மதிவழி படைப்பு திட்டத்தை மறுக்கும் டார்வினியம் – பகுதி 1

This entry is part of 48 in the series 20060203_Issue

டேனியல் டெனெட் (தமிழில்: ஆசாரகீனன்)


(மதிவழி படைப்புத் திட்டம்1 மறுபடியும் அமெரிக்காவில் தலைப்புச் செய்தியாகியுள்ளது. ஆனால், இதில் என்ன கவர்ச்சி ? படைப்புவாதத்திற்கு2 உள்ள கவர்ச்சி, மதம் எப்படி டார்வினிய சிந்தனைகளுக்கு இரையாயிற்று, மதவழி அமெரிக்க வலதுசாரிகளின் சமூகப் பொறுப்பின்மை ஆகியவை பற்றி பரிணாம தத்துவவியலாளர் டேனியல் டெனெட் ஸ்பீகல் பத்திரிகையிடம் பேசுகிறார்.

டார்வியனியத்தை மிகுந்த ஊக்கத்துடன் ஆதரிப்பவர்களில் ஒருவர் டேனியல் டெனெட். அமெரிக்காவில், மாஸச்சூஸெட்ஸ் மாநிலத்தின் பாஸ்டன் மாநகரில் இருக்கும் டஃப்ட்ஸ் பல்கலைக்கழகத்தில் தத்துவப் பேராசிரியராகப் பணிபுரியும் இவர் மனிதர்களையும், மனித ஆன்மாவையும், பண்பாட்டையும் மூலமுதல் ஆழியின்3 இயற்கை விளைபொருளாக விவரிக்கிறார். நியூயார்க் வைகிங் பதிப்பக வெளியீடாக வரும் பிப்ரவரி மாதம் வர இருக்கும், ‘மாயை விலக்கு ‘ அல்லது ‘வசிய தகர்ப்பு ‘4 என்ற புத்தகத்தில், 63 வயதுக்காரரான டெனெட், தீவிரவாத மதங்கள் ஏன் அவ்வளவு வெற்றி பெறுகின்றன என்பதனை பரிணாமப் பார்வை கொண்டு விளக்கியுள்ளார்.)

ஸ்பீகல்: பேராசிரியர் டெனெட் அவர்களே, கடவுள் சுமார் பத்தாயிரம் வருடங்களுக்கு முன்பு ஆதாமை சேற்றிலிருந்தும், ஏவாளை ஆதாமின் விலா எலும்பிலிருந்தும் படைத்தார் என்று 12-கோடிக்கும் மேற்பட்ட அமெரிக்கர்கள் நம்புகிறார்கள். இந்த 12 கோடி பேர்களில் யாரையாவது உங்களுக்குத் தனிப்பட்ட முறையில் தெரியுமா ?

டெனெட்: ஆம். ஆனால் படைப்புத் தத்துவவாதிகள் எவரும் பொதுவாக அதைப் பற்றி பேச விரும்புவதில்லை. ஆனால் மதிவழி படைப்புத் திட்டம் மீது உண்மையான ஆர்வமுள்ளவர்களோ அதைப் பற்றி முடிவே இல்லாமல் பேசித் தீர்க்கிறார்கள். எனக்குத் தெரிந்து அவர்களிடம் தவறான தகவல்களே நிறைந்துள்ளன. ஆனால் அவர்கள் மிகவும் நம்பகக்கூடியதாகத் தோன்றும் ஊடகங்களிலிருந்தே இந்தத் தவறான தகவல்களைப் பெறுகின்றனர். இதை ஏதோ அவர்களுக்கு அவர்களுடைய மதபோதகர்5 மட்டுமே சொல்கிறார் என்பதில்லை. அவர்கள் வெளியிலிருந்து பிரபல பதிப்பாளர்களால் வெளியிடப்படும் புத்தகங்களை வாங்குகிறார்கள். அல்லது, மதவழி வலதுசாரிகளின் நிதி உதவியால் சியாடில் நகரிலிருந்து நடத்தப்படும் டிஸ்கவரி நிறுவனம்6 இணைய தளங்களில் தந்திரமாகச் செய்யும் பிரச்சாரத்தை நாடுகிறார்கள்.

