இந்து மாக்கடலில் பூகம்ப எழுச்சியை உளவு செய்து சுனாமி தாக்கப் போவதை எச்சரிக்க வேண்டும் (2)

சி. ஜெயபாரதன், கனடா January 13, 2005

This entry is part [part not set] of 64 in the series 20050113_Issue

சி. ஜெயபாரதன் B.E.(Hons) P.Eng (Nuclear), கனடா

சுனாமித் திமிங்கலம் பிடிக்க ஏதுவலை ?

சுனாமி வரும் பின்னே!

சுதியோலம் வரும் முன்னே!

சுனாமி விரைவதைக் கூச்சலிடு!

சுனாமி தொடுமுன் மேடைக்கு ஓடிவிடு!

முடுக்கி விட்ட பம்பரக் கோளம்! அடிக்கடல்

உடுக்க டித்துப் போடுமே தாளம்!

அடுக்க டுக்காய்ச் சீறிடும் நாகம்! உயிர்களை

எடுத்துச் செல்லும் கடற்கரை வேகம்!

‘இந்து மாக்கடலில் எழுந்த அசுரச் சுனாமி மீது மக்களின் கோபம் சிறிதும் தணியாது! ஆனால் 2004 டிசம்பர், 2005 ஜனவரி மாதங்களில் நேர்ந்த பேரழிவிலும், சீரழிவிலும் மாந்தர் கற்றுக் கொள்ளும் பாடங்கள் அநேகம்! பொறிநுணுக்கப் புது முறைகளைக் கையாண்டு இந்த சுனாமிக் கொல்லியின் நடமாட்டத்தைக் கண்காணித்துக் கண்டுபிடித்தால், உலகில் பல்லாயிரம் உயிர்களைக் காப்பாற்ற முடியும்! ‘

விஞ்ஞானி பிராங்க் கன்ஸாலெஸ்

‘கடற்தள மக்கள் நிலநடுக்க அதிர்ச்சியை உணர்ந்த உடனே, கடற்பகுதியைத் தவிர்த்து உள்நாட்டுக்குள் புகுந்திட அல்லது மேட்டுத் தளங்களுக்குக் கட்டாய இடப்பெயர்ச்சி செய்ய அரசாங்கம் முன்பே அறிவுரை புகட்டி இருக்க வேண்டும். கடற்தள அடியில் பூகம்பம் ஏற்படும் போது, சுனாமி பின்பற்றி எழுந்து கடற் தளங்களைத் தாக்குவதற்கு முன்பு, மக்கள் கடற்பகுதியை விட்ட வெளியேறித் தப்பிக் கொள்ள பொதுவாக 20 நிமிடங்களிலிருந்து 2 மணி நேரம் கிடைக்கிறது! ‘

வேவர்லி பெர்ஸன் [US Geological Survey National Earthquake Information Centre]

‘இந்து மாக்கடலில் பசிபிக் கடலரங்கு சுனாமி அபாய எச்சரிக்கை போன்ற ஓர் ஏற்பாடை சுமார் 20 மில்லியன் டாலர் செலவில் (2005 நாணய மதிப்பு) ஓராண்டுக்குள் அமைத்திடலாம் ‘

பிரதம விஞ்ஞானி பிலிப்ஸ் மெக்ஃபாடன் [இந்து மாக்கடல் சுனாமி எச்சரிக்கை அமைப்பு, பூதளவியல் கூடம், ஆஸ்திரேலியா]

‘சுமாத்திரா தீவுக்கு தென்மேற்கே 90 மைல் தூரத்தில் பூகம்பம் கடலடியில் உண்டாகி, பத்து நிமிடத்தில் அலைகள் கொந்தளித்து எழும் என்று எதிர்பார்க்கலாம். அப்பகுதிக்கு அப்பால் உள்ள கடல் நாடுகளின் கரைகளுக்கு, சுனாமி தாக்கும் முன் எச்சரிக்கை அறிவிக்க நிறைய நேரம் கிடைக்கிறது.

விஞ்ஞானி பால் விட்மோர் [NOAA West Coast & Alaska Tsunami Warning Center]

முன்னுரை: கி.மு.1645 ஆம் ஆண்டில் கிரேக்க நாட்டின் தென்திசைத் தீவான ஏஜியனில் [Aegean Island of Santorini] வெடித்த எரிமலை, மத்தியதரைக் கடலில் பெரும் சுனாமியை எழுப்பிக் கிடாட் தீவில் [Crete Island] வாழ்ந்த மினோவன் என்னும் முற்போக்கான நாகரீகக் குடியினர் [Minoan Civilization] அனைவரும் மாண்டொழிந்தனர் என்று தொல்பொருள் ஆய்வாளர் கூறுகிறார்கள்! அதே போன்று 13 ஆம் நூற்றாண்டில் சிலப்பதிகாரம், மணிமேகலை நூட்களில் கூறப்பட்ட பூம்புகார் என்னும் காவிரிப் பூம்பட்டினமும் இவ்விதக் கடல் எழுச்சி அலைகளால் தகர்ப்பாகிக் கொண்டு செல்லப்பட்டது என்று மணிமேகலையில் காணப் படுகிறது! இந்த நவீன யுகத்தில் 1883 இல் சுந்தா கடற்சந்தியில் [பழைய பர்மா] கிரகடோவா என்னும் இடத்தில் எரிமலை வெடித்து இந்து மாக்கடலில் 120 அடி உயரத்தில் மிகத்தீவிர சுனாமி ஒன்று உண்டாகி, கிழக்கிந்தியத் தீவிகளின் சில பகுதிகள் பாதிப்பாகி 36,000 பேர் மாண்டு போனதாக வரலாற்றில் எழுதப் பட்டுள்ளது!

1895 ஆண்டு முதல் 2004 ஆண்டு வரை ஹவாயி தீவை 12 தீவிர சுனாமிகள் தாக்கி இருக்கின்றன. 1998 ஆம் ஆண்டில் பாப்பா நியூகினி தீவில் 7.1 ரிக்டர் அளவில் பூகம்பம் உண்டாகி 19 மைல் தூரம் அதிர்ச்சியில் ஆட்டி அசைத்து, 15 நிமிடங்களில் தட்டையாகக் கிடந்த கடல்மட்டம் உடனே 100 அடி உயர்ந்து வீங்கி எழுந்து, ஒரு பெரும் சுனாமியைக் கிளப்பி 2200 கிராம மக்களைக் கொன்றது! இப்போது 2004 ஆண்டில் கடற்தள பூகம்பக் கொந்தளிப்பால் சுனாமி ஒன்று எழுந்து, 12 தென் கிழக்காசிய நாடுகளில் 160,000 பேர் மாண்டதுடன், 500,000 பேர் காயமடைந்து, ஐந்து மில்லியன் மாந்தர் அகதிகளாய் அல்லது அனாதைகளாய்ப் பரிதவித்து, உலக நாடுகளின் உதவியை நாடி அலைமோதி வருகிறார்கள்!

