அகரம் அமுதா

அப்பன் குறும்பாலே
அன்னையினுள் முதல் நடவு
தொப்பூழ் கொடியவிழத்
தொட்டிலிலே மறு நடவு

தாய்மொழியக் கற்கின்ற
வாய்மொழி முதல் நடவு
தாய்மொழியாய் பின்னாளில்
வாய்த்தமொழி மறு நடவு

பிள்ளையினுள் வெள்ளை மனம்
பேரிறைவன் முதல் நடவு
கள்ள குணம் ஆசை மனம்
காலத்தின் மறு நடவு

பள்ளியிலே பாடங்கள்
பாலகனில் முதல் நடவு
பள்ளியறைப் பாடங்கள்
பருவத்தின் மறு நடவு

எண்ணத்தை நெஞ்சுள்ளே
எழுதுதல் முதல் நடவு
கண்துஞ்சும் வேளைவரும்
கனவுகள் மறு நடவு

உற்றுணர்ந்த யாவையுமே
உள்ளத்தில் முதல் நடவு
கற்பனையில் கண்டெடுக்க
காகிதத்தில் மறு நடவு

எமுத்துக் கல்வியினால்
இமை திறத்தல் முதல் நடவு
பழுத்த அனுபவத்தால்
பார்வைபெறல் மறு நடவு

வயதில் செய்கின்ற
வன்முறைகள் முதல் நடவு
வயதானப் பின்னாலே
வளைந்து கொடல் மறு நடவு

பிள்ளையில் தாய்கரத்தைப்
பிடித்துலவல் முதல் நடவு
தள்ளாடும் முதுமையிலே
தடியூணல் மறு நடவு

கருவறையில் முதல் நடவு
கண்ணறையில் கையணைப்பில்
இருப்பதெல்லாம் மறு நடவு
இறப்(பு)அது அறுநடவு!

agramamutha@yahoo.com