கொசு

யூசுப் ராவுத்தர் ரஜித்

மசக்கையில்தான்
ரத்தம் தேடும் கொசுக்கள்
தனக்காக அல்ல
தன் முட்டைகளுக்கு
ஊட்டம் சேர்க்க

தாய்மையின் தவிப்பே
கொசுக்களின் கடிப்பு

ஆண் கொசுக்கள்
கடிப்பதில்லை

முட்டை விளைச்சலே
கொசுவின் வேலை
மற்றபடி
குலம் வளர்ப்பதோ
குளத்தின் வேலை

கொசுவை வாழ்த்த இதோ
ஒரு வாழ்த்துச் செய்தி

‘ஐயாயிரம் பெற்று
ஆறு மாதம் வாழுங்கள்’

கொசுக்களிலும் உண்டு
மூவாயிரம் ஜாதிகள்- ஆனாலும்
ஜாதிச் சண்டை
கொசுக்களில் இல்லை

கொசுக்களின் ஆயுதங்கள்
மலேரியா
மஞ்சள் காய்ச்சல்
சிக்குன் குனியா
டெங்கி – ஆனாலும்
சகோதரக் கொசுவைக்
கொல்லாது கொசு

கொசுக்களில்
மலடுகள் இல்லை
மரிக்கும் நோய்களில்லை

கொசுக்கள் இல்லையெனில்
கோடிப் பேருக்கு வேலையில்லை

கொசுக்களின் ஆண்டுச் சாதனை
படுக்கையில் ஏழு மில்லியன்
பாடையில் இரண்டு மில்லியன்

நோபல் வெல்ல
குவளயம் புரட்ட வேண்டாம்
ஒரு கொசுவைப்
புரட்டுங்கள் போதும்

யூசுப் ராவுத்தர் ரஜித்