சூடேறும் கோளம், மேலேறும் கடல் உஷ்ணம், உருகிடும் பனிப்பாறை, ஓஸோன் துளைகள், தாக்கிடும் இயற்கைச் சீற்றங்கள்-6

This entry is part of 31 in the series 20060728_Issue

சி. ஜெயபாரதன் B.E.(Hons) P.Eng (Nuclear) கனடா


காலமும், சூழ்வளியும்,
கடல் மட்ட ஏற்றத் தணிவும்
நீர், நிலவளத் தேய்வுகளும் சேர்ந்து,
பயிர்கள் ஏதோ
பசுமை மினுப்பில் தோன்றும்!
யந்திர வாய்கள்
புகைபிடித்து ஊதியதும்,
பச்சை நிலங்கள் எல்லாம் வெளுத்து
பாலை மணலாகும்!
காலநிலைச் சீர்பாட்டைப்
பாழாக்கும் கேடுகள் பூமியைத்
தாலாட்டு கின்றன!
பால்போன்ற பனிக் குன்றுகள் உருகிக்
கால்தடம் பதிக்கும்
பசும்புல் தளமாகி
ஆடு, மாடுகள் பசிக்கு மேயும்
காடுகளாய்
அங்கி மாற்றிக் கொண்டன!
புனித மிழந்து புதையுது,
மனித நாகரீகம்,
வெப்ப யுகப் பிரளயம்,
உப்பி வந்து!

1996 ஆம் ஆண்டில் பூமியைச் சுற்றிவரும் பூகோளத் தளநோக்கி ஏற்பாடு [Global Positioning System (GPS)] துணைக்கோள் மூலமாகக் கிரீன்லாந்தின் கிழக்குப் பகுதியில் உள்ள கான்கெர்டுலுஸாக் பனிக் குன்று [Kangerdlugssuaq Glacier] ஆண்டுக்கு 3 மைல் வீதம் [5 கி.மீ.] மிக்க விரைவாக உருகி வருகிறது என்று ஓரளவு துல்லியமாகக் கணக்கிடப் பட்டுள்ளது! 40 ஆண்டுகளாக மாறுபாடில்லாமல் நிலையாக இருந்த பனிக்குன்று 2001 ஆண்டு முதல் 3 மைல் வீதத்தில் சிறுத்து வருவதாக அறியப்படுகிறது! அந்தப் பேரளவு பனியிழப்புக் குளிர் காலத்தில் மீண்டும் பனிக்குன்றாய்ச் சேமிப்பாகி கிரீன்லாந்தில் ஈடு செய்யப்படா விட்டால், கடல் மட்டம் ஏற ஏதுவாகிறது! கிரீன்லாந்தின் நிலப்பகுதியின் உஷ்ணம் 3 டிகிரி C மிகையானால், அனைத்துப் பனித்தட்டுகளும் உருகிடலாம் என்று அஞ்சப்படுகிறது! அவ்வித உஷ்ண எழுச்சி சுமார் ஒரு நூற்றாண்டில் உண்டானால், கடல்நீர் மட்டம் 23 அடி [7 மீடர்] உயரலாம் என்று கணக்கிடப் படுகிறது! உலக நாடுகளின் 70% ஜனத்தொகை மக்கள் கடல்கரை சார்ந்த பகுதிகளில் வாழ்ந்து வருகிறார்கள்! மேலும் அமெரிக்காவில் 2005 ஆம் ஆண்டில் அடித்த கேட்ரினா ஹரிக்கேனால் கடலும், நீர் வெள்ளமும் மீறி மூழ்க்கிய நியூ ஆர்லியன்ஸ் நகரைப் போல் அகில நாடுகளின் 15 பெரிய நகரங்களில் 11 நகரங்கள் கடற்கரையில் அமைக்கப் பட்டுள்ளன!