இந்து மாக்கடல் அரங்கில் சுனாமியை உளவும் தீர்மானம்

அபூர்வமாக எழும் சுனாமி, அடிக்கடி வரும் பூகம்பத்தை விடக் கொடியது, கோரமானது, மக்களைக் கொன்று குவிப்பது! கண்களுக்குத் தென்படாத, வருகையை ஊகிக்க முடியாத சுனாமியை உளவுக் கருவிகள் மூலம் கண்டுபிடித்து எச்சரிக்கை செய்தால், சேதங்களைத் தடுக்க இயலாமல் போனாலும், நிச்சயம் பல்லாயிரம் உயிர்களைப் பாதுகாக்க முடியும்! உலகெங்கும் பொதுவாக 10 ஆண்டுகளுக்குச் சராசரி 57 சுனாமிகள் எழுந்துள்ளதாகக் கணக்கிடப் பட்டுள்ளன! 1990 ஆண்டுக்குப் பிறகு இதுவரை 82 சுனாமிகள் ஏற்பட்டுள்ள தென்று தெரிகிறது! அவற்றில் 10 சுனாமிகள் மட்டும் 4000 மேற்பட்ட மக்களைக் கொன்றுள்ளதாக அறியப்படுகிறது! ஜப்பானிய மக்களும், காலிஃபோர்னியாவின் கடற்கரை மாந்தரும் பூகம்ப அபாய அறிவிப்பைக் கேட்டதும், கடற்பகுதியை விட்டு அப்பால் செல்ல வேண்டும் என்று பாடம் கற்பிக்கப் பட்டவர்கள். தமிழகக் கடற்கரை மாந்தர் அவ்வாறு அரசாங்கத்தால் கல்வி புகட்டப் படாததால், சுனாமியின் முதல் அலைவீச்சை வேடிக்கை பார்க்கச் சென்ற ஆயிரம் ஆயிரம் அப்பாவி மக்கள் சுனாமியின் கொடிய இரண்டாவது அல்லது மூன்றாவது பூதகரமான அலைமதில் அடித்துத் தப்பிக் கொள்ள முடியாமல் கடலுக்குள் இழுத்துச் செல்லப் பட்டதாக அறியப்படுகிறது!

சுனாமியில் பாதிக்கப்பட்ட தெற்காசிய நாடுகள் 2005 ஜனவரி 6 ஆம் நாளன்று ஜகார்டாவில் நடந்த சுனாமி நிவாரணப் பேரவையில், தற்போது அமைக்கப்பட்டுள்ள பசிபிக் கடலரங்கு சுனாமி எச்சரிக்கை ஏற்பாடு போன்று இந்து மாக்கடல் அரங்கிலும் நிறுவ ஏகமனதாக உடன்பட்டுள்ளன. அமெரிக்காவின் நோவா-எம் துணைக்கோள் [NOAA-M Satellite] 2002 மே 21 இல் ஏவப்பட்டு, 2003 முதல் 26 பசிபிக் கடற்கரை நாடுகளுக்கு பூகம்ப, சுனாமி எழுச்சிகளை அறிவித்து வருகிறது. புதிதாக அமைக்கப் போகும் இந்து மாக்கடல் சுனாமி எச்சரிக்கை உளவு மிதப்பிகளும், நோவா-எம் துணைக் கோளுடன் இணைக்கப் படலாம் என்று கருதப்படுகிறது. அடுத்த வாரம் ஜப்பானில் அனைத்துலக விஞ்ஞானிகளும் கூடி அளவளாவி பூகோள சுனாமி எச்சரிக்கை ஏற்பாடு [Global Tsunami Warning System] ஒன்றை உலகனைத்துக்கும் பொதுப்பணி செய்ய ஆரம்பித்து வைக்கப் போவதாக பியீட்ரிஸ் ஆன் பெளஸர் [Beatrice Ann Bowser] என்னும் விஞ்ஞானப் பெண்மணி ஜனவரி 11, 2005 இல் கூறினார்.

இந்தியாவில் சுனாமியின் எதிர்பாராத விளைவுகள்

சுனாமி அலை ஒன்று மட்டும் வரும் என்று நினைக்கக் கூடாது! அடுத்தடுத்துப் பெருத்து வரும் சுனாமிச் சுவர் அலைகள் குறைந்தது மூன்று அல்லது மூன்றுக்கு மேலாகவும் வரலாம். இந்தியாவைச் சேர்ந்த அந்தமான், நிகோபார் தீவுகள் சுமாத்திரா தீவுக்கருகில் இருப்பதால் முதலில் பூகம்பச் சேதமும், அடுத்து சுனாமித் தாக்குதலும் ஏற்பட்டு மிகுந்த பாதிப்பை அடைந்தன. இந்திய தளத்தில் தமிழ்நாடு, பாண்டிச் சேரி, ஆந்திரா, கேரளா ஆகியவற்றின் கரைப் பகுதிகளில் பலர் மாண்டதுடன் சேதமும் உண்டானது. அப்பகுதிகளில் மட்டும் மொத்தம் 123 நிலநடுக்கங்கள் (5.0-6.0 ரிக்டரில் 112 அதிர்வுகள், 6.0 ரிக்டருக்கு மேற்பட்ட 11 அதிர்வுகள்) உணரப்பட்டன! மொத்தம் மாண்டவர் எண்ணிக்கை: 10,151. காணாமல் போனவர்: 5628. அதில் 5542 பேர் அந்தமான், நிகோபாரைச் சேர்ந்தவர்! சுமாத்திரா தீவில் பூகம்பம் ஏற்பட்ட பிறகு அந்தமான், நிக்கோபார் தீவுகளிலும் 6.5 MW மேற்பட்ட அளவில் நிலநடுக்கங்கள் டிசம்பர் 26 2004 இல் காலையில் 09:52 மணிக்கு (இந்திய நேரம்) நேர்ந்துள்ளன! இந்தனேசியாவில் ஏற்பட்ட அசுரப் பூகம்பத்திற்கும், சென்னை, அந்தமான், நிக்கோபார் தீவுகளில் நேர்ந்த நிலநடுக்கங்களும் என்ன தொடர்பு உள்ளது என்று பூதளவாதிகளின் கருத்துகளைக் கேட்க வேண்டும். அரசாங்கம் முன்னெச்சரிக்கை எதுவும் செய்யாததால், நிலநடுக்க அதிர்வுகள் முன்பே அறிகுறிகள் காட்டியும் கடற்கரையை விட்டு அப்பால் செல்லாத சென்னை வாசிகள் பலர், அதை நோக்கி விரைந்து வேடிக்கை பார்க்கப் போய்த் தமது இன்னுயிரைச் சுனாமிக்குப் பறிகொடுத்தார்கள்!

