சத்தி சக்திதாசன்

பித்தன்தான் பிழையான உலகில் சரியாக வாழ முயலும் நானொரு
பித்தன் தான்
சித்தத்திலே ஊறிய தூறல்களை ஒவ்வொன்றாக அள்ள முயலும் நானொரு
பித்தன் தான்
பத்தியெறியும் பாசத்தீயின் மத்தியிலே உறவு எனும் பஞ்சைத் தேடும் நானொரு
பித்தன் தான்
கத்தியோடு யுத்தமிடும் கூட்டத்தின் முன்னே புத்தி விளக்கேற்ற முயலும் நானொரு
பித்தன் தான்
சத்தியத்திற்கு பூட்டுப் போட்ட சமுதாயச் சந்தையில் உண்மை எனும் சாவி தேடும் நானொரு
பித்தன் தான்
நித்தியமானது உலகினிலே வஞ்சகமற்ற அன்பு என நம்பி ஏமாந்து போன நானொரு
பித்தன் தான்
வத்தி வைக்கும் கூட்டம் நிச்சயமாக வகையற்று போகுமென திடமாக எண்ணிய நானொரு
பித்தன் தான்
சுற்றிச்சுழலும் அறியாமை எனும் புயலில் சிக்கித் தவிக்க மறுக்கும் நானொரு
பித்தன் தான்
குத்திக்கரணம் போடும் முட்டாள்கள் மத்தியில் கொள்கை பேசும் நானொரு
பித்தன் தான்
தத்தித் தடுமாறும் தனிமனித சுதந்திரத்தை அதன் விலையறியா கூட்டத்திற்கு விளக்க முயலும் நானொரு
பித்தன் தான்
பித்தர்களின் கூட்டத்திலே கூட சுயநலமெனும் பச்சை நோட்டு எதுவுமற்ற முட்டாள் நானொரு
பிச்சைக்காரன் தான்

sathnel.sakthithasan@bt.com