கடிதம்

This entry is part of 33 in the series 20051125_Issue

பி கே சிவகுமார்


மலர் மன்னன் திண்ணையில் எழுதிவருவதைப் படித்து வருகிறேன். சில இதழ்களே வந்த 1/4 (கால்) என்ற பத்திரிகையின் ஆசிரியராக அவர் இருந்தார் என்பதையும் அவர் எழுத்துகள் மூலமே அறிந்தேன். ‘தமிழில் வந்த சிறுபத்திரிகைகளிலேயே சிறந்த பத்திரிகை என்று அதைச் சொல்லலாம் ‘ என்று அந்தப் பத்திரிகையைப் பற்றி திண்ணை ஆசிரியர் கோபால் ராஜாராம் தனிப்பேச்சில் குறிப்பிட்டார். மலர் மன்னன் கணையாழியையும் சிலகாலம் பார்த்துக் கொண்டார் என்று இந்திரா பார்த்தசாரதி தனிப்பேச்சில் சொன்னார். சு.ரா.வுடனான தன் நட்பைப் பற்றித் திண்ணையிலேயே மலர் மன்னன் பகிர்ந்து கொண்டிருக்கிறார். அவர் அரசியலில் இந்துத்துவ ஆதரவு நிலைப்பாட்டில் இருக்கிறார் என்பதை அவர் எழுத்துகளிலிருந்தும் நண்பர்கள் சொல்வதிலிருந்தும் அறிய முடிகிறது. ‘அயோத்திதாசர் என்ற பெயருக்காகவே என்னைப் போன்றவர்கள் அவரைக் கொண்டாடக் கடமைப்பட்டிருக்கிறோம் ‘ என்று அவர் எழுதிய பொருள் பதிந்த வரிகளிலிருந்தும் இந்த அனுமானத்துக்கு வருகிறேன். எனக்கு பா.ஜ.க. மற்றும் சங் பரிவார் அரசியல் மற்றும் கொள்கைகளுடன் உடன்பாடு இல்லை என்றாலும், அவர் எதனுடைய ஆதரவாளராக இருப்பதும் எனக்குப் பிரச்னையில்லை. அவர் எழுத்துகள் ஆர்வத்துடன் படிக்கக் கூடியதாகவும் தொடர்ந்து சிந்திக்க வைப்பதாகவும் இருக்கின்றன. அதற்காக அவருக்கு நன்றிகள்!

திண்ணையில் http://www.thinnai.com/le1118051.html என்ற முகவரியில் மலர் மன்னன் ஒரு கடிதம் எழுதியிருக்கிறார். அதில் அவர் குறிப்பிடுகிறார் – ‘தலித்துகளுக்கு மேல் சாதியினரின் அடக்குமுறை ஆதிக்கத்திலிருந்து விடுதலை அளிப்பது பற்றிய பிரக்ஞை காங்கிரசுக்கு தாசரின் காலத்திலுங்கூட இருக்கவில்லை என்பதுதான் கவனிக்க வேண்டிய விஷயம். அயோத்திதாசர் பிரிட்டிஷ் ஆட்சிக்குத் தீவிர ஆதரவாளராக இருந்ததும் தலித்துகள் நலனில் பிரிட்டிஷ்காரனுக்கு இருக்கிற அக்கரைகூடக் காங்கிரசுக்கு இல்லை என்பதால் தானாயிருக்கும். ‘

இந்த வரிகள் என்னை யோசிக்க வைத்தன. பெரியாரும் காங்கிரஸை எதிர்த்தவர்தான். பிரிட்டிஷ்காரர்களுடன் நட்புடன் இருந்தவர்தான். சுதந்திரம் வேண்டாம், கொடுத்தால் திராவிட நாடாகக் கொடுங்கள் என்றவர்தான். சுதந்திரத்தைவிடவும் சமூக வேற்றுமைகள் களையப்படுவது முதன்மையான விஷயம் என்றவர்தான். அயோத்திதாசர் பிரிட்டிஷ் அரசை ஆதரித்ததற்குக் காங்கிரஸைக் குறை சொல்வது சரியாக இருக்குமென்றால், பெரியாருக்கும் அதே நியாயத்தை வழங்கிப் பெரியாரையும் புகழ்வதுதான் சரியாக இருக்கும். பெரியாரைப் பற்றிய மலர்மன்னனின் பார்வை என்னவென்று எனக்குத் தெரியவில்லை. ஆனால், பெரியாரைப் பற்றிய இந்துத்துவவாதிகளின் பார்வை பெரியாரைச் சிலாகிப்பதாக இல்லை என்று அறிவேன். (பெரியாரைப் பற்றிய என்னுடைய பார்வை, ஜீவா, ஜெயகாந்தன் வழி வந்த இடதுசாரிகளின் பார்வை வழியாக உருப்பெற்றது என்பதையும் இங்கே சொல்லி வைக்கிறேன்.)

எனவே, என்னுடைய கேள்வி – அயோத்திதாசருக்குத் தருகிற இந்தச் சலுகையைப் பெரியாருக்கும் மலர் மன்னன் தருவாரா ? அப்படித் தருவதுதானே மலர்மன்னன் பார்வையின்படி சரியாக இருக்கும். இல்லை, பெரியாரின் பிரிட்டிஷ் விசுவாச நிலைப்பாட்டைப் பாராட்ட இயலாது என்று மலர் மன்னன் சொல்வாரேயென்றால், அதற்கானக் காரணங்கள் என்று மலர் மன்னன் எவற்றை முன்வைப்பார் ? அறிய ஆவலாக இருக்கிறேன்.

பி.கு.: பெரியார் மீது பல விமர்சனங்கள் உள்ள என்னைவிடப் கண்மூடித்தனமாகப் பெரியாரை வழிபடும் பெரியாரியவாதிகள்தான் இத்தகைய ஓர் கடிதத்தை எழுதியிருக்க வேண்டும். தமிழ்நாட்டில் பெரியார் பெயரைச் சொல்லிப் பிழைப்பவர்கள் குஷ்புவுக்கும் சுஹாசினிக்கும் செருப்பையும் துடைப்பத்தையும் காட்டிப் பெரியார் பெயரைக் காப்பாற்றிக் கொண்டிருப்பதால், நான் எழுதுகிற நிலையாயிற்று.

Series Navigation

பி.கே. சிவகுமார்