பசிபிக் கடலரங்கின் சுனாமி எச்சரிக்கை ஏற்பாடு

தவறுகளின்றித் துல்லியமாகக் கண்டுபிடிக்கும், புதிதாக மேம்படுத்தப்பட்ட பசிபிக் சுனாமி எச்சரிக்கை ஏற்பாடை அமெரிக்காவின் தேசீயக் கடற் சூழ்வெளி உளவு ஆணையகம் [National Oceanic & Atmospheric Administration (NOAA)] டிசைன் செய்து தயாரித்தது. அந்த கண்காணிப்பு முறையில் சுனாமி உளவு செய்து சமிக்கை அனுப்பும் அடிக்கடல் அதிர்ச்சி உணரும் கருவிகள், அவற்றை நோவா-எம் துணைக்கோளுக்கு மின்னலை மூலம் அறிவிக்கும் ஆழ்கடல் மிதப்பிகள் [Deep Ocean Assessment & Reporting Sensors (DART)] ஆகியவை பயன்படுகின்றன. சுமாத்திரா அருகே நிகழ்ந்த பூகம்பத்தில் சுனாமி பொங்கி எழுந்து கடல் மட்டம் 10 மீடர் [>30 அடி] உயர்ந்ததாக அறியப்படுகிறது! ஆழ்கடல் உளவிகள் சுனாமியின் மூலாதாரமான, முக்கியமான இந்த கடல் மட்ட உயர்ச்சி அளவைக் கணித்து துணைக்கோளுக்குத் தெரிவிக்க வேண்டும். 1965 ஆண்டு முதல் பயன்பட்ட அலை உயர அளப்பு மானிகள் [Tidal Gauges] சில சமயங்களில் பொய்யான சமிக்கைகளை அனுப்பி, சுனாமி எச்சரிக்கையைத் தவறாகச் செய்து [False Alarm] மக்களை ஏமாற்றிப் பெரும் நிதி விரயத்தைக் கொடுத்தன! ஆனால் ஆழ்கடல் உளவிகளின் அழுத்த மானிகள் [Sea Water Pressure Sensors] கடல் உயரத்தில் ஏற்படும் வேறுபாடுகளைத் துல்லியமாகக் கணிப்பதால் பொய் அறிவிப்பு எதுவும் நிகழ்வதில்லை!

பசிபிக் சுனாமி எச்சரிக்கை மையங்கள் ஹவாயி, அலாஸ்கா ஆகிய இரண்டு தளங்களில் நிறுவகம் ஆகி 26 கடற்தள நாடுகளுக்கு 24 மணி நேரமும் கண்காணிப்பு செய்து தகவல் அனுப்பி வருகின்றன. ஹவாயியின் எச்சரிக்கை மையம் 1948 ஆம் ஆண்டிலே நிறுவகமானது! 1965 இல் அமைக்கப்பட்ட பசிபிக் கடற்தள எச்சரிக்கை ஏற்பாட்டில் முதலில் 6 மிதப்பிகள் [Buoys] பசிபிக் கடலிலும் மற்றும் பல அலை அளப்பு மானிகள் [Tidal Gauges] கடற்தளங்களில் நிறுவப்பட்டன. இப்போது இன்னும் 14 மிதப்பிகள் பசிபிக் கடலில் வைக்கப்படலாம் என்று அறியப்படுகிறது. இந்தோனேசியா, தாய்லாந்து ஆகிய இரண்டு நாடுகள் பசிபிக் எச்சரிக்கை ஏற்பாட்டில் இருந்தும், பூகம்பம் ஏற்பட்டு சுனாமி தாக்கலாம் என்று அறிவிப்பு ஆஸ்திரேலியா மூலமாக முன்னறிப்பு வந்தும் மக்களுக்கு எச்சரிக்கை செய்யாமல் ஆயிரக் கணக்கான பேரை மரணமடைய விட்டது, மன்னிக்க முடியாத மாபெரும் இமாலயத் தவறாகும்!

அமெரிக்காவின் நோவா ஆணையகம், சூழ்வெளித் துணைக்கோள் இணைப்புக் பணிக்கு [NOAA-M Environmental Satellite Network] ஆண்டுக்கு 800 மில்லியன் டாலர் செலவில் கண்காணிப்பு எச்சரிக்கைப் பணிகளை மேற்பார்வை செய்து வருகிறது. அத்துடன் பசிபிக்கடல் உளவு மிதப்பிகள், அதிர்ச்சி உணரும் கருவிகள் ஆகியவற்றைப் பராமரிக்க வருடத்திற்கு 8 மில்லியன் டாலர் மேலும் தேவைப்படுகிறது. கடலடியில் பதிக்கப்படும் அதிர்ச்சி உணரும் கருவிகள், கடல் மட்ட எழுச்சி உணரும் கருவிகள் [Seafloor Bottom Sensors] நிலநடுக்கத்தை உணர்ந்து ஒரு செ.மீடர் சுனாமிக் கொந்தளிப்பு அளவையும் காணும் திறம் உடையவை! கடலடி அதிர்வுக் கருவிகள் 20,000 அடி [6000 மீடர்] கடல் ஆழத்தில் கப்பல் யந்திர இறக்கி மூலம் வைக்கப் படுகின்றன. 15 அடி [4.3 மீடர்] நீளமுள்ள மிதப்பிகள் நீர் மட்டத்துக்கு மேல் 8 அடி [2.5 மீடர்] உயரத்தில் காணப்படும். கடல் அலைகள் இழுத்துச் செல்லாதபடி, மிதப்பிகளை நாண் மூலம் கட்டிக் கடற்தளத்து மேல் ஆப்பிகளாய் [Anchors] வைக்கப்படும் கனச்சாதனம் பற்றிக் கொள்கிறது. கருவியின் சமிக்கைகள் ஒலி அலைகளாய்த் தாக்கப்பட்டு, மிதப்பியில் [Buoy] பதிவாகி, அவை பிறகு மின்னலைச் சமிக்கையாக மாற்றமாகித் துணைக் கோளுக்கு அனுப்பப் படுகின்றன. ஹவாயி, அலாஸ்கா சுனாமி எச்சரிக்கைத் தளங்களுக்கு துணைக்கோளே தொடர்ந்து தகவல் அனுப்பி வருகிறது. ஹவாயி அல்லது அலாஸ்கா பெற்ற தகவலை 26 பசிபிக் கடற்தள நாடுகளுக்கு அடுத்து அனுப்பப் படுகிறது.

