சூடேறும் கோளம், உருகிடும் பனிப்பாறை, மேலேறும் கடல் மட்டம், தாக்கிடும் இயற்கைச் சீற்றங்கள்-9

This entry is part of 36 in the series 20060818_Issue

சி. ஜெயபாரதன் B.E.(Hons) P.Eng (Nuclear) கனடா


பச்சை நிறத்தை ஒட்டி ஓரளவு
மினுமினுக்கும்,
இன்றைய மரங்களின் இலைகள்!
ஆயினும்
அவ்விதம் மின்னும் பசுமை தென்படுமா,
கோலம் மாறும் போது,
காலமும், கடல் மட்டமும்
மனிதக்
கைப்பிடியில் சிக்கி?
புனித நிலத்தைப்
புண்படுத்திப்
பாலை மணலாய்ப் பாழாக்காதே
மனிதா!

பூகோளம் தாங்கிக் கொள்ளும் வரை விதைநடுப்பு-அறுவடை, வெப்பம்-குளிர்ச்சி, வேனிற் காலம், குளிர்காலம், பகலிரவு ஆகியவை ஒருபோதும் நிறுத்த மடையா!

ஜெனெஸிஸ் 8:22 [பைபிள்]

“தனிப்பட்ட மனிதரைச் செம்மைப் படுத்தாது, புதியதோர் உலகத்தை உருவாக்க எதிர்பார்க்கக் கூடாது! அந்தக் குறிக்கோளைப் பின்பற்றி நாம் ஒவ்வொருவரும் நம்மை மேம்பத்த முனைய வேண்டும். அதே சமயத்தில் அனைத்து மனித வர்க்கமும் அப்பொறுப்பில் பங்கு கொள்ளப் பணிபுரிய வேண்டும். குறிப்பாக நமது பணிகள் மிகையாகத் தேவைப் படுபவருக்கு நாம் முன்வந்து உதவிடக் கடமைப் பட்டுள்ளோம்.”

மேரி கியூரி [இரட்டை நோபெல் பரிசு பெற்ற விஞ்ஞான மேதை (1867-1934)]

“மனிதத் தலையீடுகளால் பூகோளத்தின் காலநிலைப் பெருமளவில் சீர்கேடாகி வருகிறது! சூழ்மண்டல வாயுக்களில், கார்பன் டையாக்ஸைடு வாயுவின் கலப்பு மிகையானால், பூதளத்தின் மேற்தளச் சூடு அதிகரிக்கிறது. சென்ற நூற்றாண்டில் ஈடிணை யில்லாத அளவில் கிரீன்ஹவுஸ் வாயுக்களின் சேர்க்கை, மற்ற மனிதத் தூண்டல் சீர்கேடுகளுடன் சேர்ந்து விளைவித்த பாதிப்புகள், எதிர்பார்க்கப் பட்ட கெடுதிகள் பலரது கவனத்தைக் கவர்ந்திருக்கிறது.”

அமெரிக்கன் பூகோளப் பௌதிகக் கூட்டகம் [American Geophysical Union (Dec. 2003)]

நடைமுறையில் மெய்யாகக் கிரீன்ஹவுஸ் வாயுக்களைக் குறைப்ப தென்பது அத்தனை எளிதான ரசாயன வினையில்லை! அத்துறையில் முனைந்தால் உற்பத்தி நிதிச்செலவு மிகையாகித் தொழிற்துறை நிதியாதாரம் தாங்கிக் கொள்ள முடியாத நிலைக்கு ஏறிப் பாராமாகிறது! அவ்விதமின்றி நிலக்கரி எரிந்தியங்கும் மின்சார நிலையங்களும், நிலக்கரி பயன்படுத்தும் தொழிற்சாலைகளும் நிறுத்தமானால், மக்களின் மின்சக்தித் தேவைகளும், சுகவசதிகளும் பெருமளவு பாதிப்படையும்! அதுபோல் பெட்ரோலிய எரிவாயுவில் ஓடும் அனைத்து மோட்டார் வாகனங்களையும் ஓட்டாமல் நிறுத்த முடியுமா? ஆதலால் ஓரிரவில் 100% தீர்வு செய்ய யியலாத அப்பிரச்சனையால், பொதுநபருக்குப் பேரழப்புக்கள் நேரிடும்.

