முக்கால் வயது முழுநிலவு

ஜடாயு

விளங்காப் புதிர்கள் விளங்கி விடும்
விடைகள் உடனே கிடைத்து விடும்
களங்கமிலா உன் முகம் கண்டால்
கவலைகளெல்லாம் பறந்து விடும்
சின்னக் கைகள் நீ அசைத்தால்
சிறகடித்தென் மனம் பறக்கிறது
கன்னம் குழிய நீ சிரித்தால்
கண்ணன் திருமுகம் தெரிகிறது
அழகி உன் சிறு புன்னகைக்கு
ஆயிரம் கோடிகள் இணையில்லை
மழலைக் குரலின் மாயம் போல்
மயக்கும் இசையும் இங்கில்லை

பிஞ்சுப் பாதம் தீண்டுகையில்
பிறவிப் பயனை எய்திவிட்டேன்
கொஞ்சி எடுத்து அணைக்கையிலே
கோடி சுகங்கள் பெற்றுவிட்டேன்

தத்தித் தவழ்ந்து நடந்து வரும்
தங்கத் தாமரைப் பூவோ நீ ?
எத்தனை எண்ணிப் பார்த்தாலும்
எழுத்தில் அடங்காக் கவிதை நீ

முன்பல் இரண்டுடன் முறுவலிக்கும்
முக்கால் வயது முழுநிலவே
இன்பக் கதைகள் உன்னைப்போல்
எவரால் சொல்ல முடியுமடி ?

jattaayu@hotmail.com