திண்ணை

சத்தி சக்திதாசன்

பள்ளி செல்ல வழியின்றி தவிக்கும் சிறுவனவன்
துள்ளித் திரியும் வயதில் சுண்டல் விற்கும் நிலை
கல்வியின் மதிப்பு அறியா மனிதர் கடித்துத் துப்பும்
கடலைக்காக காத்து நிற்கும் ஏழைக் கூட்டம் ஒன்று
நிதியமைச்சர் வீட்டு விருந்தின் பின் வீசியெறியும் எச்சில் இலையின்
பொருளாதாரத்தில் வாழ்க்கை நடத்தும் கூட்டமொன்று
படிக்கும் மாணவரின் எதிர்காலத்தை சிதைத்து போதை மருந்தை
பணமாய் மாற்றும் நயவஞ்சகரின் கூட்டமொன்று
காதல் பேசி கலர் கலராய் கனவுகள் காட்டி பின்னர்
கசக்கி எறிந்துவிட்டு கை வீசி நடக்கும் இதயமற்றோர் கூட்டமொன்று
இதுதான் எமது நாகரீக உலகமென்றால் எனக்கு
இனியும் ஒரு பிறப்பு உண்டென்றால் இறைவா
மனிதனாய் பிறக்கும் வரம் மட்டும் வேண்டாம் என்றும்
மனதினில் நன்றியைச் சுமக்கும் நாயாய் என்னைப் படைத்து விடு.

sathnel.sakthithasan@bt.com