அழைப்பிதழ்

This entry is part of 29 in the series 20021110_Issue

ஆ. மணவழகன்


என் கையெழுத்தைப் பார்த்ததும்
கண்டுபிடித்து விடுவாயோ !
சிறுமூளையின் ஏதோ ஒரு அறையில்
சிறைபட்டுக் கிடந்த நினைவுகளைச்
சிறகடிக்கச் செய்வாயோ !

பயணச்சீட்டு வாங்கிக் கொடுத்துப்
பரிச்சயம் ஆன அந்த நாள் முதல்….

படிக்கட்டில் அமர்ந்து பாடங்களையேப்
படிப்பதாய் பாவணைகள் செய்த அந்த நாள் முதல்…!

‘எனக்காக இதைச் செய்யக் கூடாதா ? ‘
என்று ஏக்கமாய்க் கேட்ட அந்த நாள் முதல்…

அந்த மழை நாளில்..
கல்லூரிப் பருவத்தின் கடைசி நேரத்தில்…
‘இன்றாவது சொல்லிவிட மாட்டாயா ?
என்ற எதிர்ப்பார்ப்புடன்…

எதார்த்தமாய்க் கைகுலுக்கி..
என்றும் போல் புன்னகைத்துப் பிரிந்த,
அந்த கடைசி நிமிடம் வரை
அத்துனையும் உன் நினைவிற்கு வருமோ !

உனக்கான விழா அழைப்பிதழை
அஞ்சல் செய்து விட்டு,
உன் இருக்கையை வெறித்தபடி நான்…!

யார் கண்டது ?

இந்நேரம் உன் இருப்பிடம் கூட
இடம் மாறி இருக்கலாம்!

********

a_manavazhahan@hotmail.com

Series Navigation