சுனாமி அபாயத்துக்கு நீண்ட கால ஏற்பாடுகள்

இந்திய அரசாங்கம் அனைத்துலகு சுனாமி எச்சரிக்கை ஏற்பாடு ஆலோசனைக்கு உடன்பட்டு நிதியும், நேரமும், நிபுணரும் அளிக்க முன்வந்துள்ளது. சுனாமி, பூகம்பம், வெள்ளம் போன்ற எதிர்பாராத இயற்கை இன்னல்களைக் கையாளத் ‘தேசீயப் பேரழிவு நிர்வாக ஆணையகம் ‘ [National Disaster Management Authority (DMA)] ஒன்றை மத்திய அரசு நிறுவியுள்ளது. பாரத விஞ்ஞானப் பொறித்துறை அமைச்சகம் [Ministry of Science & Technology] முதலில் சுனாமி எச்சரிக்கை மையத்தை அமைப்பதாக இருக்கிறது. பிறகு மாநில அரசாங்கங்கள் நகராட்சி, ஊராட்சி மன்றங்களுடன் கலந்து உரையாடி உள்துறை பேரழிவு நிர்வாக மையங்களை [Local Diaster Management Centres] ஏற்படுத்தி யாரெல்லாம் அதில் நியமனமாக வேண்டும் என்று தீர்மானிக்கப்பட வேண்டும். உள்துறை நிர்வாகத்தில் ஊராட்சித் தலைவர், காவல் துறையினர், மருத்துவ மனை டாக்டர்கள், கல்லூரி/பள்ளிக்கூட அதிபதி, வணிகத்துறைகளின் பிரதிநிதி, போக்குவரத்து வாகனப் பிரதிநிதி, ஹோட்டல்களின் பிரதிநிதி, கோயில்/கிறித்துவ ஆலயம்/மசூதி ஆகியவற்றின் பிரதிநிதிகள், கட்சிகளின் பிரதிநிதிகள் பங்கு கொள்வது ஊருக்கு நல்லது.

சுனாமி வருவதற்கு முன் வேண்டிய உதவிச் சாதனங்கள், தற்காலிய கூடார அமைப்புக்குத் தார்பாலின் உபகரணங்கள், உணவுப் பண்டங்கள், படுக்கைகள், போர்வைகள், உடைகள், முதல் உதவி மற்றும் பிற மருந்துச் சாதனங்கள், மருந்துகள், சுகாதாரப் பொருட்கள் ஆகியவற்றை ஊர் ஜனத்தொகைக்கு ஏற்றாற்போல் எங்கே, எவ்வளவு சேமிக்க வேண்டும் என்பவை தீர்மானிக்கப்பட்டு திரட்டி வைக்கப் பட வேண்டும். பூகம்ப, சுனாமி ஆகிய இயற்கை இன்னல்கள் எப்படி ஏற்படுகின்றன, எவ்விதப் பாதுகாப்பு முறைகளைக் கையாளுவது, காயம் பட்டோர்களுக்கு எப்படி முதல் உதவி செய்வது, யார் யார் என்ன உதவிகள் செய்வது, அபாய அறிவிப்புப் பயிற்சி முறைகளை எவ்விதம் பின்பற்றுவது என்பதைத் திரைப்படமாக எடுத்துப் பள்ளிக்கூடம், கல்லூரி, தொலைகாட்சி, சினிமா தியேட்டர், ஊராட்சி, நகராட்சி மையங்கள், பொதுப் பேச்சு மேடைகள், கண்காட்சி அரங்கங்கள், சமய/மதக் கூட்டங்கள் ஆகிய இடங்களில் காட்ட வேண்டும். இப்பணிகள் யாவும் தேசீய மக்களின் கடமை நெறிப்பாணியாக ஒவ்வொருவரும் கருதி, ஒழுக்க சிந்தனையுடன் கடைப்பிடிக்கப்பட வேண்டும். இவை நீண்டகாலப் பணிகள்.

சுனாமி அபாயத்துக்குக் குறுகிய கால ஏற்பாடுகள்

சுனாமியின் கோர விளைவில் உயிர்தப்பிய சகோதர மாந்தருக்கு உதவி செய்யக் கடமைப் பட்டவர் யார் ? உடனிருக்கும் அனைவருமே விருப்பமுடன் இப்பணியை ஏற்றுக் கொள்வது சாலச் சிறந்தது. ஆன்மீகப் பக்குவமுள்ள பெரும்பாலோர், சுனாதி பாதிப்பில் ஜாதி, மதம், மொழி, இனம், நிறம், சமூகநிலை ஆகியவற்றைப் பாராது, அகதிகளுக்கும், அனாதிகளுக்கும் உதவி செய்தார்களா என்பது சரியாகத் தெரியவில்லை! மதிப்புக்குரிய நண்பர் ஜெயமோகன் கடந்த வாரத்தில் எழுதியுள்ள (ஜனவரி 6, 2005) ‘சுனாமிப் பேரழிவும், பேரழிவு அரசியலும்: அனுபவக் குறிப்புகள் ‘ என்னும் கட்டுரைப் படித்த பின்பு, அபாய காலங்களில் எங்கு மாட்டிக் கொண்டாலும், தமிழ் நாட்டில் மட்டும் மாட்டிக் கொள்ளக் கூடாது என்னும் மனப்பயம் எழுகிறது. உலக மெங்கும் உதவிக் கரங்கள் தாவி வரும்போது, தமிழ்நாட்டில் சில குழுவினர் அபாய சமயங்களிலும் உதவி எதுவும் செய்யாது பதுங்கிக் கொள்வது எப்போது மாறப் போகிறது ? எதிர்பாராத அபாய விளைவுகள் ஏற்படும் போது உண்டாகாமல் ஒருமைப்பாடு, உதவி மனப்பான்மை எப்போது தமிழரிடம் உண்டாகப் போகிறது ?

