கலில் கிப்ரான் கவிதைகள் (1883-1931) நமது பூமி கவிதை -33 பாகம் -1

மூலம் : ஓவியக்கவி கலில் கிப்ரான் தமிழாக்கம் : சி. ஜெயபாரதன், கனடா

++++++++++++++++++++++++++
நமது பூமி
++++++++++++++++++++++++++

மதக்குருவை ஒரு வாலிபன் புராதனச் சடங்கு ஒன்றைப் பற்றி விளக்கும்படி வினாவும் போது உபதேசி “மதத்தை நம்பிக்கையோடு நோக்காதவன் கண்கள் வெறும் மூடுபனி மூட்டத்தைத்தான் காணும்” என்று அவனைக் கடிந்துரைப்பார்.

கலில் கிப்ரான். (The Narcotics & Dissecting Knives)

++++++++++++++++++++++++++
<< புவியே என்னே உன் நறுமணம் ! >>
++++++++++++++++++++++++++

புவியே ! நீ பலவீன மானவள் !
பலம் உடையவள் ! பணிவு உள்ளவள் !
நிமிர்ந்து நிற்பவள் !
நீ வளைந்து கொடுப்பவள்
நீ அடம் பிடிப்பவள்
மனத் தெளிவும்
இனத்தின் ரகசியம் அறிந்தவள்.
ஆறுகளைத் தேடிச் சென்றேன்
சிற்றோ டைகளின் பின்சென்றேன்
நிலத்தின் ஏற்றத்தில்
நகர்ச்சியில்
நித்திய நிலைப்பகம்
நெறி கூறக் கேட்டேன் !
குன்றுகளில்
நின் பாடல்கள் எதிரொலித்தன
யுக யுகமாய் !
மலைச் சரிவுகளில் கேட்கும்
குடிவாசி மற்றோர் குடிவாசியை
விளிக்கும் குரல் !

+++++++++++

நீயே நித்தியத்தின்
வாயும் அதன் இதழ்களும் !
நீயே காலத்தின்
விரல்களும் நூல்களும் !
நீயே வாழ்வின்
புதிரும் தீர்ப்பும் ஆகும்!
நின் வசந்த காலம்
எழுப்பி விட்ட தென்னை !
ஊதுபத்தி போல் நறுமணம்
ஊர்ந்திடும்
நில வெளியில்
இழுத்துச் சென்றாய் என்னை !

++++++++++++

வேனிற் காலப் பருவத்தில்
வேர்வை சிந்தும்
உழைப்பின் பலனைக் கண்டேன் !
இலையுதிர் காலத்தில்
திராட்சைக் கொடிப் பந்தல்களில்
ஒயின் மதுவாக
உன் குருதி ஓடுவதைக்
கண்டேன் !
உன் குளிர் காலம்
என்னைத் தூக்கிச் செல்லும்
உன் படுக்கைக்கு !
பனித்தளம்
உனது தூய்மையைக் காட்டும் !
மீண்டும் வசந்த காலத்தில்
தோன்றும் நறுமணம் !
கோடையில் அளவற்ற
கொடை உள்ளம் உனக்கு !
அதைப் போல்
இலையுதிர் காலத்திலும் நீயொரு
பெருங் களஞ்சியம் !

(தொடரும்)

****************

தகவல் :

1. The Prophet By : Kahlil Gibran, Published By : Senate (2003)

2. The Prophet By : Kahlil Gibran Published, By Wordsworth Editions Ltd. (1996)

3. Tears & Lauhgter By : Kahlil Gibran, Published, By : Castle Books (1993)

4. The Voice of The Master By : Kahlil Gibran Translated from Arabic By : Anthony Ferris (1967)

5. Thoughts & Meditations By : Kahlil Gibran Translated from Arabic By : Anthony Ferris (1968)

For further information:
The Prophet By Kahlil Gibran :

http://www.katsandogz.com/gibran.html
http://en.wikipedia.org/wiki/Khalil_Gibran

http://www.inner-growth.info/khalil_gibran_prophet/main.htm

Kahlil Gibran Art Gallery :
http://www.inner-growth.info/khalil_gibran_prophet/html/galleries/gibran_gallery1.htm

*********************
S. Jayabarathan [jayabarat@tnt21.com] (August 24, 2010)