கலில் கிப்ரான் கவிதைகள் (1883-1931) << ஆத்மாவின் உபதேசம் எனக்கு >> கவிதை -22 பாகம் -1

மூலம் : ஓவியக்கவி கலில் கிப்ரான் தமிழாக்கம் : சி. ஜெயபாரதன், கனடா

Fig. 1
Kahlil Gibran Paintings
Love Triangle with One Woman & Two Men

“வாலிபம் ஓர் எழிலான கனவு. அது வீசும் சுடரொளியில் கண்களை இருட்டடிக்கும் ஒரு தூசியை வைக்கும் நூல்கள். எப்போது வாலிபக் கனவுடன் அறிவைப் பின்னி நமக்கு ஞானக் களிப்பூட்டும் ஒரு நாள் வருமோ ? எப்போது மனித நேயம் நூலாக இருந்து, வாழ்க்கையே ஒரு பள்ளிக் கூடமாக அமைந்து, இயற்கை மனிதனுக்குக் குருவாக வரும் ஒரு நாள் வருமோ ? வாலிபத்தின் பூரிப்பான குறிக்கோள் அந்த நாள் வரும்வரை நிறைவேறாது. வாலிபத்தின் ஆர்வ வேட்கையை நாம் மிகவும் சிறுத்துப் பயன்படுத்துவதால், ஆன்மீக பீடத்தை நோக்கி நடக்கும் நமது பயணம் ஊர்ந்து செல்கிறது !

கலில் கிப்ரான் (சிந்தனையும், தியானமும்) (Thoughts & Meditations)

+++++++++

<< ஆத்மாவின் உபதேசம் எனக்கு >>

கவிதை -22 பாகம் -1

+++++++++

இது என் ஆத்மாவின் உபதேசம்
எனக்கு ! மாந்தர்
வெறுப்பதை நேசிப்பாய் என்று
அறிவு புகட்டும் !
அவமதிப்பு பெற்ற
மனிதனை
ஆதரிப்பாய் என்று
அறிவுரை சொல்லும் !

+++++++++++++++

என் ஆத்மா வழிகாட்டும் எனக்கு !
காதல் பெருமைப் படும்
காதலிக்கும் ஒருத்தியை மட்டுமின்றி
காதலிக்கப் படும்
கண்ணாளன் மீதும் !
ஆத்மா உபதேசிக்கும் முன்பே
காதல் குடியிருக்கும்
என்னிதயத்தில்
இரு கம்பங்களை இணைக்கும்
மெல்லிய நூலிழை போல்

++++++++++++++

ஆயினும் காதல் இப்போது
ஆரம்பமே அதன் முடிவென்றும்
அதன் துவக்கத்தில் முடிவு
உள்ள தென்று காட்டும்
ஓர் ஒளி வளையம் ஆனது !
அனைத்து மனித இனத்தையும்
அது சூழ்ந்து கொள்ளும் !
மெல்லக் கரங்கள் நீட்சி யாகி
எல்லா இனத்தையும்
இறுக அணைத்துக் கொள்ளும் !

++++++++++++++

என் ஆத்மாவின் ஆலோசனை
எனக்கிது !
தோலுக்குள் மறைந்து கிடக்கும்
வனப்பையும், வடிவையும்
வண்ணத் தையும்
எண்ணிப் பார்ப்பாய் என்று
புகட்டும் அறிவு !
புத்தி கூறும் எனக்கு :
மக்கள்
அழகீனம் என்று சுட்டுவதை
வழிபட்டுத்
தியானம் புரியச் சொல்லும்
உண்மைக் கவர்ச்சியும்
களிப்பும்
வெளிப்படும் வரை !

(தொடரும்)

*************
தகவல் :

1. The Prophet By : Kahlil Gibran, Published By : Senate (2003)

2. The Prophet By : Kahlil Gibran Published, By Wordsworth Editions Ltd. (1996)

3. Tears & Lauhgter By : Kahlil Gibran, Published, By : Castle Books (1993)

4. The Voice of The Master By : Kahlil Gibran Translated from Arabic By : Anthony Ferris (1967)

5. Thoughts & Meditations By : Kahlil Gibran Translated from Arabic By : Anthony Ferris (1968)

For further information:
The Prophet By Kahlil Gibran :

http://www.katsandogz.com/gibran.html
http://en.wikipedia.org/wiki/Khalil_Gibran

http://www.inner-growth.info/khalil_gibran_prophet/main.htm

Kahlil Gibran Art Gallery :
http://www.inner-growth.info/khalil_gibran_prophet/html/galleries/gibran_gallery1.htm

*********************
S. Jayabarathan [jayabarat@tnt21.com (December 22, 2009)]