திண்ணை

தமிழ்மணவாளன்

வெறிச்சிட்டுச் சிவந்து அனாதரவாய்த் தொங்கும்
அந்தியின் வெறுமை கவிழ
சந்தித்த போது
மெல்ல மெல்ல சொற்களைக் கொண்டும்
காற்றுக் குமிழ் வெளியேற
நிரப்புதலைச் சாத்தியமாக்கும் மெலிய
புன்னகையோடும்
தொடர்ந்த பேச்சில்
தளர்ந்த இறுக்கம்
இட்டுச்சென்ற பிரதேசங்கள் அதற்கு முன்
கண்டிராதவை
பூக்களின் மலர்ச்சியில் மணந்து
நுரைபொங்கிப் பெருகியோடும் ஆறென
எல்லாவற்றையும்
பறிமாறிக்கொள்ள யத்தனித்த
வார்த்தைகளால் ஆன
புனிதப்படுத்தப்பட்ட உரையாடலில்
நேற்றிரவெல்லாம் நீயென்னுடன் இருந்ததைச்
சொல்லாமலே
வெளியேறிப்போகிறது கனவு

–தமிழ்மணவாளன்

tamilmanavalan@yahoo.co.in