தேனம்மை லெக்ஷ்மணன்

ஓடு ஓடு போடு போடு
ஓட்டு போட்டு நாட்ட மாத்து
இல்ல வெலைக்கு போட்டு
ஒன் நிலைமையாவது மாத்து..

ஓட்டு வீடு காரை வீடாய்
ஒழுகினாலும் தார்சு வீடு..
பிள்ளை பெத்தா பேறு பணம்
வயசானா முதியோர் பணம்

ஒரு ரூவாய் அரிசியோடு
ரேஷன் மளிகை குழம்போடு
தொலைக்காட்சி பசப்போடு
தொலையாத கசப்போடு

இப்படித்தான் வாழப்போறே
உனக்கெதுக்கு வெட்டி கோவம்
செல்லா ஒட்டாய் செல்லாம ஆக்கி
கள்ளஓட்டுக்கு வழி செய்யாதே..

எல்லாரும் சம்பாதிக்கிறான்
எங்கேயும் லஞ்சம்தான்
அன்னா என்ன அண்ணா என்ன
யார் வந்தாலும் மாறாதிது

எலவசமும் லஞ்சமும் கௌரதையும்
கார்சவாரியும் உனக்கும் கிடைக்கும்
ஆனா போனா ஐந்து வருடத்துக்கு
ஒரு முறையாவது ராஜா நீயும்

ஓடு ஓடு போடுபோடு
ஓட்டு போட்டு நாட்ட மாத்து
இல்ல வெலைக்கு போட்டு
உன் நிலைமையாவது மாத்து..