சென்னைக் கடலோர மீனவர் பரிதவிப்புக் காட்சிகளைக் கனடாவின் சி.பி.சி. தொலை அறிவிப்புக் கார்பொரேஷன் [Canadian Broadcasting Corp (CBC)] காட்டி, தகவல் அளிப்போர் கூறியது: ‘இந்தியாவில் ஏழை, பணக்காரன் என்னும் மாறாத இரு பிரிவுகள், சென்னைக் கடலோரங்களில் சுனாமியால் பாதிக்கப்பட்டுப் பரிதவிக்கும் மீனவர்களைப் பார்த்தால் பளிச்செனத் தெரிகிறது ‘. மெய்யாகக் காட்சியில் கண்டது என்ன ? ஒரு தற்காலிய தார்பாலின் கூடாரம் கூட அமைக்கப்படாமல் மீனவ ஆடவர், பெண்டிர், சிறுவர் பலர், பாலை வனமான கடற்கரைப் பகுதியில் அங்குமிங்கும் காற்றில் பறக்கும் கிழிந்த துணிகளைக் கூரையாக வேய்ந்து கொண்டு குச்சிக்குடில் நிழலில் ஒதுங்கி அகதிகள் போல் விழித்துக் கொண்டிருந்தார்கள்! அதே சமயத்தில் சென்னை நகர வாசிகள் ஒன்றும் நிகழாதது போல் காட்டிக் கொண்டு வீதிகளில் காரிலும், ஆட்டோவிலும் பயணம் செய்து என்றும் போல் தமது வேலைகளில் மும்முரமாய் ஈடுப்பட்டிருந்தனர்! இரண்டு காட்சிகளையும் அடுத்தடுத்துப் பார்க்கும் போது ‘நெஞ்சு பொறுக்குதில்லையே ‘ என்னும் பாரதியாரின் பாட்டுதான் எனக்கு நினைவில் பலமாய் ஒலித்தது!

(கட்டுரை தொடரும்)

தகவல்கள்:

Picture Credits: AP Photos, Time, Newsweek, Toronto Star, The Hindu & The Following Web Sites.

1. Indian Ocean Tsunami Warning System Will Cost Just 1.9 Million-Dollar (Jan 4, 2005) [http://news.scotsman.com/latest.cfm]

2. UNESCO Ready to Create Tsunami Warning System in Indian Ocean (Jan 4, 2004) [www.itar-tass.com/eng]

3. Physics of Tsunamis [http://wcatwc.gov/physics.htm]

4. How a Tsunami Forms ? Toronto Star (Dec 27, 2004)

5. Asia to Seek Help on Warning System, Indonesia Death Rates 19% (Jan 4, 2005) [www.bloomberg.com/apps/news.

6. Tsunami Warning System [www.geophys.washington.edu/tsunami] (Jan 3, 2005)

7. The Tsunami Warning System in the Pacific (May 8, 1997)

8. The Global Ocean Observing System (GOOS) [http://ioc.unesco.org/goos/docs/whatis01.htm]

9. Tsunami Research Activities [www.prh.noaa.gov/pr/itic]

10 Early Warning System Could Have Saved Lives [www.ctv.ca/servlet/ArticleNews/] (Jan 5, 2005]

11 US Geological Survey ‘Warnings Could Have Saved Thousands ‘ (Dec 27, 2004)

12 CBC News ‘Hell, Highwater & Heartache ‘ [www.cbc.ca/newsbackground/asia_earthquake] (Jan 6, 2005)

13 Physics of Tsunami By: Frank Gonzalez [www.sciam.com/] (May 18, 1999)

14 Tsunami Ready Community Requirements [www.prh.noaa.gov/ptwc/tsunamiready/requirements.htm]

15 Press Information Bureau, Govt of India [www.pib.nic.in/release] (Jan 11, 2005)

****

jayabarat@tnt21.com [S. Jayabarathan (January 12, 2005)]

Series Navigation

20050113_Issue

சி. ஜெயபாரதன், கனடா

இந்து மாக்கடலில் பூகம்ப எழுச்சியை உளவு செய்து சுனாமி தாக்கப் போவதை எச்சரிக்க வேண்டும்

சி. ஜெயபாரதன், கனடா January 6, 2005

This entry is part [part not set] of 57 in the series 20050106_Issue

சி. ஜெயபாரதன் B.E.(Hons) P.Eng (Nuclear), கனடா

சுனாமி வரும் பின்னே! சுருதியோலம் வரும் முன்னே!

பூகம்ப உடுக்கடித்துக் கடல்மடியில்

பொங்கும் அலைப் பாம்புகள் நெளிந்து

நாகப் படமெடுத்து நரபலிகள் நேருமுன்

நடுக்கத்தின் அதிர்வு நல்கும் எச்சரிக்கை!

‘சுனாமி எச்சரிக்கை அனுப்பச் சீரான, விரைவான ஒலிபரப்புச் சாதனத் துணை ஏற்பாடுகள், பயிற்சி முறைபாடுகள் நாடெங்கும் நிலவப்படாமல், ஏராளமான நிதியைச் செலவழித்து நவ நாகரீகக் கருவிகளும், புதுவித அதிர்வு உளவுக் கண்காணிப்புகளும் நிறுவகம் செய்வதில் ஏது பயனுமில்லை! அவ்வித ஏற்பாடுகளை ஒரு நாட்டில் அமைப்பது மாபெரும் ஒழுக்க வேலையாகும். சுனாமி வருகையை அறிவித்தால், கடற்கரைப் பகுதியில் திரியும் ஒவ்வொரு தனிநபர் காதிலும் பலமாகத் தெளிவாக அரவம் ஒலிக்க வேண்டும். அதுதான் மெய்யாக மிகக் கடினமானது. ‘

‘இந்து மாக்கடல் அரங்கு அனைத்திலும் சுனாமி எச்சரிக்கை செய்ய சுமார் 30 நிலநடுக்க வரைமானிகளும் [Seismographs], 10 அலை உயர அளப்புக் கருவிகளும் [Tidal Gauges], 6 சுனாமி உளவுச் சமிக்கை அனுப்பும் ஆழ்கடல் மிதப்பிகள் [Deep Ocean Assessment & Reporting of Tsunamis (DART) Buoys] தேவைப்படும். ‘

பிரதம விஞ்ஞானி பிலிப்ஸ் மெக்ஃபாடன் [இந்து மாக்கடல் சுனாமி எச்சரிக்கை அமைப்பாளர், பூதளவியல் கூடம், ஆஸ்திரேலியா]

