தனக்கான நிகழ் காலங்கள்

திலகபாமா சிவகாசி

இல்லந்தோறும் இருக்கின்றன

நிலைப்படிகளுக்கடுத்ததாய்

கூண்டுக் கிளிகள்

தரப்படுகின்ற நெல்மணிகளுக்காய்

கொத்தி வருகின்றன சீட்டுக்களை

யாருடைய எதிர்காலங்களையோ சொல்ல

சிறகடிக்க நினைத்த காலங்களிலும்

பழகிப் போயிருந்தனகூண்டுப் பாரங்களை

மறந்த வாறே தூக்கித் திரிய

கூண்டுகள் பெயர்த்து பறக்க நினைத்த போது

சிறகுகள் மறந்திருந்தன

காற்றில் விரிப்பதை

தொலைக்க வைக்கப் பட்டிருந்த இயல்புகளை

நினைக்கப் பழகாது

பறக்க மறந்து விட்ட சிறகுகளையும்

எதிர்த்தவர் பிய்த்து எடுத்துக் கொள்ள

வாகாய் இருந்த சிறகுகளையும்

தானே உதிர்த்து

உடல் தெரிய நின்று சிரிக்கின்றன

இனி எவரும் அதிகாரம் செலுத்த முடியாதென்

சிறகுகளின் மேலென்று

பறக்க கைதூக்கி

பழகிய பறவையொன்று

சிறகுகளால் காற்றையும் கிழித்து

வான வீதியில் வெள்ளி முளைக்க

விதை தூவ

அம்மணமாய் நிற்பதை எண்ணி

உடல் தெரிய நின்ற பறவைகள்

வெளிச்சம் கூச இருள் தேடி

மீண்டும் சிறைப்படும்

நான் தூவிய விதைகளில்

சிறைப்பட்ட பறவைகளுக்கான

சிறகுகளும் முளைக்கின்றன

நாளையாவது தனக்கான

எதிர்காலங்களை யல்ல

நிகழ்காலங்களை மட்டுமாவது

சொல்லும் சீட்டுக்களைத் தேடட்டும்

mathibama@yahoo.com