டாக்டர் கார்டன் ஹாமில்டன் & மார்டினா குரூகர் [Dr. Gordon Hamilton & Greenpeace Expedition Leader: Martina Krueger ]

உலகத்தின் ஜனத்தொகைப் பெருக்கம் 2050 ஆம் ஆண்டில் 9.1 பில்லியனாக ஏறப் போகிறது! அதனால் எரிசக்தி, நீர்வளம், நிலவளம், உணவுத் தேவைகள் பன்மடங்கு பெருகிப் பூகோளச் சூடேற்றத்தை மிகையாக்கப் போகின்றன. 15 ஆண்டுகளில் கிலிமன்ஞாரோ சிகரத்தில் [Mount Kilimanjaro, Tanzania, Africa] பனிச்சரிவுகள் ஏதுவு மில்லாமல் காணாமல் போய்விடும்! அமெரிக்காவில் உள்ள மான்டானா தேசியப் பூங்காவின் பனிச்சரிவுகள் தெரியாமல் போய் 20 ஆண்டுகளில் வெறும் பூங்காவாக நிற்கும். சுவிட்ஸர்லாந்தில் உள்ள ரோன் பனிச்சரிவுகள் ஏறக்குறைய மறைந்து விட்டன! அண்டார்க்டிகாவின் மேற்குப் பகுதியில் பாதியளவு பனிப்பாறைகள் உருகிப் போயின! அதுபோல் கிரீன்லாந்தில் அரைப் பகுதி பனிக் குன்றுகள் கரைந்து விட்டன! நியூ ஆர்லியன்ஸ் நகரை ஏறக்குறைய கடல்நீரும், நதிநீரும் மூழ்க்கி நாசமாக்கி நகர் மாந்தரைப் புலப்பெயர்ச்சி செய்து விட்டது! வன்முறை மூர்க்கருக்கு மட்டுமா அமெரிக்கர் கவலைப் பட வேண்டும்? அந்தப் பயமுறுத்தல் ஒன்றுதானா நமது கவனத்தைக் கவர வேண்டும்? நமது நாகரீக வாழ்வும், பூகோளமும் மோதிக் கொண்டிருப்பதை மெய்யெனக் கண்டு நாம் சாட்சியம் கூறி நிற்கிறோம்.

முன்னாள் துணை ஜனாதிபதி அல் கோர்

1990 ஆண்டில் பிரென்ச், ரஷிய விஞ்ஞானிகள் அண்டார்க்டிகாவின் தென்துருவத்தில் 1.5 மைல் நீளமான பனித்தண்டைத் தோண்டி எடுத்து 400,000 ஆண்டுகளாக மீண்டும் மீண்டும் தோன்றி மாறிய நான்கு பனியுகங்களின் கரியமில வாயுவை [CO2 in Four Ice-Age Cycles] ஆய்ந்தனர். அந்தச் சோதனையில் உஷ்ணம் ஏற, ஏற கரியமில வாயுவின் கொள்ளளவு படிப்படியாகக் குறைந்து [மூன்றில் ஒரு பங்கு] வந்திருக்கிறது என்று அறியப்பட்டது. காரணம் மற்ற கிரீன்ஹவுஸ் வாயுக்கள் CO2 உடன் மாறி யிருக்க முடியும் என்று எளிதாகக் கருத வழி யிருக்கிறது. அந்த அரியக் கண்டுபிடிப்பு 1896 ஆண்டு விட்ட முன்னறிப்பை உறுதிப் படுத்தியுள்ளது.

