திண்ணை

சக்தி சக்திதாசன்

சித்திரைப் புத்தாண்டில்
சிந்தை குளிர வாழ்த்தி
சிங்காரத் தமிழர்க்கெல்லாம்
சிறியவன் தெளிக்கும்
கவிநீர் புஷ்பங்கள்

இத்தரை மீதினில் எம்மொழி
பத்தரை மாற்றுத் தங்கமாய்
புத்தொளி வீசி வலம் வரும்
புன்னகை புரிகின்றாள் தமிழ்மகள்

இணையம் என்னும் வானிலே
இணையிலா எழிலுடன் தமிழது
இதழ்களின் வழியாய்ப் பொழியுது
ஈடற்ற சுவையுறு இலக்கியமே

தன்னகரில்லா இளஞ் சிங்கங்கள்
தன்னம்பிக்கை தளரா நெஞ்சுடன்
தமிழின் வளர்ச்சிக்காய் தொண்டுகள்
தன்னலமின்றி ஆற்றுகின்றார்

எத்தளம் தன்னிலும் தமிழன்னை
நித்திலங் குமரியாய் அழகுற
முற்றிலும் தம்மை அர்ப்பணிக்கும்
முத்தமிழ் அறிஞர் வாழ்கவே

வியர்வை சிந்திடும் தோழர்கள்
இரத்தம் சிந்திடும் வீரர்கள்
கருணை சுரந்திடும் அன்பர்கள்
கல்வி தந்திடும் அறிஞர்கள்

பால்மணம் மாறாச் சிறுவர்கள்
பார்வையால் ஈர்த்திடும் கன்னியர்
பண்பை வளர்த்திடும் அன்னைதந்தையர்
பாரினை உயர்த்திடும் பல்வேந்தர்

இத்தனை வளங்களும் கொண்ட
இனிய தாயாம் எம் தமிழன்னை
இன்றவள் கண்டாள் புதுவருடம்
இதயம் கனிய இவன் வாழ்த்துக்கள்

பாலினைச் சுவையுறும் வெல்லம் போல்
பல்மதங்களின் சேர்க்கையும் தமிழினில்
பார்ப்பதில்லை அங்கே பிரிவினை – அன்னை
பொறுக்க மாட்டாள் பாசப் பிரிவினை

நாடுகள் என்றொரு எல்லை தமிழர்
நமக்கினி வேண்டாமே புவியிலே
நலஞ்செய விரும்பும் மனிதர் நாம்
நடப்போம் கைகளை இணைத்தே

தமிழெனும் மாலையில் கோர்த்த
திசையெங்கும் கமழும் மலர்கள் நாம்
தாயவள் புகழை பரப்பியே என்றும்
தரணியில் வாழ்வதெம் கடமையே

வாழ்க ! வாழ்க ! என்னுறவுகள் வாழ்க
வரட்டும் அமைதி என் சொந்தங்கள் வாழ்வில்
வந்த இந்த தமிழ்ப் புத்தாண்டில்
வரட்டும் இனி வசந்தங்களே நம் வாழ்வில்

sathnel.sakthithasan@bt.com