநிதியின் தீவிர அபிமானியாகவும் ஒரு காலகட்டம் வரை தன்னை வெளிப்படுத்தி வந்தார் ‘ புரட்சிக் கலைஞர் ‘.

சினிமாவில் எம்ஜிஆர் பாணியில் அதே போன்ற Target Audience’ உருவாக்கி கொண்டார். கடந்த 2006ல் துணிந்து ‘தேசிய முற்போக்கு திராவிடக் கழகம்’ என்ற தனிக்கட்சியை துவக்கி அதே வேகத்தில் சட்டமன்ற பொதுத் தேர்தலையும் சந்தித்தார் ‘கேப்டன்’. தேர்தலில் ஏறக்குறைய 10 சதவீதத்திற்கும் மேல் ஓட்டுகளை பெற்று திமுக, அதிமுகவுக்கு மாற்றான கட்சியாக தன்னை நிலை நிறுத்திக் கொண்டுள்ளது தே.மு.தி.க. இனி வரும் தனது படங்களில் ‘சிவப்பு எம்ஜிஆர்’ பாணியில் கட்சி பிரச்சாரத்தை தீவிரமாக்குவார் இந்த ‘கருப்பு எம்ஜிஆர்’ என எதிர்பார்க்கலாம்.

**********************************************

நிற்க. மேற்படி பட்டியலுக்கு உட்படாமல் ,

திரையில், ஒரு குறிப்பிட்ட கட்சியின் பிரசங்கியாக காண்பித்துக் கொள்வதை விட தனிப்பட்ட முறையில் அக் கட்சிக்காரராக தங்களது அபிமானத்தை வெளிப்படுத்தி செயலாற்றி வருபவர்கள் :-

‘எம்ஜிஆர் நினைப்பிலோ’ அல்லது தங்களது கதாநாயக மார்க்கெட்டின் ஆயுளைக் கணக்கிட்டோ அரசியல் கட்சியை துவக்கி விட்டு பின்னர் தாக்கு பிடிக்க முடியாமல் மூடு விழா நடத்தியவர்கள் – விழுங்கவும் முடியாமல் துப்பவும் முடியாமல் முக்கிக் கொண்டிருப்பவர்கள் – இனி புதியதாக ஆரம்பிக்கப் போகிறவர்கள்:-

தங்களது புதுப்படம் ரிலீஸ் சமயத்தில் மட்டும் ‘வாய்ஸ்’ கொடுத்து விட்டு, பின்னர் தலையை உள்ளுக்குள் இழுத்துக் கொள்பவர்கள் :-

– என்று தனி Trackம் தமிழ் டாக்கியில் உண்டு.

******************

ஞாபக மேட்டில் ஏறி நின்று பார்த்த போது எனக்குத் தென்பட்ட காலடிச் சுவடுகளின் தொகுப்பே இத் தொடர். இதில் போட்டுள்ளப் பட்டியலில் எனக்குத் தெரிந்தோ தெரியாமலோ சில, பல விடுபட்டிருக்கலாம். கோலிவுட் என்பது ‘வருங்கால முதலமைச்சர்’ கனவுகளை பதியன் போட்டு வளர்க்கும் நர்ஸரி கார்டன் என ஆகி விட்டுள்ள நிலையில், இத்தொடர் முழுமை பெற்றதென முடிவுக்கு வந்து மங்களம் பாடி ‘முற்றும்’ போட்டு முடித்து வைக்க என்னாலும் முடியாது ; ஏன், உங்களாலும் தான் ! எனவே,

(சுபம்)
(வணக்கம்)


vee.raj@rediffmail.com

……………………………

Series Navigation