பூகோளச் சூடேற்ற விளக்கமும் விவாதமும் [Global Warming Definitions & Debate]

ஆர்க்டிக் வட்டாரத்தைத் துணைக்கோள் கண்காணித்த உளவுகள், பூகோளச் சூடேற்றம் மெய்யானது என்று நிரூபித்ததுடன், அடுத்து வரும் 100 ஆண்டுகளில் முந்தைய காலத்தை விட 8 மடங்கு வேகத்தில் வெப்பச் சீற்றம் ஏறி வருகிறது என்றும் எடுத்துக் காட்டியுள்ளன! கடற்பனி உருகுவதால் கடல் மட்டம் உயராது. காரணம், கடற்பனிக் குன்றுகள் கடலில் மிதக்கின்றன. ஆனால் கிரீன்லாந்தின் நிலப்பகுதிப் பனிக் குன்றுகள் முழுதும் உருகினால் கடல் மட்டம் 7 மீடர் வரை [சுமார் 25 அடி] ஏறிவிடலாம் என்று அஞ்சப் படுகிறது! ஆனால் அவ்விதம் பனிக்குன்றுகள் யாவும் கிரீன்லாந்தில் உருக 1000 ஆண்டுகள் கூட ஆகலாம்!

மார்க் ஸெர்ரீஸ் [Mark Serreze, University of Colorodo]

பூகோளக் காலநிலைப் போக்கை மனிதரின் சீர்கேடான செயல்கள் மாற்றிக் கொண்டு வருகின்றன! கரியமில வாயு, மற்ற கிரீன்ஹவுஸ் வாயுக்களின் கொள்ளளவு பூமண்டலக் காற்றில் மிகையாகும் போது, பூமியின் காலநிலையில் சூடேறுகிறது! கடந்த நூற்றாண்டில் கிரீன்ஹவுஸ் வாயுக்களும், மற்ற மனிதச் செயல்களும் புரிந்த காலநிலை மாறுபாடுகளும், வருங்காலத்தில் நிகழப் போகும் எதிர்பார்ப்புகளும் மனித இனத்துக்குத் தீங்கிழைக்கப் போகும் மெய்யான பிரச்சனைகள்!

அமெரிக்கன் பூதளப் பௌதிகக் குழுவகம் [American Geophysical Union (Dec 2003]

காலநிலைச் சீர்ப்பாடுகளைப் பாழாக்குபவை எவை?

காலைப் பொழுதில் பரிதி எழுச்சி முதல் மாலைப் பொழுதில் அத்தமனமாகி நள்ளிரவுக்குப் பிறகு மீண்டும் உதயமாவது வரைச் சூழ்வெளியில் ஏற்படும் உஷ்ண, வாயு அழுத்த மாற்றங்களே வானிலை (Weather) எனப்படுவது. ஓராண்டு முதல் கூடிய காலம் முப்பது ஆண்டுகளில் சூழ்வெளியில் ஏற்படும் நான்கு காலப் பகுதி மாற்றங்கள் காலநிலை (Climate) எனப்படுவது. பல்லாண்டுகளில் ஏற்படும் உஷ்ண, அழுத்த மாறுதல், கடல்நீர் மட்ட உயர்வு ஆகியவை மிகச் சிறியதாயினும், விளைவுகளில் பெருத்த சீர்கேடுகள் உண்டாகலாம்! பூதளம் உட்கொள்ளும் பேரளவு வெப்ப ஓட்டத்தால் நேர்ந்திடும், ஒன்றுக் கொன்று தொடர்புள்ள பல்வேறு மாறுபாடுகளால் பூகோளத்தின் காலநிலைப் பாதிக்கப்படுகிறது!

1. பூகோளத்தில் பரிதியின் வெப்பத் தாக்கல்:

93 மில்லியன் மைல் பயணம் செய்யும் பரிதியின் வெப்ப சக்தி, பூகோளத்தின் வாயுக் கோளத்தை சதுர கெஜத்துக்கு 300 வாட்ஸ் வீதம் சூடாக்குகிறது! அந்த வெப்பத்தில் மூன்றிலொரு பாகம் திருப்பி விண்வெளியில் பிரதிபலிக்கிறது! மீதியான வெப்ப ஆற்றலே சூழ்மண்டலத்தின் வானிலை எஞ்சினை இயக்குகிறது!

