திண்ணை

மீனாக்ஸ்

உனக்கு முன்பாக
அலுவலகத்திலிருந்து
வந்து விடும் நாட்களில்
உன் கஷ்டம் நினைத்து
சாதம் வடித்து
எனக்குத் தெரிந்த வகையில்
வத்தக் குழம்பும் ரசமும்
பொரியலும் செய்து வைத்து
உனக்காகக் காத்திருப்பேன்..

நீ வந்து
சமையலறையில் எட்டிப் பார்த்து,
‘எதுக்குடா கஷ்டப்படறே ?
எனக்காக ? ? ‘
என்று கேள்வியும் பதிலும்
நீயே சொல்லிப்
பூரித்துப் போவாய்..

குளித்து முடித்து
சாப்பிட உட்கார்ந்து
என் உப்புக் குறைந்த சமையலை
உன் ஆனந்தக் கண்ணீரால்
சரியாக்கிச் சாப்பிட்டு
‘நல்லாயிருக்குடா!! ‘
என்று கண்கள் பனிக்க
நீ சொல்லும் நேரத்தில்
ஆசையாய்த் தானிருக்கிறது,
வேலையை விட்டு விட்டு
வீட்டோடு கணவனாய்
இருந்து விடலாமென்று!!!

– மீனாக்ஸ்