சரி

This entry is part of 31 in the series 20061214_Issue

ரஜித்


தேவகி வீட்டுத் தேவைக்கு
மோதிரம்தான் கௌரவம்

சரி போடுவோம்

மல்லிப்பூவாய் தோடுகள்
மரைகள் கரைந்து
மல்லிப்பூக் காம்பாய் திருகுகள்
மாற்றவேண்டும் உடனே

சரி மாற்றுவோம்

சுருட்டி வலிக்கிறது வயிறு
சாரா டாக்டர் பார்த்தால்தான்
சரியாகும் ஆ அம்மா

சரி கிளம்பு

வழுக்கி வழுக்கிப் போகிறது
கிழமாகிப்போன செருப்பு
வேறொன்று

சரி நாளை

வெள்ளை ரோஜா சரி
வேம்பும் துளசியும் வேண்டும் எனக்கு

சரி வாங்குவோம்

எல்லா இடமும்
எண்ணெய்ப் பிசுக்காய் அழுக்கு
நான் மட்டும் கழுவினால் ரணம்
நாலு கை சேர்ந்தால் சுகம்

சரி சேர்கிறேன்

தொட்டுப் பேசுகிறாள் அவள்
சொட்டு அமிலம் ஈரலை எரிக்கிறது
விட்டுவிடுங்கள்
வேண்டாம் அந்த நட்பு

சரி இப்பொழுதே

இரண்டே எழுத்து ‘சரி’
இதைச் சொல்லாததால்
இரண்டாகின்றன
எத்தனையோ குடும்பங்கள்


Series Navigation