2. சூழ்வெளியில் கிரீன்ஹவுஸ் வாயுக்கள்:

சூழ்வெளியில் பரவிச் சுற்றிவரும் வாயுக்களை [ஆக்ஸிஜென், கார்பன்டையாக்ஸைடு, நைட்ரஜன், ஓஸோன் போன்றவை] அனுதினமும் இயற்கை நுட்பமாக நிறுத்துச் சேர்த்து சராசரி உஷ்ணம் 15 டிகிரி C [60F] நிலவி வருகிறது. கிரீன்ஹவுஸ் வாயுக்களான மீதேன், கார்பன்டையாக்ஸைடு, ஸல்·பர்டையாக்ஸைடு, நைட்ரஸாக்ஸைடு, நீர்மையாவி (Water Vapour) போன்றவை சூழ்வெளியில் கலந்து, பரிதியின் வெப்பத்தை மிகையாக உட்கொண்டு அதில் ஒரு பகுதியையும் திருப்பிப் பிரதிபலிக்கிறது!

3. கடல் மட்ட உயரம், உஷ்ண ஏற்றங்கள்:

பூதளத்தில் 70 சதவீதப் பரப்பில் தங்கியுள்ள கடல் நீரே, அதன் தட்ப, வெப்பநிலைக் கேற்பவும், வாயுவின் அழுத்த, உஷ்ணநிலைக் கேற்பவும் சூழ்மண்டலத்தில் கலந்துள்ள நீர்மையாவியின் திரட்சி [Water Vapour Content] கூடிக் குறைகிறது. கடல்வெள்ளம் பேரளவு வெப்பசக்தியை விழுங்கி, பல்லாயிரம் மைல் தூரம் கடத்துகிறது! கடற்பகுதியில் ஓரிடத்தில் சூடேறும் போது, அந்தப் பரப்பின் வானில் நீராவி யாவதும், மேகங்கள் கூடுவதும் காணப்படலாம். மிகையான அளவு கரியமிலவாயுவைக் கடலில் வாழும் மீனினங்கள், நீரினங்கள் உட்கொள்கின்றன.

4. பூமியில் நீரோட்டச் சுற்றியக்கம் (Water Cycle):

வாயு மண்டலத்தின் உஷ்ணம் மிகையாகும் போது, நீர் ஆவியாக மாறும் வேகம் அதிகரிக்கும். அதே சமயத்தில் நிலத்திலும், கடலிலும் படிந்துள்ள பனிக்குன்றுகள் உருகும் வேகமும் அதிகரிக்கும். கிரீன்ஹவுஸ் வாயுக்களில் ஒன்று வலுவான நீர்மை ஆவி [Potent Water Vapour] மேகங்களை உண்டாக்குவதால், சூழ்மண்டலம் சற்று குளிர்ச்சி அடைகிறது!

5. மேக மண்டலக் கதிர்வீச்சு:

சூழ்வெளியில் உலவி வரும் மேகங்களின் நடமாட்டம் சரியாகப் புரிந்து கொள்ளப்பட வில்லை! அவை பரிதியின் வெப்பத்தைத் திருப்பி அனுப்பி ஒருபுறம் பூகோளத்தைக் குளிர்ச்சி ஆக்கியும், வாயுக் கோளத்தில் முடங்கி விட்ட நிலத்தின் வெப்பம் வீசப்பட்டு மறுபுறம் உஷ்ணத்தை மிகை ஆக்கியும் வருகிறது.

6. பனிப்பாறை, பனிப் பூக்கள் [Ice & Snow] மீது வெப்ப வீழ்ச்சி:

பளிங்கு வெண்மையாக உள்ள பனிப்பாறை, பனிப் பூக்கள் பரிதியின் வெப்பத்தை விண்வெளியில் திருப்பி அனுப்பி, பூமியைச் குளிரும்படிச் செய்கின்றன. கடல் வெப்பத்தை ஈர்த்துக் கொண்டு, கடற்பனிப் பாறைகள் உருகும். வடகோளத்தின் [Northern Hemisphere] பனிப்பாறைச் சேமிப்புகள் கடந்த 21 ஆண்டுகளாக [1998 அறிக்கை] 10 சதவீதம் உருகி விட்டன. அதே சமயத்தில் தென்கோளத்தில் [Southern Hemisphere] உள்ள அண்டார்க்டிகாவில் குறிப்பிடத் தக்க அளவு பனிப்பாறைகள் எவையும் உருகிட வில்லை!

