திண்ணை

குரும்பையூர் பொன் சிவராசா

ஊரின் நினைவுகள்
சுகமாய் சுமையாய் இருப்பதனால்
என் இதயம் கனக்கும் பல வேளைகளில்
எம் ஊரின் ஒவ்வோர் நிகழ்வுகழும்
அழியாத நினைவுகளாய்
புத்தகமாய் மனதில் பதிந்திருக்கும்
நாளும் புரட்டுகின்றேன்
அப் புத்தகத்தை
புரியாத மகிழ்வொன்று
புன்சிரிப்பாய் தவழும் என் முகத்தினிலே
இப் புத்தகத்தை புரட்டியதில்
தட்டுப்பட்டதுதான் இந்த வாழை வெட்டு
மறக்க முடியா நிகழ்வுகளில்
இன்றும் மனதில் உயிர்ப்பாய் இருக்கிறது

அம்மன் கோவிலிலே
அடியார்கள் கூட்டம் அலை மோதும்
அயல் ஊரார் எல்லாம் வந்திருப்பார்
அர்ச்சனைத் தட்டுடனே
மாணிக்க ஐயாவின் பூசை
மணி ஓசையுடன்
மறக்கமுடியா நிகழ்வாய்
பார்ப்போரை மெய்மறந்து நிற்கவைக்கும்
இளைஞரெல்லாம் இளசுகளைப் பார்த்து
தம்மை மறந்தே லயித்திருப்பர்
அங்கே ஐம்புலனும் ஒடுக்கி
ஆண்டவனைக் காண்பார் பெண்களிலே
பகட்டான நகைகளும் பளபளக்கும் சாறிகளும்
தமக்குள்ளே குசு குசுப்பார் பெண்கள் எல்லாம்
வயிறெரியும் சில பேருக்கு
ஆண்டவனும் பார்த்துச் சிரித்திருப்பார்

முதல் நாள் சூரன்போரினிலே
மூர்க்கமாய் போரிட்டு
வெற்றி கொண்ட அம்மன் அவள்
திடமான எட்டுப் பேர் சுமந்து வர
இறுமாப்பாய் சென்றிடுவாள் புளியடி கோவிலுக்கே

ஒவ்வோர் சந்தியிலும்
அம்மனுக்கு ஆராதனை பூசை
அமக்களமாய் நடந்தேறும்
அங்கே படைத்திருக்கும்
அவல் சுண்டல் மோதகம் மாத்திரமே
எமை ஆட்கொள்ளும்
ஒலிம்பிக்கில் ஓடி வெற்றிகொள்ளும்
வீறுடனே நாமெல்லாம்
அவற்றிற்காய் ஏங்கி நிற்போம்
அடிபட்டு நெரிபட்டு
வளைந்து நுழைந்து வேண்டிவிட்டால்
வெற்றியின் பெருமிதம்
எமை ஆட்கொள்ளும்
ஆணவச் சிரிப்பொன்று
எம்மில் எதிரொலிக்கும்

கடகத்தில் மோதகத்தை
கொண்டு வந்தார் ஓர் கனவான்
பெரியவர்கள் பெற்றார்கள் முதலாக
உயரமானவர்கள் உசாரானார்கள்
தள்ளுப்பட்டோம் நாம் ஓர் சயிட்டாக
முட்டி மோதியது கூட்டம் அவர் மீது
அடிபட்டோம் கத்தினோம் நாமெல்லாம்
ஆண்டவனே இது என்ன சோதனை
கொட்டினார் மோதகத்தை
கோபமாய் நிலத்தினிலே
அன்றே வெறுத்தேன் நான் ஆண்டவனை

புளியடி கோவிலிலே
கம்பீரமாய் வாழை மரம்
அடிபட்டுப் போய் நிற்போம்
முன் வரிசையிலே
ஐயா வருவார் மூர்க்கமாய் வாளுடனே
வெட்டுவாரோ எம்மையுமே
நடுநடுங்கும் நமக்கெல்லாம்
இரண்டு வெட்டு வெட்டிடுவார்
மூன்று துண்டாகும் அந்த வாழையுமே
சந்தோசத்தில் மகிழ்ந்திருப்போம் நாம் எல்லாம்
அம்மனும் அமைதியடைவார் அத்துடனே

ஒற்றுமையாய் எம் ஊரார்
கொண்டாடும் வாழை வெட்டு
காத்திருப்பேன் இந்த விழாவிற்காய்
நானும் உங்களில் ஒருவனாய்
கனவுகள் பலிக்கவேண்டும்
நாமெல்லாம் மகிழவேண்டும்!

அன்புடன்
குரும்பையூர் பொன் சிவராசா