உயிரினப் பயிரினப் பாதிப்பு அறிக்கை (ஜனவரி 29, 2004)

“காலநிலைச் சுற்றுப் போக்கு [Climate Cycles] பரிதியின் கதிர்வீச்சு [Solar Radiation] பூகோளத்தின் மட்டரேகையில் படுவதாலும், விழும் காலத்தைப் பொருத்தும் பல்லாயிரம் ஆண்டுகளுக்கு ஒருமுறை மூன்று வித வேறுபாடுகளால் மாறுபடுகின்றன. முதலாவது பூமி பரிதியை வலம்வரும் சுற்றுவீதி [Orbit] எப்போதும் முழு வட்டமா யில்லாது சற்று நீள்வட்டமாகி மீண்டும் வட்டமாகிறது! இரண்டாவது பூமி ஆடுமோர் பம்பரம் போன்று தலை சுற்றுகிறது [Spin Axis Wobble or Precession]! மூன்றாவது பூகோளத்தின் மத்திம ரேகைத் தளத்திற்கும், சுற்றுவீதித் தளத்திற்கும் இடைப்பட்ட கோணம் சில டிகிரிகளில் மாறி வருகின்றன.”

மிலுடின் மிலான்கோவிச் [Milutin Milankovitch, Yogoslav Geophysicist (1879-1958)]

1990 ஆண்டில் பிரென்ச், ரஷிய விஞ்ஞானிகள் அண்டார்க்டிகாவின் தென்துருவத்தில் 1.5 மைல் நீளமான பனித்தண்டைத் தோண்டி எடுத்து 400,000 ஆண்டுகளாக மீண்டும் மீண்டும் தோன்றி மாறிய நான்கு பனியுகங்களின் கரியமில வாயுவை [CO2 in Four Ice-Age Cycles] ஆய்ந்தனர். அந்தச் சோதனையில் உஷ்ணம் ஏற, ஏற கரியமில வாயுவின் கொள்ளளவு படிப்படியாகக் குறைந்து [மூன்றில் ஒரு பங்கு] வந்திருக்கிறது என்று அறியப்பட்டது. காரணம் மற்ற கிரீன்ஹவுஸ் வாயுக்கள் CO2 உடன் மாறி யிருக்க முடியும் என்று எளிதாகக் கருத வழி யிருக்கிறது. அந்த அரியக் கண்டுபிடிப்பு 1896 ஆண்டு விட்ட முன்னறிப்பை உறுதிப் படுத்தியுள்ளது.

பூகோளச் சூடேற்ற விளக்கமும் விவாதமும் [Global Warming Definitions & Debate]

ஆர்க்டிக் வட்டாரத்தைத் துணைக்கோள் கண்காணித்த உளவுகள், பூகோளச் சூடேற்றம் மெய்யானது என்று நிரூபித்ததுடன், அடுத்து வரும் 100 ஆண்டுகளில் முந்தைய காலத்தை விட 8 மடங்கு வேகத்தில் வெப்பச் சீற்றம் ஏறி வருகிறது என்றும் எடுத்துக் காட்டியுள்ளன! கடற்பனி உருகுவதால் கடல் மட்டம் உயராது. காரணம், கடற்பனிக் குன்றுகள் கடலில் மிதக்கின்றன. ஆனால் கிரீன்லாந்தின் நிலப்பகுதிப் பனிக் குன்றுகள் முழுதும் உருகினால் கடல் மட்டம் 7 மீடர் வரை [சுமார் 25 அடி] ஏறிவிடலாம் என்று அஞ்சப் படுகிறது! ஆனால் அவ்விதம் பனிக்குன்றுகள் யாவும் கிரீன்லாந்தில் உருக 1000 ஆண்டுகள் கூட ஆகலாம்!