7. நிலப்பகுதிகளில் வெப்பத்தால் மாறுதல்கள்:

பரிதியின் உஷ்ணம் பூதளத்தில் பட்டுப் பூமிக்குள் புகும்போது, வெப்பமாக மாறி பெரும்பான்மை அளவு மேலெழுகிறது. நிலத்தின் பயன்பாடும், பூகோளப் பண்பாடும் காலநிலை மாறுதலுக்குக் காரணமாகின்றன! மலைத் தொடர்களின் சிகரம் மேகங்களைத் தடுத்து, கீழ்ப்பகுதிகள் வரட்சியான நிழற் பரப்புகளாக ஆக்கப் படுகின்றன! மலைச் சரிவுகள் மழைநீரைக் கீழே வடிய விட்டு மேலும் அந்த நிலப்பகுதியையும், காற்றையும் வரட்சியாக்கி விடுகின்றன. வேனிற் பகுதிக் காடுகள் கரியமில வாயுவை நிரம்ப விழுங்கிக் கொண்டாலும், சந்தை ஆடு மாடுகள் ஆங்கு மேய ஆரம்பித்த பிறகு, அந்த நிலப்பரப்புகள் “மீதேன் வாயுவை” [Methane Gas] உற்பத்தி செய்யும் பூமியாக மாறுகிறது.

8. மாந்தர் குறுக்கீடுகள், தொழிற்துறை வெளிப் போக்குகள்:

சூழ்மண்டலத்தில் ஏற்கனவே இயற்கையாக கிரீன்ஹவுஸ் வாயுக்கள் பரவி யிருப்பினும், மனிதக் குறுக்கீடுகளும், தொழிற் துறையகப் புகைபோக்கிகளும் [CO2, SO2, NO2 etc] மேலும் வாயுக்கள் அளவை மிகுதியாக்குகின்றன. எரிசக்தி தரும் எருக்கள், நிலக்கரி போன்றை எரியும் போது, மிகையாகப் பெருகி வாயுக்களோடு சேர்வது கார்பன்டையாக்ஸைடு. கால்நடை மேய்ச்சல், நெல் விளைச்சல், நிலக்குழிகள் நிரப்பல் ஆகியவை மீதேன் வாயுவின் உற்பத்தியை அதிகமாக்கும்.

முன்னாள் துணை ஜனாதிபதி அல் கோரின் சூழ்வெளிப் பாதுகாப்புப் பணிகள்

1960 ஆண்டுகளில் கல்லூரியில் படித்து வந்த காலம் முதலே அல் கோர் சூடேறும் பூகோளத்தைப் பற்றி ஆர்வமும், வேட்கையும் மிகுந்து, அதைக் கூடியவரைத் தணிக்க வேண்டும் என்னும் குறிக்கோளை தன் வாழ்வின் நெடுங்காலப் பணியாக பின்பற்றி வருகிறார். 2006 மே மாதம் 20 ஆம் தேதி நடைபெற்ற 59 வது அகில நாட்டு வெள்ளித்திரை விழாவில் [International Film Festival] தன் கருத்தை வெளியிடும் திரைப்படம் ஒன்றைக் காட்டினார். ஆளுநர் டேவிஸ் குஜ்ஜன்ஹைம் [Director Davis Guggenheim] தயாரித்த அல் கோரின் சூடேறும் பூகோளம் பற்றியும், சூழ்வெளிக் காப்பு பற்றியும் நிகழ்ச்சிகளுடன் காட்டும் “தவிர்க்கும் வசதியில்லா உண்மை” [The Inconvenient Truth] என்னும் திரைப்படமே அது. ஆயிரம் முறை அப்படத்தை அரங்கேற்றி அல் கோர் பல்லாயிரக் கணக்கான மாந்தருக்கு அறிவுரை புகட்டி உள்ளார். வட அமெரிக்க திரையரங்குகளிலும் அப்படம் காட்டப் பட்டுள்ளது.

