நாகூர் ரூமி

மேகங்கள் மிகவும் மென்மையானவை
இதழ் முகிழ்க்கும் மழலையின்
கன்னம் போல
அல்லது காது குருத்து போல

எனினும் மேகங்கள்
துணிச்சலானவை
முதுகைக் கொடுத்து
சூரியனை மறைக்கும்போது

மேகங்கள் மிகவும்
கருணையுள்ளவை
தாகங்கள் தீர்க்கும்போது

மேகங்கள் மிகவும்
அழகானவை
மலை முகடுகளில்
நடை பயிலும்போது

மேகங்கள் ரொம்ப அற்புதமானவை
தண்ணீரும் இல்லாமல்
தன்னுயிரும் போகாமல்
வான் வெளியில்
மிதந்து செல்லும்போது

மேகங்கள் மிகவும் மென்மையானவை
எனினும்
மேகங்கள் விரட்டுகின்றன
மேகங்களை
அது சூல் கொள்ளவா
போர் வெல்லவா தெரியவில்லை

எனினும் மேகங்கள்
மிகவும் மென்மையானவை.

— நாகூர் ரூமி
2:21 AM 04/03/04

ruminagore@yahoo.com