கலில் கிப்ரான் கவிதைகள் (1883-1931) << ஆத்மாவின் உபதேசம் எனக்கு >> கவிதை -22 பாகம் -7

மூலம் : ஓவியக்கவி கலில் கிப்ரான் தமிழாக்கம் : சி. ஜெயபாரதன், கனடா

“இரவின் அடர்ந்த காரிருளில் நாங்கள் ஒருவரை கூப்பிட்டுக் கொண்டு உதவிக்குக் கூக்குரல் இடுகிறோம். மரணம் தன் இறக்கைகளை எம்மீது போர்த்திக் கொண்டு அதன் இரும்புக் கரங்கள் எமது ஆத்மாக்களை பாதாளக் கொந்தளிப்பில் தள்ளுகின்றன !

இரவின் அடர்ந்த காரிருளில் மரணத்தின் கை ஓங்கி வருகிறது. அதன் பின்னால் நாங்கள் முணுமுணுப்போடு செல்கிறோம். எங்களில் யாரும் இந்த ஊழ்விதி ஊர்வலத்தை நிறுத்திட வலுவும் இல்லை. எமக்கு ஊக்கம் அளித்திட ஒரு நம்பிக்கை ஆறுதலும் இல்லை.”

கலில் கிப்ரான்
(லெபனானில் முதல் உலகப் போரின் சமயத்தில் ஏற்பட்ட பஞ்சத்தை பற்றி)

+++++++++

<< ஆத்மாவின் உபதேசம் எனக்கு >>

கவிதை -22 பாகம் -7

++++++++++++

என் உள்ளத் துடிப்பு உணர்ச்சியே
அவரது உள்ளத் துடிப்பும் !
எனது மன திருப்தியே
அவரது இதய திருப்தியும் !
எனது வாழ்க்கைப் பயணமும்
அவரது யாத்திரையை
ஒத்ததுவே !
அவர் பாபம் செய்தால்
நானும் பாபம் செய்தவன்தான் !
என் மனம் அதில்
தானும்
ஈடுபட்டுப்
பீடுடன் மகிழ்ந்திடும்
அவர் செம்மையாய் வினை
புரிந்தால் !
மென்மேலும் அவர்
முன்னேறினால்
நானும் அவருடன் உயர்வேன்
அவர் யாவரும்
முடங்கிப் போனால் நானும்
சோம்பி
அடங்கிப் போவேன் !

++++++++++++++

ஆத்மா என்னிடம் சொல்லும் :
“கையில் ஏந்திச் செல்லும்
ஒளி விளக்கு
மெய்யாய்
உன்னுடைய தில்லை !
நீ பாடும் கீதம்
உன்னிதயம் இசைத்த தில்லை !
விளக்கை நீ ஏந்தினாலும்
ஒளி இல்லையே
உன்னிடம் !
நாண்கள் முறுக்கிய
வீணையாய் நீ ஆயினும்
வீணையை
நீ மீட்பவன் இல்லை !”

++++++++++++++

போதிக்கும் என் ஆத்மா
சோதரரே !
அறிவுரை புகட்டும் அதிகமாய் !
என் ஆத்மாவும்
உனக்கு மிகையாய்க் கற்பிக்கும் !
ஏனெனில் நீயும்
நானும் ஒரே இனத்தவர் தான் !
நம்மிடையே
ஒருவித வேற்றுமை இல்லை
உன் உள்ளத்தின் உள்ளே
நீ இரகசியத்தை
ஒளித்துள்ள போது நானும்
உரக்கக் கூறுவேன்
என்னுள்ளத்தில் உள்ளதை !
ஆயினும்
உனது இரகசியத்தில்
உள்ளது
ஒருவித நேர்மையே !

*************
தகவல் :

1. The Prophet By : Kahlil Gibran, Published By : Senate (2003)

2. The Prophet By : Kahlil Gibran Published, By Wordsworth Editions Ltd. (1996)

3. Tears & Lauhgter By : Kahlil Gibran, Published, By : Castle Books (1993)

4. The Voice of The Master By : Kahlil Gibran Translated from Arabic By : Anthony Ferris (1967)

5. Thoughts & Meditations By : Kahlil Gibran Translated from Arabic By : Anthony Ferris (1968)

For further information:
The Prophet By Kahlil Gibran :

http://www.katsandogz.com/gibran.html
http://en.wikipedia.org/wiki/Khalil_Gibran

http://www.inner-growth.info/khalil_gibran_prophet/main.htm

Kahlil Gibran Art Gallery :
http://www.inner-growth.info/khalil_gibran_prophet/html/galleries/gibran_gallery1.htm

*********************
S. Jayabarathan [jayabarat@tnt21.com] (February 2, 2010)