“மனித இனம் டிக்டிக்கென அடிக்கும் காலவெடி [Ticking Time Bomb] ஒன்றின் மீது அமர்ந்துள்ளது! உலக விஞ்ஞானிகளில் பெரும்பான்மையான பேர்கள் எச்சரிப்பது மெய்யானால், நமது பூமி முழுவதையும் பாதிக்கப் போகும் சூறாவளி, புயல், பேய்மழை, பஞ்சம், தொத்து நோய்கள், மரணமூட்டும் வெப்பக் காற்றலைகள், வரம்பற்ற வானிலைகள், காலநிலைகள் போன்று நாமிதுவரை அனுபவப்படாத பயங்கரச் சீர்கேடுகளை, முயன்றால் பத்து வருடங்களில் தவிர்க்க முடியும்!” என்று அப்படத்தில் முக்கியமாகக் கூறுகிறார் அல் கோர்.

(தொடரும்)

************************

தகவல்கள்:

Picture Credits: Time, National Geographic Magazines.

1. Time, Special Report on Global Warming [April 3, 2006]
2. Stop Thermageddon in Our Lifetime [www.thermageddon.com]
3. What is Happening to our Climate? By Samuel Matthews, National Geographic [Nov 1976]
4. The ocean An Era of Discovery National Geographic [Dec 1981]
5. Global Warming from Wikipedia.
6. Climate Change: The Human Influence Analysed By Harry N.A. Priem [Sep 15, 2000]
7. Climate Change: Projected Changes in CO2 & Climate
8. Climate Change: Sea Level Rise Due to Global Warming.
9. Is Our World Warming? By: Samuel Matthews, Senior Assistant Editor National Geographic [Oct 1990]
10 http://www.thinnai.com/sc1014051.html [Author’s Article on Katrina Damage & Evaquation]
11 Stormy Weather: Can We Link to Global Warming By: Jim Motavalli [Nov 11, 2004]
12 A Cold Hard Look at a Telltale Region Arctic By: Peter Spotts, Christian Science Monitor [Nov 18, 2004]
13 Global Warming : Definitions & Debate [http://zfacts.com/p/49print.html
14 Meltdown: Arctic Wildlife is On the Brink of Catastrophe By Steve Connor [Nov 11, 2004]
15 Discovery of Greenpeace Expedition on Greenland By: Dr. Gordon Hamilton [July 22, 2005]
16 Carbon Dioxide [CO2] & Global Warming Potential [Several Internet Reports]
17 Ecological Reports: The Data on Global Warming is Conclusive [Jan 29, 2004]
18 Third World Nears Brunt of Global Warming Impacts By: Paroma Basu [July 11, 2006]
19 Ozone Crisis, The 15 Year Evolution of a Sudden Global Emergency By: Shron L. Roan [1989]
20 Evidence for Global Warming: Degradation of Earth’s Atmosphere; Sea Level Raise; Ozone Holes; Vegetation Response By: Dr. Mitchell K. Hobish [Earth System Science]
21 Warning from Al Gore on Future, “Global Warming Called an Emergency” (June 5, 2005)
22 National Geographic: “Unlocking the Climate Puzzle [May 1998]
23 National Geographic: “Global Warming” Your Vacation May Never Be the Same, The Climate Bomg By: Jonathan Tourtellot [July-Aug 2006]
24 Macleans Magazine: Now with the Weather -Al Gore [May 22, 2006]
25 Pledge to See “An Incovenient Truth” Movie [May 27, 2006]

******************

jayabarat@tnt21.com [July 27, 2006]

Series Navigation

சி. ஜெயபாரதன், கனடா