ஸ்பீகல்: இந்த விவாதத்தின் மையமாக இருப்பது பரிணாமக் கோட்பாடே. அறிவியலின் பிற கோட்பாடுகளான பெருவெடிப்பு7 அல்லது குவாண்ட இயக்கவியல்8 போன்றவற்றை விட பரிணாம வாதமே அதிக எதிர்ப்புக்கு உள்ளாவது போலத் தெரிவது ஏன் ?

டெனெட்: கடந்த சில நூறாண்டுகளில் நடந்த அறிவியல் கண்டுபிடிப்புகளில், மிகவும் மனதை உறுத்தும் கண்டுபிடிப்பாக இருப்பது பரிணாம வாதமே என்று நான் நினைக்கிறேன். நம்மிடம் இருப்பனவவற்றுள் மிகப் பழமையான – நம் [மனித] இனத்துக்கு முந்தியதாகவே இருந்திருக்கக் கூடிய – கருத்து ஒன்றை அது மறுக்கிறது.

ஸ்பீகல்: அது என்ன, துல்லியமாகச் சொல்ல முடியுமா ?

டெனெட்: பெரிய, சிக்கலான, திறம் மிகுந்த அறிவால்தான் மற்றொரு குறைநிலைப் பொருளை9 உருவாக்க முடியும் என்ற கருத்தே அது. நான் இதைச் சொட்டுச் சொட்டாக கீழ் வடியும் படைப்புக் கோட்பாடு10 என்று சொல்கிறேன். ஒரு வேல் கம்பு11 அதன் தயாரிப்பாளரை உருவாக்குவதை என்றுமே உங்களால் காணமுடியாது. ஒரு குதிரை லாடம் ஒரு கொல்லரை12 உருவாக்குவதை ஒருபோதும் உங்களால் பார்க்க முடியாது. ஒரு பானை குயவரை உருவாக்குவதை தவறிக் கூட உங்களால் பார்க்க முடியாது. இதெல்லாம் எப்போதுமே எதிர் போக்காகவே செல்வன, இது அவ்வளவு வெள்ளிடை மலையாக இருப்பதால் இந்தக் கோட்பாடு மேல் பார்வைக்கு அறிவார்ந்ததாகவே தெரியும்.

ஸ்பீகல்: மனிதக் குரங்குகளிடமே கூட இந்தக் கருத்து நிலவியதாக நீங்கள் கருதுகிறீர்களா ?

டெனெட்: ஒரு வேளை, 2 மிலியன் வருடங்களுக்கு முன்பே கற்கருவிகளை உருவாக்கத் தொடங்கிய கைவினைஞனான ஹோமோ ஹாபிலஸ் எனப்படும் ஆதிமனிதனிடம் இருந்திருக்கலாம். தம் கைவினைப் பொருட்களை விடத் தாங்கள் மிகவும் சிறப்பாக இருப்பதான உணர்வை அவர்கள் கொண்டிருந்தனர். ஆகவே படைப்பவர் ஒருவர் – தான் படைக்கும் பொருட்களை விட சிறந்தவராக இருக்கிறார் என்னும் கருத்து, ஆழ்ந்த உள்ளுணர்வு சார்ந்த ஒன்று என்றே நான் கருதுகிறேன். ‘கொத்தனார் இல்லாத கட்டிடம் ஒன்றையோ, ஓவியர் தீட்டாத ஓவியம் ஒன்றையோ நீங்கள் எப்போதாவது பார்த்ததுண்டா ‘ என்று மதிவழி படைப்புத் திட்டம் என்னும் கருத்தை முன்னெடுத்து வைப்பவர்கள் கேட்கும்போது, அவர்கள் இதே கருத்தையே சொல்கிறார்கள். எந்த ஒரு வடிவமைப்பும் [படைப்பும்] இலவசமாகக் கிடைப்பதில்லை [தானாக உருவாவதில்லை] என்ற ஆழ்ந்த உள்ளுணர்வு சார்ந்த கருத்தை அது துல்லியமாக ஏற்படுத்துகிறது.