‘பசிபிக் மாக்கடல் அரங்கில் 1965 ஆண்டுமுதல் 26 கடற்தள நாடுகள் ஏற்கனவே இணைப்பாகி சுனாமி எச்சரிக்கை அறிவிப்பு ஏற்பாடு அமைக்கப்பட்டுத் தேசீயக் கடற் சூழ்வெளி உளவு ஆணையகத்தின் [National Oceanic & Atmospheric Administration (NOAA)] மேற்பார்வையில் சீராகப் பணியாற்றி வருகிறது. அதே ஏற்பாடு இந்து மாக்கடல் அரங்குக்கும் விரிவு செய்யப்பட்டு அதன் கடற்தள நாடுகள் இணைக்கப் பட்டால், உலகக் கடல்நாடுகள் அனைத்துக்கும் ஒரே அறிவிப்பகம் கண்காணிப்பு செய்யலாம். ‘

அதிபதி கொன்ராடு லாடன்பேக்கர் [இந்து மாக்கடல் சுனாமி எச்சரிக்கை அமைப்பு, பூதளவியல் கூடம், ஆஸ்திரேலியா]

‘பசிபிக் மாக்கடல் அரங்கு சுனாமி எச்சரிக்கை அனுபவங்களையும், பொறிநுணுக்கங்களையும் இந்து மாக்கடல் நாடுகளுடன் பகிர்ந்து கொண்டு, அங்கேயும் ஒரு நிலையம் அமைத்திட நாங்கள் உதவி செய்யத் தயாராக இருக்கிறோம். ‘

கொய்ச்சிரோ மட்சூரா [Koichiro Matsuura, Director UNESCO]

முன்னுரை: பொதுவாக ‘சுனாமி ‘ என்னும் ஜப்பானியச் சொல்லுக்கு நிலவு, பரிதி ஆகியவற்றின் ஈர்ப்பாற்றலில் ஏற்படும் [Tidal Waves] பொங்கலைகள் என்று பலர் தவறாக அர்த்தம் செய்து கொள்கிறார்கள். பூகம்ப அலைகளான சுனாமிச் சுவரலைகள் சாதாரணப் பொங்கலைகள் அல்ல. அடிக்கடி தோன்றாமல் அபூர்வமாக எழும் இம்மதில் அலைகள் கடல்மடியின் அடித்தளப் பூமியில் உண்டாகும் பூகம்பம், எரிமலை அல்லது கடலில் விழும் பெரும் நிலச்சரிவு ஏதாவது ஒன்றால் உற்பத்தியாகி, கரை ஓரப் பிரதேசங்களில் பேரழிவுகளையும், மாந்தருக்குக் கோர மரணத்தையும் உண்டாக்க வல்லவை! வெகு வெகு அபூர்வமாக அண்ட வெளியிலிருந்து புவிநோக்கி வரும் விண்கல் [Meteorite] ஒன்று கடலில் விழுந்தால் பூமிக்கு ஏற்படும் பேரழிவு, கற்பனை செய்ய முடியாத ஒரு பிரளயமாகத்தான் இருக்கும்! 1964 இல் அலாஸ்காவின் பிரின்ஸ் வில்லியம் செளண்டு [Prince William Sound, Alaska] என்னும் தெற்குக் கடலோரப் பகுதியில் ஏற்பட்ட பூகம்பத்தால் எழுந்த சுனாமிச் சுவரலைகள், அமெரிக்காவில் 90 மில்லியன் டாலர் நிதிச் செலவு விரையம் செய்து, நல்ல வேளையாக 119 பேர் மாண்டனர்! ஆனால் இந்து மாக்கடலில் 2004 டிசம்பர் 26 ஆம் தேதி ஏற்பட்ட சுனாமி 12 நாடுகளின் கரை ஓரங்களைத் தகர்த்து 150,000 பேர் மாண்டதுடன், பிழைத்த 5 மில்லியன் மாந்தர் குடிநீரின்றி, உணவின்றி, குடிலின்றி அனாதைகளாய் ஆக்கப்பட்டுப் பிறர் உதவியை அனுதினமும் எதிர்பார்த்துக் கிடைத்தும், கிடைக்காமலும் பேரின்னலில் அலைமோதி வருகிறார்கள். இறந்து போன, காயம்பட்ட அல்லது அனாதையான மொத்தக் குழந்தைகள் 1.5 மில்லியன் என்று அனுமானிக்கப் படுகிறது!

சுமாத்திர தீவுக்கருகில் 9.0 ரிக்டர் அளவு பூகம்பம் ஏற்பட்டதை 8 நிமிடங்களில் கண்டுபிடித்து, பசிபிக் சுனாமி எச்சரிக்கை அறிவிப்பகம் முதலில் இந்தோனேசியா, தாய்லாந்து, சிங்கபூர் உள்பட பசிபிக் கடலரங்கு நாடுகளுக்கு 15 நிமிடங்களுக்குள் அறிவித்தது! இந்த அறிவிப்புக் கூட்டணியில் இந்தியா, இலங்கை, மால்டிவ் தீவுகள் உறுப்பின நாடுகளாக இல்லாவிட்டாலும், பசிபிக் அறிவிப்பகம் நிலநடுக்கம் பற்றியும், அது சுனாமியாக உருவாகலாம் என்றும் தெரிவித்திருக்கிறது! இந்து மாக்கடல் அரங்கு நாடுகளில் அபாய அறிவிப்பு, மற்றும் காப்பு முறைகள் எவையும் அமைக்கப் படாததால், கரைப் பகுதிகளுக்கு முன் அறிவிப்பு செய்ய முடியாமல், ஆயிரக் கணக்கான மக்களை, குழந்தைகளைக் கால தேவனுக்குப் பலியிட நேரிட்டது! எச்சரிக்கை கிடைத்த இந்தோனேசியா, தாய்லாந்து ஆகிய நாடுகளும் கரைப் பகுதி மாந்தருக்கு ஏன் முன்னறிவிப்பு செய்து பாதுகாக்க முயலவில்லை என்பது வியப்பாக இருக்கிறது!

