ரஜித்

கொடையாளியாம் எம் முதலாளியால்
குடிநுழைவு கடந்து குடிமகனானேன்
நன்றிக் கடனாக நானென்ன செய்தேன்

பாத்திரம் கழுவும்போதே
பனிக்குடம் உடைந்தது
கர்ப்பினி மனைவிக்கு
தாதியாய் மாறி பாதி வலி சுமந்தாள்
பக்கத்து வீட்டு சீனத்தாய்
நன்றிக் கடனாக நானென்ன செய்தேன்

வீடொன்று வாங்க
உத்திரவாதமாய் ஓரிரு பேர்
வங்கிகள் கேட்டபோது
வலையில் சிக்கிய கொக்கானேன்
நண்டென நண்பர்கள் துண்டித்தனர் வலையை
விடுதலையானேன் வீடு வாங்கினேன்
நன்றிக் கடனாக நானென்ன செய்தேன்

பிள்ளைகளின் கல்வி கல்யாணம்
வங்கிகள் தந்த டிங்கிகள்
என்றெல்லாம்
முதுகு தாங்காச் சுமைகளுக்கு
முட்டுக் கொடுத்த நட்புக் கெல்லாம்
நன்றிக் கடனாக நானென்ன செய்தேன்

அங்கத் தந்த அன்னை
சாயல் தந்த தந்தை
அ ஆ தந்த ஆசான்
உதிரங்களென உடன்பிறந்தோர்
மண்ணுடலின் பாதி மனைவி
வாழ்க்கைத் தடம் தந்த வாரிசுகள்
நன்றிக் கடனாக நானென்ன செய்தேன்

கேள்வியாய் பதிலாய்
வாதியாய் எதிரியாய் நீதிபதியாய்
மனசாட்சி மட்டுமே பேசும்
வழக்கொன்று நடக்கிறது எனக்குள்ளே

rajid_ahamed@yahoo.com.sg