ஏதேதோ…

செல்வராஜ் ஜெகதீசன்

சமையல் கியாஸ் தீர்ந்த
ஒரு அதிகாலைப் பொழுதில்
பள்ளிக்குப் போகும்
மகனுக்கு கொடுத்தனுப்ப
ஏதாவது வாங்கிவர
இறங்கி நடந்த தெரு
மார்கழி மாதக் குளிரில்
சில்லிட்டிருந்தது.
வெண்ணிற உடையில்
உடற்பயிற்சிக்காக
ஓடியபடி ஒருவனும்
இடது கண்ணில்
கட்டொன்றோடு
கையில் காரியர் சகிதம்
கட்டிட வேலைக்குப் போகும்
மற்றொருவனும்
சிகரெட் ஒன்றோடு
செல்போனில் பேசியபடி
இன்னொருவனும் ஆக
சிக்னலைக் கடந்த அந்த
காலைப் பொழுது

இன்னமும் சில்லிட்டுக் கொண்டிருக்கிறது
உள்ளே ஏதேதோ சொல்லியபடி.