இந்து மாக்கடல் அரங்கில் சுனாமி எச்சரிக்கை அறிவிப்பு ஏற்பாடுகளை நிறுவ, 2005 ஆண்டு நாணய மதிப்பில் சுமார் 2 மில்லியன் டாலர் செலவாகலாம் என்று ஒரு விஞ்ஞானி மதிப்பிடுகிறார். இந்த நிதி மிகையான தொகையாக அச்சமூட்டினாலும், இப்போது உலக நாடுகள் திரட்டியுள்ள உதவி நிதி 4 பில்லியனைத் தாண்டி [ஜனவரி 5, 2005] இன்னும் குவிந்து கொண்டுள்ளது! ஏதுமற்ற அனாதைகளான 5 மில்லியன் சுனாமிப் பாதிப்பு மக்கள், புதுக் குடியேற்றத்தில் புகுந்து ஊதிய வசதிகளை மீண்டும் பெறுவதற்குப் பல பில்லியன் கணக்கில் நிதிவளம் தேவைப்படும் போது, வருமுன் காக்கும் எச்சரிக்கை ஏற்பாடுகளுக்கு 2 மில்லியன் டாலர் செலவழிப்பது இந்து மாக்கடல் நாடுகளுக்கு வீண் என்று விலக்குவது தவறானது. மீண்டும் இத்தகையக் கோர மரணங்களும், இன்னல்களும் நேரக் கூடாது என்னும் தீர்மானத்தில் இந்தோனேசியா, இந்தியா, ஸ்ரீலங்கா, தாய்லாந்து, மலேசியா ஆகிய நாடுகள் இந்து மாக்கடல் அரங்கு சுனாமி எச்சரிக்கை ஏற்பாடைத் தீவிரமாய் அமைக்க ஜகார்டாவில் 2005 ஜனவரி 6 ஆம் தேதியில் கூடி ஆலோசனை செய்யப் போகின்றன. அகில நாட்டு ஐக்கியப் பேரவையின் ஆணையாளர் கொய்ச்சிரோ மட்சூரா [Koichiro Matsuura, Director UNESCO] பசிபிக்கடல் அரங்கு சுனாமி எச்சரிக்கை அனுபவங்களை, இந்து மாக்கடல் அரங்கு நாடுகளுக்குப் பகிர்ந்து கொண்டு, அங்கே ஒரு நிலையம் அமைத்திட உதவத் தயாராக இருப்பதாகவும் பாரிஸில் ஜனவரி 4 ஆம் தேதி கூறினார்.

பசிபிக் கடலரங்கில் சுனாமிக் கொல்லி கண்காணிப்பு

சுனாமி மதில் அலைகள் வருவதற்கு எந்தக் கால நியதியோ அல்லது கால நேரமே எதுவும் இல்லை! அடிக்கடி வருமென்று சொல்ல முடியாமல் அபூர்வமாக, எதிர்பாராத சமயத்தில் எழுந்து தாக்குவது சுனாமியின் கோரப் பண்புகளில் ஒன்று. ஆயினும் சுனாமி கடற்தள மக்களின் கொடுங் கூற்றாக, பசிபிக் கடற்கரைப் பகுதிகளில் கருதப்படுகிறது! இந்து மாக்கடல் கரை மக்களுக்கு இதுவே சுனாமியின் முதல் பயங்கர அனுபவம்! சுனாமியின் கோரத் தாக்குதலைத் தவிர்க்க முடியா விட்டாலும், அதன் எழுச்சியைக் கண்காணித்து எச்சரிக்கை அறிவித்துப் பாதுகாப்புத் திட்டங்கள் தயாராக இருந்தால், பல்லாயிரம் உயிர்களைக் காப்பாற்ற முடியும். ஆயினும் சுனாமிச் சுவரலைகள் தகர்க்கப் போகும் வீடுகள், பள்ளிக்கூடங்கள், மருத்துவ மனைகள், வீதிகள், படகுகள், வாகனங்கள், இரயில் பாதைகள், வயல்கள், கிணறுகள் போன்ற மனிதத் துணை வசதிகள் எவற்றையும் பாதுகாக்க முடியாது. 1945 ஆம் ஆண்டில் அணு ஆயுதம் போட்டபின் அழிந்து போன ஹிரோஷிமா, நாகசாக்கி நகரங்கள் போன்று, இந்தோனேசியாவின் சுமாத்திரா தீவின் வடக்குப் பகுதி பேரழிவுக் கோலத்தை இப்போது காட்டுகிறது!

அமெரிக்காவின் சுனாமி கண்காணிப்புத் திட்டத்தில் நிலநடுக்க உளவு, அறிவிப்புப் பணிகள் 24 மணி நேரமும் மனிதரின் நேரடிப் பார்வையில் இயங்கி வருகின்றன. சுனாமி அபாய எதிர்பார்ப்பு அறிவிக்கப் பட்டதும், கடற்தளப் பகுதிகளில் எங்கு, யார், என்ன பணிசெய்ய வேண்டும் என்பவை சீராக எழுதி வைக்கப்பட்டு, பல இடங்களில் போலிப் பயிற்சிகளும் [Simulation Drills] மாந்தருக்கு அளிக்கப்பட்டு, மீண்டும் பயிற்சிகள் தொடரப்பட்டு வருகின்றன. இப்பணிகளை எல்லாம் தேசீயக் கடற் சூழ்வெளி உளவு ஆணையகம் [National Oceanic Atmospheric Asministration (NOAA)] மேற்பார்வை செய்து வருகிறது. இரண்டு தனித்தனி நிலையங்களில், பூகம்பச் சுனாமி எழுச்சிக் கண்காணிப்புகள் இயங்கி வருகின்றன. அலாஸ்காவில் பால்மர் [West Coast Tsunami Warning Center Palmer, Alaska] என்னும் இடத்தில் உள்ள மேற்குக் கடற்கரை சுனாமி எச்சரிக்கை மையம் ஒரு நிலையம். ஹவாயியின் ஈவா கடற்கரையில் உள்ள ‘ரிச்சர்டு ஹேக்மேயர் பசிபிக் சுனாமி எச்சரிக்கை மையம் [Richard Hagemeyer Pacific Tsunami Warning Center Ewa Beach, Hawaii] இரண்டாவது நிலையம்.

மில்லியன் டன் கணக்கில் கடல் வெள்ளத்தைச் சுமந்து கொண்டு, கடல்மீது வெகு விரைவில் நீந்திச் சுனாமிச் சுவரலைகள் அடுத்தடுத்து தாக்கும் காலாட் படைகள் போன்று கரைநோக்கிப் பயணம் செய்பவை. கடல் அடித்தளத்தில் எழும் நில நடுக்கத்தால் பெரும்பான்மையான சுனாமிகள் பிறக்கின்றன. சிறுபான்மையான சுனாமிகள் கடல்மடியில் வெடிக்கும் எரிமலைக் கிளர்ச்சியாலும் அல்லது மலையினின்றும் நழுவும் நிலச்சரிவாலும் நேர்ந்திடலாம். வெகு வெகு அபூர்வமாக விண்கற்கள் அண்ட வெளியிலிருந்து புவியீர்ப்பு மண்டலத்தால் இழுக்கப்பட்டுக் கடல்மீதில் விழுந்தால், மனிதர் கற்பனை செய்ய முடியாத பிரளயப் பேரழிவுகள் நிகழும்! கடல் நெடுவே ஓரிடத்தில் பிறக்கும் சுனாமியின் அலை வட்டங்கள் அடுக்கடுக்காய் எழுந்து கடற்பரப்பு முழுவதிலும் பரவுகின்றன. உதாரணமாக 1960 இல் தென்னமெரிக்காவின் சில்லி நாட்டருகில் ஏற்பட்ட பூகம்பத்தால் சுனாமி அலைகள் பசிபிக்கடல் முழுவதும் பரவி, ஜப்பான் நாடு வரைப் பயணம் செய்தன!

