அதிசயம்

பவளமணி பிரகாசம்

அதிசயமான அதிசயம்
எகிப்திய நாட்டினிலே
அகண்ட பாலைவனத்திலே
அமர்ந்திருக்கும் அதிசயம்
பிரமிடெனும் பிரமாண்டம்

பெண் முக சிங்கமோ
உயர்ந்த கூம்பு வடிவமோ
பொருளற்ற பொருளாய்
அண்ணாந்து பார்க்கும்
பாலகன் விழிகளிலே

பின்னாளில் பின்னின்று
பார்க்க சவாலாய்
பெரிதான மலைப்பாய்
நெஞ்சுக்கு நேரிலே
வாலிப வயதிலே

இன்னும் பின்னால்
செல்லச் செல்ல
சிறுக்கத் துவங்கி
புள்ளியாய் மாறி
மறைந்தே போனது

மாறிய கோணத்திலே
இடைப்பட்ட வெளியிலே
மாறவில்லை அதிசயம்
மாறிவிட்டது பரிமாணம்
அது ஒரு பரிணாமம்

தோள்கள் வளர வளர
கால்கள் நகர நகர
மறைகின்ற உருவம்
குறைகின்ற உக்கிரம்
அது என்ன மாயம்

வலிகள் வடுக்களாய்
மயங்கும் நினைவுகளாய்
அடங்கிய அலைகளாய்
எய்துகின்ற ஓர்நிலை
ஏந்தி வரும் அமைதியினை

Pavalamani Pragasam
Pavalamani_pragasam@yahoo.com