மார்க் ஸெர்ரீஸ் [Mark Serreze, University of Colorodo]

முன்னுரை: கடந்த 160,000 ஆண்டுகள் முதலாக சென்ற பனியுகம் உட்படத் தற்காலம் வரையில் சூழ்மண்டலத்தில் பரவி யிருந்த கார்பன் டையாக்ஸைடு வாயுவின் அளவையும், உஷ்ணத்தின் அளவையும் காலநிலை விஞ்ஞானிகள் கிரீன்லாந்து, அண்டார்க்டிகா ஆகியவற்றின் பனிக்குன்றுகளைத் துளையிட்டு மாதிரி எடுத்து அற்புதமாய்க் கணித்திருக்கிறார்கள். துளைத்தெடுத்த பனித்தண்டில் சிக்கிக் கொண்ட வாயுக் குமிழ்களை உளவி ஆராய்ந்தால், அவற்றில் உள்ள வாயுக்கள் என்ன வென்றும், எத்தனை அளவில் உள்ள தென்றும் [CO2, Methane & other Gases] அறிய முடிகிறது. அத்துடன் குமிழுக்குள் மாட்டிக் கொண்ட ஆக்ஸிஜன் வாயுவின் ஏகமூலங்களின் விகிதத்தைக் [Ratio of Oxygen Isotopes] கணக்கிட்டால் உஷ்ணத்தையும் கணிக்க முடிகிறது. அந்தக் கணிப்புகளின் மூலமாய்க் கார்பன் டையாக்ஸைடுக்கும், சூழ்வெளி உஷ்ணத்துக்கும் உள்ள ஓர் உறவுப்பாடு உறுதியாக்கப் பட்டது.

சூழ்வெளி வாயு மண்டலத்தில் கார்பன் டையாக்ஸைடு மிகையாகச் சேரச் சேர பூதள உஷ்ணம் கூடினாலும், உஷ்ணம் ஏறிடும் வீதம் கார்பன் டையாக்ஸைடு மிகை அளவால் குறைந்து வருகிறது [Rate of temperature raise in the atmosphere diminishes with increasing CO2 content] என்பது ஷ்னைடெரின் தர்க்கம்! ஆனால் அதற்கு எதிராக வாயு மண்டலத்தில் சேரும் தூசிகளின் [Aerosols] சேர்க்கை, வாயுவின் திணிவை [Density] அதிகரித்தாலும், பூதளத்தின் உஷ்ண ஏற்றத்தைக் குறைக்கிறது என்பது ஷ்னைடெரின் அடுத்த தர்க்கம்! உதாரணமாகப் பூகோள வாயு மண்டலத்தில் 4 மடங்கு தூசி மிகையானால், பூதளத்தின் உஷ்ணத்தை 3.5 டிகிரி கெல்வின் அளவு குறைக்கிறது! தூசிகள் சேரும் அப்போக்குப் பல ஆண்டுகள் நீடித்தால், உலகம் முழுவதிலும் குன்றிய தள உஷ்ணத்தால், பனியுகம் தூண்டப்படும் தருணம் திரும்பலாம் என்பதே ஷ்னைடெரின் ஆராய்ச்சி. குளிர்ச்சியாகும் பூகோளம் [Global Cooling] என்னும் அந்தக் கொள்கையே ஷ்னைடெரின் வாயுரையாகவும் வெளியாகிக் கொண்டு வந்தது!

