திண்ணை

யூசுப் ராவுத்தர் ரஜித்

ஆதலால் நோன்பு நோற்போம்

மனிதனைக் கழுவும்
புனித நீருடன் இதோ
புறப்பட்டு விட்டது ரமலான்
ஆதலால் நோன்பு நோற்போம்
* * *
ஆதமுக்குள் ஊதிய
ஆக்ஸிஜன்தான் – இன்று
அனைவருக்குள்ளும் துடிக்கிறது
அந்தக் கருவை அறியும்
அருமைச் சாவிதான் நோன்பு
ஆதலால் நோன்பு நோற்போம்
* * *
அருமை நபியின்
பெருமை பேசி
விரிந்த கடலென
விரியும் பரம்பரையில்
ஆயிரத்துஐநூறாம் ஆண்டில் நாம்
ஆதலால் நோன்பு நோற்போம்
* * *
‘தவமும் தபசுமே
விழிகளாய் வாழ்ந்தால்
சொர்க்கபுரி உங்களின்
சொந்தபுரி’ என்றார் நபி பெருமான்
தவம்தான் தொழுகை
தபசுதான் நோன்பு
ஆதலால் நோன்பு நோற்போம்
* * *
வெள்ளமாம் செல்வத்தை
தரிசுக்கு இறைத்து
தருமம் செய்யச் சொல்லும்
அந்தக் கருணை அருமை
ஆதலால் நோன்பு நோற்போம்
* * *
உண்ணும் தொழிலில்
ஆண்டு முழுதும்
ஆடுகளாய் வாழும் நாம்
ஒரே ஒரு மாதம்
குட்டி ஒட்டகமாய்
வாழ்ந்தா லென்ன?
இனி
இரவில் மட்டும்தான்
இரைப்பைக்கு வேலை
நபி மொழியும்
நான்மறையுமே
பகல் உணவு
ஆதலால் நோன்பு நோற்போம்

யூசுப் ராவுத்தர் ரஜித்