ஆடு புலி ஆட்டம்

ஆதர்ஷ் ராவ்

என் மனம் உனக்கு துல்லியமாய்ப்புரியும்
உன் எண்ணங்களும் எனக்கு அவ்வாறே

புரிந்ததை நான் சொல்ல மாட்டேன்
நீயும் வெளிப்படையாய்க் கூறியதில்லை

எனக்கு வேண்டிய ஆறுதலை நீயும்
உனக்கு வேண்டியதை நானும் தரமறுக்கிறோம்

ஆத்மார்த்தமான காதல் என்ற பெயரில்
நீயும் நானும் திருமணத்தில் இறங்கினோம்

கற்பனையால் ஆயுதங்கள் கொண்டு
ஒருவரை ஒருவர் காயபடுத்துகிறோம்

எங்கு அடித்தால் வலிக்கும் என்று
உனக்கும் எனக்கும் தெளிவாய்த் தெரியும்

என்னிடம் உன் எதிர்பார்ப்பும் உன்னிடம்
என்னுடையவையும் நிறைவேறவேயில்லை

உன்னைப்பற்றிய என் பிம்பத்திற்கும்
என்னைப்பற்றிய உன் பிம்பத்திற்கும்

திருமணம் நடந்திருந்தால் ஒருவேளை
நன்றாய் இருந்திருக்குமோ என்னவோ ?

aadharsh02@iimk.ac.in