அனுபவம்

ஜெயந்தி சங்கர்

நேற்றையும் நாளையும் மறந்து

இன்றை மட்டும் முழுதாய் நம்பி

மலையையும் மடுவையும்

காற்றையும் கடலையும்

கவனிக்காது விட்ட

புல்லையும் புள்ளையும்

பூண்டையும் பூவையும்

மொட்டையும் மரத்தையும்

புதரையும் உயிரினங்கள்

அனைத்தையும் உணர்ந்து கலந்திட

அடிக்காமல் அழுது,

வலிக்காமல் தவழ

தள்ளாடாமல் நடந்து ,

திக்காமல் பேசிட

கிறுக்காமல் எழுதி,

இமைக்காமல் வியந்திட

களவையும் கற்று பின்

மறக்காமல் மறந்திட

மழையில் நனைந்து,

பின் ஒழுகும் மூக்கைச் சிந்தி

அம்மா கொடுக்கும்

கஷாயத்தை முகர்ந்து

பின் மூக்கைப்பிடித்து

மடக்கென விழுங்கிட

உடன் பிறந்தவனுடன் போட்டியிட்டு,

உறவையும் மறந்து ஜெயித்திட

உற்ற தோழனுடன் பிணங்கி,

பின் முற்றிலும் மறந்து சேர்ந்திட

தமிழிலக்கணமும் முழுமையாய் அறிந்து,

அறிவில் சிறந்திட

தேர்வில் மற்றவர் வியக்க,

முதல் மாணவனாய் தேர்ந்திட

தேசிய சேவை ஆற்ற,

அச்சத்தை உதறிச்சென்று

சோம்பலை சட்டையாய் அகற்றி,

உடலுரமும் பெற்று

பல்கலைக்கழகம் சென்று,

பாங்காய் பட்டமும் பெற்று

வேலையொன்றில் அமர,

அதிலும் நற்பெயர் ஈட்டி

கல்யாணம் முடித்து,

குழப்பமில்லாமல் குடும்பம் நடத்தி

பெற்ற குழந்தைகள் வளர்ப்பில் சிறந்து

முதுமையை முதிர்ச்சியுடன் வரவேற்று

பயமின்றி மகிழ்வுடன்

மரணத்தைத் தழுவிட

வேண்டும் இன்னுமொரு பிறவி

மானிடனாய் எனக்கும்

முன் அனுபவம் உண்டே எனக்குத் தான்!

sankari01sg@hotmail.com

sankari01sg@yahoo.com

sankari01sg@sify.com

****