ஸ்பீகல்: ஒரு பழைய இறையியல் வாதம்13

டெனெட்: … அதை டார்வின் தன்னுடைய இயற்கைத் தெரிவு கோட்பாட்டைக்14 கொண்டு கடுமையாக மறுக்கிறார். அது கிடக்கட்டும், வடிவமைக்கப்படாத பொருட்களிலிருந்து உங்களால் வடிவமைப்பைப் பெற முடியும் என்பதோடு மட்டுமல்லாமல், அந்த வடிவமைப்பின்மை15-யிலிருந்து வடிவமைப்பாளர்களின் பரிணாம வளர்ச்சியையும் உங்களால் பெற முடியும் என்று கூடக் காட்டுகிறார். [இந்தப் போக்கின் ஒரு கட்டத்தில்] நம் கையில் எஞ்சி நிற்பவை – [புத்தக] ஆசிரியர்கள், கவிஞர்கள், கலைஞர்கள், பொறியாளர்கள், பிற பொருட்களை வடிவமைப்பவர்கள், பிற படைப்பாளிகள் — போன்ற வாழ்க்கை என்ற விருட்சத்தின் புதிய கனிகளே. வாழ்க்கைக்கே அர்த்தமுண்டு என்று மனிதர் இயல்பாகக் கருதிப் போவதை இது கேள்விக்கு உள்ளாக்குகிறது.

ஸ்பீகல்: மனிதத்தன்மையே — அவனுடைய ஆன்மாவே — இப்படித்தானே உருவாக்கப்படுகிறது ?

டெனெட்: ஆம். பல-உயிரணுக்களால்16 ஆன, நடமாடும் உயிரின் வடிவாக இருக்கும் உங்களுக்கு மனம் என்பது தேவைப்படுகிறது. ஏனென்றால், எங்கே போகிறோம் என்று நீங்கள் கவனித்தபடியே இருக்க வேண்டியிருக்கிறது. உலகிலிருந்து தகவல்களை விரைவாக வெளியிழுத்து, அந்தத் தகவல்களைச் சுத்திகரித்து, அதை உடனடியாகப் பயன்படுத்தி உங்கள் நடத்தையை வழி நடத்தும் நரம்பு அமைப்பு ஒன்று உங்களுக்கு அவசியம் தேவை. எல்லா விலங்குகளுக்கும் இருக்கும் ஓர் அடிப்படைப் பிரச்சினையே எப்படித் தமக்குத் தேவையானதை [தேடி] அடைவது, தமக்கு ஆபத்தானவற்றைத் தவிர்ப்பது, அவற்றை தம் எதிரிகளையும் போட்டியாளர்களையும் விட விரைவாகச் செய்வது என்பதே. டார்வின் இந்த விதியை அறிந்திருந்ததோடு, இந்த வித வளர்ச்சியானது பல நூறு மிலியன் ஆண்டுகளாக நடந்து மேலும் மேலும் இயந்திர மனிதருடையது17 போன்ற மனங்களை உருவாக்கிக் கொண்டிருக்கிறது என்றும் புரிந்து கொண்டிருந்தார்.

ஸ்பீகல்: ஆனாலும் கூட, மனிதர்கள் தோன்றிய போது வழக்கத்தை மீறிய ஏதோ ஒன்று நிகழ்ந்தது.

டெனெட்: உண்மைதான். மனிதர்கள் மொழியைக் கண்டுபிடித்தனர் — அதன் வழியே தம் மனங்களின் வல்லமையில் பெரும் வெடிப்பாகிய முடுக்கத்தை18 அடைந்தனர். ஏனெனில், இப்போது நீங்கள் உங்களுடைய சொந்த அனுபவத்திலிருந்து மட்டுமே கற்றுக் கொள்வதில்லை, இரண்டாம் கையாக மாற்றித் தரப்பட்ட19 பிறருடைய அனுபவங்களிலிருந்தும் கற்றுக் கொள்ள முடியும். நீங்கள் சந்தித்தே இராத மனிதர்களிடமிருந்தும் [கூட]. நெடுங்காலம் முன்பு இறந்த முன்னோர்களிடமிருந்தும் [கூட]. ஆக, மனிதப் பண்பாடு என்பதே கூட தீர்க்கமான பரிணாம சக்தியாக ஆகியுள்ளது. இதுவே அறிவின் ஆதாரத்தை, அறியும் முறைகளையே ஆராயும் முறையால்20 உருவாக்கப்பட்ட மிக மிகப் பெரிய ஒரு தொடுவானத்தை நமக்குத் தருகிறது. இது வேறெந்த உயிரினத்திடமும் இல்லாத ஒரு பெரும் வெளி. நாம் யார் என்பதையும், நாம் பரிணமித்துள்ளோம் என்பதையும் அறிந்த ஒரே உயிரினம் நாம் மட்டுமே. நம் பாடல்கள், கலை, புத்தகங்கள், மத நம்பிக்கைகள் ஆகிய அனைத்தும் முற்றிலுமாகப் பரிணாம வழியமைப்பு21களின் விளைபொருளே. அது சிலருக்கு மனவெழுச்சி தருவதாகவும், பிறருக்கு மனச்சோர்வு தருவதாகவும் இருக்கிறது.

