கவிதைகள்

விசிதா

உறை பனி வார்த்தைகள்

சொன்ன சொற்களில் சில
உறைபனிக்குள் சிக்கி உறங்குகின்றன
வேறு சில இலையுதிர்கால இலைகள் போல்
உதிர்ந்து எங்கோ போயின மக்கின
இன்னும் சில என் மனதிற்குள் நுழையவே இல்லை
வழியிலே தொலைந்துவிட்டன
ஆயினும் சில
என்னுள் சூல் கொண்டுள்ளன
வேறு சில நானறியாமல் என்னுள்
நம் சொற்களாயின
இரவுகளிலும் பகலிலும்
துணையாயின

இவற்றில் எதுஎதுவென நீயறியாய்
நான் சொன்னாலும்

மூன்று கடிகாரங்கள்

இதயத்தில் மூன்று கடிகாரங்கள்
உன் காலத்தினை உணர்த்த ஒன்று
என் காலத்தினை அறிய ஒன்று
என்றோ வரக்கூடும் நம் காலத்திற்காக
இன்னொன்று

தேடல்

நினைவுகள் போதாத போது
குரலோ புகைப்படமோ வேறெதற்கோ இட்டுச் செல்லும் போது
தேடுகிறேன் உன் உடலை
நீயோ வேறொரு காலப்பிரதேசத்தில்
தினம் உன் உறக்கத்தினைக் கலைக்கும்
என் நெருப்பு மூச்சு
உன்னது என்னதை கலைப்பது போல்
—-
wichitatamil@yahoo.com
http://wichitatamil.blogspot.com