திண்ணை

ஹெச்.ஜி.ரசூல்

வெள்ளைக் கனவின் திரை
நிழல் ஓவியங்களைத் தீட்டிப் பார்க்கலாம்.
அதிகாலைச் சூரியன் சிந்தும்
ஒளிநிறங்களின் முகம் பார்த்து
எதிர்திசையில் ஒளிந்து
உட்கார்ந்திருக்கும் மழைவில்
இரவு பகலற்ற பொழுதொன்றின் உயிர்ப் பறவை
கடல் அகன்று சிப்பி வயிற்றுள் சுழலும்.
விரித்த வானத்தில் புரளும் மேகங்களில்
ரத்தத் துளிகளின் தெறிபட்டு
கசங்கலில் நீளும் அவமானம்
குழந்தையின் மனசுக்குள் கொட்டிக் குவித்த
சின்னஞ்சிறு கார்ட்டூன் பொம்மைகளின்
நிறமற்ற உருவற்ற எழுத்துக் கண்கள்
விடுபடா மெளனம் சூடிய பின்னும்
உடைபட்ட பலூன்களை ஊதிப் பார்க்கும்.
தன் நிறம் பற்றி ஏதுமறியாது
வெள்ளைக் குதிரையொன்று
திரும்பவும் பறந்து வருகிறது