ஸ்பீகல்: வேறு எதையும் விட, டிஎன்ஏ குறியீடுகளிலேயே22 பரிணாமம் மிகவும் அதிகமாகப் புலப்படுகிறது. எனினும், மதிவழி படைப்புத் திட்டத்தை நம்புபவர்களை, டார்வினின் கருத்துகளை விட டிஎன்ஏ குறியீடுகள் குறைவாகவே தொல்லை செய்கின்றன. அது ஏன் ?

டெனெட்: எனக்குத் தெரியவில்லை, ஏனென்றால், டார்வினுடைய கோட்பாட்டின் உண்மையை நிறுவ நம்மிடம் இருக்கும் மிகச் சிறந்த ஆதாரமே ஒவ்வொரு நாளும் உயிர்-தகவலியல்23 வாயிலாக நமக்குக் கிடைத்து வரும் சான்றுகளும், டிஎன்ஏ-குறியீடுகளைப் பற்றிய புரிதலும்தான். டார்வினியத்தை விமர்சிப்பவர்கள் மூலக்கூறுகளும், என்சைம்களும்24, புரதங்களுமே சிந்தனையைச் சாத்தியமாக்குகின்றன என்ற உண்மையை எதிர்கொள்ள விரும்புவதில்லை. ஆம், நமக்கு ஆன்மா இருக்கிறது. ஆனால், அது மிகச் சிறிய இயந்திரங்கள் [ரோபாட்டுகள்] பலவற்றைக் கொண்டு உருவாக்கப்பட்டுள்ளது.

ஸ்பீகல்: உயிரை உயிரியலாளர்களிடம்25 விடுவோம், ஆன்மாவை மதங்கள் கவனித்துக் கொள்ளட்டும் என்று இருப்பது சாத்தியம் என்று ஏன் நீங்கள் நினைக்கக் கூடாது ?

டெனெட்: அதைத்தான் போப் இரண்டாம் ஜான் பால் வலியுறுத்திக் கொண்டிருந்தார். அடிக்கடி உதாரணம் காட்டப்படும் (ரோமன் கத்தாலிக்கத் தலைமை குருமார்களுக்கு) அவர் அனுப்பிய ஒரு கடிதத்தில் பரிணாமம் என்பது ஒரு மெய்நிகழ்வே26 என்றாலும் மனித ஆன்மா என்பதற்கு அது பொருந்தாது என்று அவர் சொன்னார். இந்தக் கூற்றில் ஏதோ உள்ளீடு இருப்பது போலத் தோன்றலாம், ஆனால் அது பொய்யானதே. ‘நம் உடல்கள் உயிரியல் பொருட்களால் ஆனவை, ஆனால் கணையம்27 மட்டும் அப்படி அல்ல ‘ என்று சொன்னால் அது எப்படிப் பொய்யாகுமோ, அதே போன்றதே இது. [மனித] மூளை என்பதும் நுரையீரல் அல்லது ஈரல் போன்ற திசுவே28 தவிர வேறேதும் அதிசயமானது அல்ல. அதுவும் ஒரு திசுதான்.

ஸ்பீகல்: டார்வினின் கருத்துகள் இன வெறியர்களாலும், இன மேம்பாட்டியலாளர்களாலும்29 தவறாகப் பயன்படுத்தப்பட்டுள்ளன. டார்வினியம் தீவிரமாகத் தாக்கப்படுவதற்கு இதுவும் ஒரு காரணமா ?

