திண்ணை

சத்தி சக்திதாசன்

புனிதமான பிறந்தநாள்
புண்ணியராம்
ஏசுநாதர் புவியினிலே
உதித்தநாள்

பாவியரை இரட்சிக்க
பரமன் எடுத்த
மானிடத்தோற்றம்
மண்ணுயிர்களனைத்திற்கும்
நேயத்தின் சிறைப்பை
போதிக்கும்நாள்

தன்னைப்போல் பிறரையும்
நேசி பவித்திரமாய்
காவியநாயகன் தோழர்களுக்கு
கருத்தியம்பினான்

மண்ணின் உயிர்களின்
பாபங்களைத் தான்
சுமந்து
தியாகத்தின் உண்மை
விளக்கத்தை
உலகுக்களித்தான்

சிலுவையிலேறி உடலினில்
குருதி ஆறாய் ஓடியும்
அறியாமல் இவர்தம்
புரியும்
தவறுகளை மன்னீப்பீரே
என
இயற்கையைச் சுழற்றும்
இறைவனை வேண்டி
பொறுமையின் பிறப்பிடம்
ஏசுவின் உறைவிடம்
எனும் கருத்து
எல்லோர் மனங்களிலும்
ஏற்றியவன்

நத்தார் தினத்திலே
நம் மனங்களில்
என்னவொரு எண்ணம்
கொள்ளப் போகின்றோம் ?

சிரிப்பை ஆயுதமாய்க்கொண்டு,
அழுபவர் வாழ்க்கையில் ஓர்
சிறியதொரு மாற்றத்தை
ஏற்படுத்தி
மானுடநேயத்தை வாழவைப்பதன்
மூலம் இந்த
மாபெரும் ஞானியின்
பிறப்பை நன்றே
பெருமைப்படுத்துவோம்

ஒரு கன்னத்தில் அடித்தால்
மறுகன்னத்தைக் காட்டு
எனும் பொறுமையை விளக்கிய
தேவமைந்தனின் கூற்று
ஏழை மக்களை தொடர்ந்து
அமுக்குவது எனும்
பிழையான பேராசைக்கு
மேற்கோள் அல்ல
என்பதைக்கூறி
அனைவரும் ஒன்றாய்
சேவைகள் செய்வோம்.

மக்களுல் ஒருவனாய் வாழ்ந்து
அதே மக்களுக்காய்
சிலுவையைச் சுமந்த
கர்த்தர் புகட்டிய அருமைக்
கருத்தை வேதமாய்க் கொண்டு
மற்றையோருக்காய் வாழ
முடியாவிட்டாலும்
மற்றையோரொடு சேர்ந்து
வாழ்ந்து
மனிதசமுதாய மேம்பாட்டுக்காக
என்றுமே உழைப்போம்.