சுனாமி கடல்மடியில் எப்படி உண்டாகிறது ?

இந்து மாகடலில் தற்போது நிகழ்ந்ததுபோல் கடல் அடித்தளத்தில் எழும் பூகம்பத்தால், சுனாமி உண்டாகலாம். மாபெரும் நிலச்சரிவுகள் ஏற்பட்டுக் கடலுக்குள் வீழும் போது, சுனாமி உருவாகலாம். கடல் அடியே எரிமலை வெடித்தால், சுனாமி அலைகள் ஏற்படலாம். அல்லது அண்ட வெளியிலிருந்து தவறி புவிஈர்ப்பில் இழுக்கப்பட்ட விண்கற்கள் [Meteorites] கடலில் விழுந்தால், மாபெரும் சுனாமி அசுர வடிவில் உதயமாகலாம். சுனாமி என்னும் ஜப்பானியச் சொல்லுக்குத் துறைமுகத்தைத் தாக்கும் அலை என்று பொருள். கரையை நோக்கி வலுவாய்த் தாக்கும் அலைமதில் என்று தமிழில் பொருள் கூறலாம்.

1. தோன்றும் காலத்தில் வெங்காயத் தோல் போன்று அடுக்கடுக்காய் உருண்டு வேறான இரண்டு தட்டுகளில் [Tectonic Plates] ஒன்று பூமிக்கடியில் கீழே சரியும் போது, மற்றொன்றை மேலே தள்ளுகிறது. அவ்விதப் பேரதிர்வு நிகழ்ச்சி கடலுக்கடியில் ஏற்படும் போது, கொந்தளிப்பு ஏற்பட்டு மாபெரும் கடல்தூண் மேலே செஙுத்தாய்த் துள்ளி எழும்புகிறது. நீரில் கல்லைப் போட்டால், வட்ட அலைகள் கிளம்புவது போல், கடல்தூண்கள் ஏகமைய வட்டங்களில் [Pillars of Concentric Circles] அடுக்காக எழுகின்றன!

2. கடலில் 20,000 அடிகளுக்குக் கீழ், மணிக்கு 400 மைல் வேகத்தில் [700 கி.மீ] கிளம்பும் சுனாமி காட்சிக்குப் புலப்படுவது அரிது. கடல் நடுவே நீண்ட அலையாகப் பயணம் செய்யும் சுனாமி, கரையை நெருங்க நெருங்க அதன் வேகம் குறைகிறது! வேகம் குறையக் குறைய சுனாமியின் அலை உயரம் மிகையாகி 120 அடி வரை [10 அடுக்கு மாளிகை உயரம்] உயர்ந்து நாகம்போல் படமெடுக்கலாம்! கரைநோக்கிப் பயணம் செய்யும் சுனாமி, தாக்குவதற்கு முன்பு பாம்புபோல் சீறிக் கொண்டு ஒருவித பயங்கர ஓலமிட்டு உறுமிக் கொண்டு முன்னே பாய்கிறது! யானை, சிங்கம், புலி, சிறுத்தை, நரி போன்ற காட்டு விலங்கினங்கள் இவ்வோசை அல்லது பூதள அதிர்வுகளை உணர்ந்து, சுனாமி தாக்கும் முன்பே எதிர்த்திசையில் தப்பி ஓடி விடிகின்றன!

3. கரையை அண்டி முன்னோக்கி அலைமதில் பாய்வதற்கு முன்பு, வலுவான அடியோட்டம் [Strong Under-current] ஏற்பட்டு, 25 நிமிடங்களுக்குக் கரை நீர்வெள்ளம் உள்ளிழுக்கப் படுகிறது! கரையைத் தாக்கும் போது, தலையை உயர்த்தி அழுத்த வலுவுடன் அடிக்கிறது!

4. சுனாமி கரையில் தாக்கும் போது, மாபெரும் ஆற்று வெள்ளம்போல் ஓங்கி அடித்து வீடுகளையும், வாகனங்களையும், மரங்களையும், எதிர்ப்படும் அனைத்தையும் தகர்த்துத் துண்டு துண்டாக்கி விடுகிறது!

5. கரையில் சுனாமியின் வலு முழுதும் தீர்ந்தபின், கடல் வெள்ளம் திரும்பிக் கடல்நோக்கிப் பின்வாங்குகிறது!

பூகம்ப அரக்கியின் தீ வளையம்!

பூகம்ப அரக்கியின் கழுத்தணியான ‘தீ வளையத்தில் ‘ [Ring of Fire] உள்ள ஓரு நாடு, இந்தோனேசியா! அடிக்கடி பூகம்பங்கள் அதன் தீவுகளில் நேர்ந்து, மக்கள் பாதிக்கப்படுவது புதிதான தகவல் அன்று. ஆனால் தற்போது சுமாத்திரா தீவுக்கருகில் நிகழ்ந்துள்ள நில நடுக்கத்தால் கடல்மீது சுனாமி தூண்டப்பட்டு அலைமதில் வட்டங்கள் அடுக்கடுக்காகக் கிளம்பி பனிரெண்டு நாடுகளைப் பாதித்தது, தெற்காசியக் கடலில் நூறாண்டுகளுக்குப் பிறகு நேர்ந்த முதல் நிகழ்ச்சியாகக் கருதப்படுகிறது! சுமாத்திராவின் வடமேற்குப் பகுதி எப்போதும் தீவிர பூதளக் கொந்தளிப்புகள் மிக்க அரங்குகளில் ஒன்று! மணிக்கு 500 மைல் வேகத்தில் [800 கி.மீ] பயணம் செய்து, சில பகுதிகளில் 30 அடி உயரத்துக்குத் தாவிய சுனாமியின் பேரளவைக் கணித்துப் பார்க்கும் போது, சுமாத்திராவின் வடமேற்குப் பகுதியின் கடற் தளத்தில் சுமார் 100 மைல் [180 கி.மீ] நீட்சிக்கு கடலின் அடித்தளத் தட்டுகள், பூகம்பத்தால் முறிந்துபோய் இருக்க வேண்டும் என்று அனுமானிக்கப் படுகிறது!