டெனெட்: ஆம். உறுத்தாமல் இதைச் சொல்வதானால், டார்வினின் கருத்து மிகவும் சுலபமானது — நீங்கள் அதை ஒரு நிமிடத்தில் எவருக்கும் விளக்கிவிட முடியும். ஆனால், அதே காரணத்தாலேயே பகடிக்கும், தவறான பயன்படுத்தலுக்கும் அது சுலபமாக இரையாகிறது. நான் என் மாணவர்களுக்குப் பரிணாம கோட்பாட்டின் அடிப்படைகளை மிகப் பொறுமையாகச் சொல்லிக் கொடுத்தாலும், பின்னர் நான் சொன்னவற்றையே சீர்திருத்த நேர்கிறது. ஏனென்றால், அதன் மீது அவர்களுக்கு ஆர்வம் மேலோங்கி விடவே, இந்த விதமான தவறான புரிதல்களில் தொடர்ந்து சிக்கி விடுகின்றனர். டார்வினியம் என்பதோ அறிவுக்கு இனிப்பாக30 இருப்பது. அது மிகவும் சுவையானது. ஆனால், அளவுக்கு அதிகமான இனிப்பு என்பது உண்மையிலிருந்து [கவனத்தை] திசைதிருப்பக் கூடியது. இதுதான் இனவாதிகளிடமும், பாலாதிக்கவாதிகளிடமும்31 சிக்கிக் கொள்ள வழி வகுக்கிறது. ஆகவே நீங்கள் எப்போதும் ஒரு விதமான அறிவு நலம் பேணும் வழியை32 எந்நேரமும் கடைபிடிக்க வேண்டி இருக்கிறது.

ஸ்பீகல்: இப்போது, கள்ளப் பாலுறவிலிருந்து படுகொலை வரை, அனைத்தும் பரிணாமம் என்பதன் வெளிச்சத்தில் அலசப்படுவதுபோலத் தெரிகிறது. முனைப்பான ஆராய்ச்சியை வெற்றுக் கேளிக்கைகளிலிருந்து எப்படிப் பிரிப்பது ?

டெனெட்: நீங்கள் தக்க மெய்நிகழ்வுகளை மிகக் கவனமாக சேகரிப்பவராக இருப்பதோடு, அவற்றை நெறிப்படுத்துபவராகவும்33, அந்த ஒழுங்கிலிருந்து சோதனை மூலம் உறுதிப்படுத்தக்கூடிய அல்லது மறுக்கப்படக்கூடிய தேற்றம்34 ஒன்றை உருவாக்குபவராகவும் இருக்கவேண்டும். அதைத்தான் டார்வின் செய்தார்.

ஸ்பீகல்: உங்களுடன் பணிபுரியும் மைக்கெல் ரூஸ்35, நீங்கள் அறிவியல் களத்திற்கு வெளியே போய் உங்கள் கோட்பாடுகள் வாயிலாக சமூக-அறிவியலிலும், மதத்திலும் நுழைவதாகக் குற்றம் சாட்டியுள்ளார். இதன் விளைவாக, கவனமில்லாமல் நீங்கள் மதிவழி படைப்புத் திட்டத்துக்குத் துணை போவதாகவும் அவர் சொல்லியிருக்கிறார்.

டெனெட்: டார்வினின் அகதரிசனங்கள்36 சுரீரென்று சுட்டிக் காட்டுவதை சற்று மசமசப்பாக ஆக்கி37, மக்களுக்கு உறுதிப்படுத்தும் வகையில், பரிணாம உயிரியலின்38 பார்வைக்கும், மக்கள் பாரம்பரியமாகச் சிந்திக்கும் வழிகளுக்கும் இடையில் பெரிய முரண்பாடு ஏதுமில்லை என்பது போலக் காட்ட மைக்கெல் விரும்புகிறார்.

ஸ்பீகல்: நீங்கள் மதிவழி படைப்புத் திட்டத்துக்குத் துணை போவதாக சொல்லப்படும் குற்றச்சாட்டு பற்றி ?

