திண்ணை

பொதுவுடைமை

பொதுவாக ஒரு கட்டுரையின் சாராம்சம் அதன் தலைப்பில் விளங்கும், செய்தித்தாள்களில் வெளிவரும் செய்திக் கட்டுரைகளுக்கும் இது பொருந்தும். அதற்கு நேர்மாறாக, கடந்த வாரம் சிங்கை தமிழ்ப் பத்திரிக்கையில் வெளிவந்த அந்த தலைப்பினால் நெஞ்சங்கள் பல நெருடலுக்குள்ளானது .

பெருமைக்குரிய, இந்திய ராணுவத்தால் நடத்தப்படும் ஒரு சிறந்த அமைப்பான சத்பாவனாவை ( Operation SADBAVANA ) பற்றிய செய்தியின் தலைப்பே அத்தகைய நெருடலுக்கு வித்திட்டது. ‘வேலையில்லாதோருக்கு மாடு மேய்க்கப் பயிற்சி ‘ என்பதே அதன் தலைப்பாக வெளிவந்தது .

சத்பாவனா என்பது இந்திய ராணுவத்தால் தொடங்கப்பட்ட ஓர் அமைப்பு. வேலையில்லாப் பிரச்சினையால் இளையர்கள் வழிமாறி, தீவிரவாதத்தில் ஈடுபடாமல் இருக்க தொடங்கப்பட்ட அமைப்பே இந்த சத்பாவனா . இவ்வமைப்பு பல சமூகப்பணிகளில் தன்னை ஈடுபடுத்திக் கொண்டுள்ளது . 2006ல் காஷ்மீரில் உள்ள ஒரு கிராமத்தில் இளையர்களுக்கு தகவல் தொழில்நுட்பத்தில்( IT )பயிற்சி அளித்து துறை சார்ந்த வேலையையும் வாங்கிக்கொடுத்தது . கிராமப்புரங்களில் மருத்துவ முகாம்கள் அமைத்து ஏழை, எளியவர்களுக்கு மருத்துவ சிகிச்சை அளித்தல் போன்ற செயல்களையும் இவ்வமைப்பு தொடர்ந்து செய்துவருகிறது.

அத்தகைய வரிசையில் கடந்த வாரம், ஜம்மு – காஷ்மீரின் ரியாசி எனும் இடத்தில் உள்ள கால்நடை மருத்துவமனை வளாகத்தில், கால்நடைத் துறையைச் சார்ந்த வல்லுனர்களால், 30 வேலையில்லாத இளையர்களுக்கு பால்பண்ணை வைப்பதற்கான பயிற்சி நடத்தப்பட்டது. இப்பயிற்சியின் முடிவில் மாநில கால்நடைத்துறையினரால், பயிற்சி பட்டரையில் பயின்றவர் களுக்கு சான்றிதழும் , வங்கியில் சுயதொழில் அடிப்படையில், குறைந்த வட்டி விகிதத்தில் கடனுதவியும் வழங்க ஏற்பாடு செய்கிறது. இத்தகைய பணிகளின் மூலம் தீவிரவாதத்தில் ஈடுபடுத்தப்படும் இளையர்களைத் தடுக்கலாம் என்றார் இதை தொடங்கிவைத்த திரு .பிராகடியார் குளீரா எனும் உயர் ராணுவ அதிகாரி .

இத்தகைய உன்னதச் செயலைச் செய்துகொண்டிருக்கும் அந்த அமைப்பைப் பற்றிய தலைப்பே உணர்வுள்ள நெஞ்சங்களை நெருடலாக்கியது . உண்மையில் மாடு மேய்க்கவும் ஒரு பயிற்சி வேண்டும் என்பது எனது தனிப்பட்ட கருத்து . உள்ளே உரைக்கப்பட்டச் செய்திகள் சரியாக இருப்பினும் அதன் தலைப்பு எள்ளி நகையாடுவது போல உள்ளது. இதுபோன்ற சிறந்த அமைப்பை பாராட்டாவிடினும் , இகழாமல் இருப்பதே சாலச் சிறந்தது. யாஹூ(Yahoo)போன்ற இணைய இதள்களில் சிறப்பான தலைப்பில் இதேச் செய்தி வெளியிடப்பட்டுள்ளது.அதன் இணையமுகவரி

http://in.news.yahoo.com/071017/20/6m1k3.html

இளையர்கள் வழிமாறிப்போகாமால் தடுக்கும் இத்தகைய அமைப்பை நடத்தும் இந்திய ராணுவத்திற்கு , இத்தருணத்தில் நெஞ்சார்ந்த நன்றியையும் ,அதை எள்ளி நகையாடியவர்களுக்கு கடும் கண்டனத்தையும் நெருடிய நெஞ்சங்கள் சார்பாகத் தெரிவித்து கொள்வது.

நெருடலுடன்,

பொதுவுடைமை (podhuvudamai@yahoo.co.in