டெனெட்: இதில் ஓரளவு உண்மை இருக்கலாம். பரிணாம உயிரியல் பார்வையில் மதத்தைப் பார்க்கும் புத்தகம் ஒன்றை நான் இப்போதுதான் எழுதி முடித்திருக்கிறேன். நீங்கள் இந்தப் பாதையில் செல்லக் கூடும், செல்ல வேண்டும், ஏன் – சென்றுதான் தீரவேண்டும் என்றே நான் நினைக்கிறேன். மற்றவர்களோ, ‘இல்லை, கையை எடு! சமூக அறிவியலுக்குப் பக்கத்தில் கூட பரிணாமத்தைக் கொணராதே ‘ என்கிறார்கள். அது மோசமான அறிவுரை என்றே நான் கருதுகிறேன். நாம் சமூக அறிவியலையும், மானுடத்தையும்39 பரிணாமச் சிந்தனை தீண்டாமல் காக்க வேண்டும் என்ற கருத்து பெரும் அழிவுக்குதான் வழி [வகுக்கும்].

ஸ்பீகல்: ஏன் ?

டெனெட்: நம்மில் எவரும் கொண்டிருந்த கருத்துகளிலேயே தலைசிறந்த கருத்துக்கான தங்கப் பதக்கத்தை நான் டார்வினுக்கே கொடுப்பேன். அர்த்தங்களாலும் குறிக்கோள்களாலும் இலக்குகளாலும் சுதந்திரத்தாலும் ஆன உலகத்தை, அறிவியல் உலகுடன், அதுவும் இயற்பொருள் அறிவியல்களுடன்40 ஒருங்கிணைப்பது அவருடைய கருத்தே. நான் சொல்வது இதுதான் – நாம் சமூக அறிவியலுக்கும் இயற்கை அறிவியலுக்கும் இடையிலுள்ள பெரும் இடைவெளி பற்றிப் பேசுகிறோம், ஆனால் அந்த இடைவெளியை நிரப்புவது எது ? டார்வின்தான் — குறிக்கோளும் படைப்புத் திட்டமும், அர்த்தங்களும் எப்படிக் குறிக்கோளின்மையிலிருந்து வெளிப்பட முடியும், அறிவற்ற பொருட்களிலிருந்தே வெளிப்பட முடியும் என்பதை நமக்குக் காட்டினார்.

(தொடரும்)

மொழிபெயர்ப்பாளர் குறிப்புகள்:

[1] Intelligent Design
[2] Creationism
[3] Primordial soup
[4] Breaking the Spell

[5] Pastor
[6] Discovery Institute www.discovery.org, Faith Based Encyclopaedia

[7] Big Bang
[8] Quantum mechanics

[9] Lesser thing
[10] trickle-down theory: A theory that financial benefits given to big business will in turn pass down to smaller businesses and consumers
[11] Spear
[12] Blacksmith

[13] Theological argument
[14] Theory of natural selection
[15] Un-design

[16] Multi-cellular
[17] Android

[18] Explosive Acceleration
[19] Vicariously
[20] Epistemological – the study or a theory of the nature and grounds of knowledge especially with reference to its limits and validity
[21] Evolutionary Algorithms

[22] DNA Code
[23] Bioinformatics: உயிர்-தகவலியல் என்ற சொல் ஓரளவு சரியானதே. ஆனால் ‘தகவலியல் ‘ என்பதில் application of Information technology to biological information என்பது வெளிப்படுகிறதா ? Bio information analysis or studies என்பதே ‘தகவலியல் ‘. Technology என்பது ‘தொழில் நுட்ப ஆய்வு ‘ அல்லது ‘தொழில் துறை அறிவியல் ‘ என்கிறது பல்கலை அகராதி. ‘உயிர்தகவல் தொழில் துறை ஆய்வியல் ‘ என்று மொழிபெயர்ப்பது பல்லை உடைக்கிறது.
[24] Enzymes

[25] Biologists
[26] Fact
[27] Pancreas
[28] Tissue

[29] Eugenicists – Eugenics: a science that deals with the improvement (as by control of human mating) of hereditary qualities of a race or breed
[30] Mind candy
[31] Sexist – Sexism: prejudice or discrimination based on sex
[32] Intellectual hygiene

[33] Marshal
[34] Hypothesis

[35] Michael Ruse
[36] Insight
[37] Soft focus
[38] Evolutionary biology

[39] Humanity

[40] Physical sciences

aacharakeen@yahoo.com

Series Navigation

ஆசாரகீனன்