ஆசிய நாடுகள் பெற்றுக் கொள்ளும் பூகோளச் சூடேற்றப் பாதிப்புகள்

பரமா பாஸ¤ என்னும் பாரத மாது தனது கட்டுரையில் [Ref:18] கூறுவது இதுதான்: “உலக உடல்நலப் பேரவை [World Health Organization (WHO)] சமீபத்தில் வெளியிட்ட அதிர்ச்சி தரும் தகவலில் மனிதரும், தொழிற்துறைகளும் உற்பத்தி செய்து வெளியாக்கும் நச்சு வாயுக்கள், நாசக் கழிவுகளால் சூழ்வெளிக் காலநிலை, மண்டலம் மாறுபட்டு 5 மில்லியன் நபர் நோயுறுவார் என்றும், அவர்களில் ஆண்டு தோறும் 150,000 மேற்பட்ட மரணங்கள் நேரலாம் என்று அறியப்படுகிறது! உஷ்ண ஏற்ற இறக்கத்தால் வெப்பப் புயல்கள் [Heat Waves] அடித்தும், பேய் மழையால் வெள்ளக் காடுகள் நிரம்பித் தொத்து நோய்கள் பீடித்துப் பல்வேறு முறைகளில் மனிதர் உடல்நலத்தில் ஆட்டம் காணப்படும் என்று விஞ்ஞானிகள் எச்சரிக்கை செய்கிறார்கள். அந்தச் சீர்கேடுகளில் பாதிக்கப்படுவை, பூகோளத்தைச் சூடாக்கிச் சூழ்வெளியைப் பாழாக்கிய நகரங்கள் மட்டுமல்ல! முரணாகச் சூழ்வெளியை மாசுபடுத்தாமல் ஒதுங்கி நிற்கும் ஊர்களும் பெருமளவில் பாதகம் அடைகின்றன! இயற்கை வெளியீட்டிதழின் அறிவிப்பின்படி, வெப்ப மிகுதியால் பாதிப்பாகும் பகுதிகள்: பசிபிக் மாக்கடல், இந்தியக் கடல் தீவுகள், அவற்றின் கரைப்பகுதிகள், மற்றும் ஆ·பிரிக்காவில் ஸஹாரா பாலைவனச் சுற்றுப் பகுதிகள். அந்தப் பிரதேசங்களில் கிரீன்ஹவுஸ் வாயுக்கள் வெளியாகும் அளவுகள் மிக மிகக் குறைவாக உள்ளவை, ஆ·பிரிக்க நாடுகள். அந்த ஏழ்மை நாடுகளில் வெப்ப மிகுதியாலும், சத்துள்ள உணவின்னையாலும், மக்களுக்கு உண்டாகும் நோய்கள் பல!

பூகோளச் சூடேற்றத்தால் விளையும் சீர்கேடுகள்

1. நிலங்களின் அமைப்புக்கு ஏற்ப நாட்டின் வேளாண்மை விளைச்சல்களில் பேரிழப்பும், பெரும் பாதிப்பும் நேரிடும். சூழ்தளத்தின் சராசரி வெப்பம் 1.8 டிகிரி F வீதத்தில் ஏறும் ஒவ்வொரு முறையும், உணவு வேளாண்மைப் பயிர்களான நெல், கோதுமை, சோளம் ஆகியவற்றின் அறுவடை விளைச்சல்கள் 10% வீதம் குன்றுகின்றன!

2. துருவப் பனிக் குன்றுகள் உருகிடும் போது கடல்நீர் மட்டம் உயர்ந்து, தீவுகளும், கரைப்பகுதி நிலங்களும் உப்புநீரில் மூழ்கிப் பாழாகுகின்றன.

3. பூகோளச் சூடேற்றத்தால் கடல் சூறாவளிகளும், பேய்மழைகளும் உண்டாகி நீர்வளங்களும், நிவளங்களும் பாதகமடைந்து, தொழில்வள அடிப்படை வசதிகளும் [Infrastructures] சேதமடைகின்றன.

4. மலேரியா, டெங்கு காய்ச்சல், லைம் நோய், வெஸ்ட் நைல் வைரஸ் [Dengue Fever, Lyme Disease, West Nile Virus] போன்ற தொற்றுநோய் பீடிக்கும் பரப்புகள் உலகெங்கும் பெருகும்.

(தொடரும்)

************************

தகவல்கள்:

Picture Credits: Time, National Geographic Magazines.

1. Time, Special Report on Global Warming [April 3, 2006]
2. Stop Thermageddon in Our Lifetime [www.thermageddon.com]
3. What is Happening to our Climate? By Samuel Matthews, National Geographic [Nov 1976]
4. The ocean An Era of Discovery National Geographic [Dec 1981]
5. Global Warming from Wikipedia.
6. Climate Change: The Human Influence Analysed By Harry N.A. Priem [Sep 15, 2000]
7. Climate Change: Projected Changes in CO2 & Climate
8. Climate Change: Sea Level Rise Due to Global Warming.
9. Is Our World Warming? By: Samuel Matthews, Senior Assistant Editor National Geographic [Oct 1990]
10 http://www.thinnai.com/sc1014051.html [Author’s Article on Katrina Damage & Evaquation]
11 Stormy Weather: Can We Link to Global Warming By: Jim Motavalli [Nov 11, 2004]
12 A Cold Hard Look at a Telltale Region Arctic By: Peter Spotts, Christian Science Monitor [Nov 18, 2004]
13 Global Warming : Definitions & Debate [http://zfacts.com/p/49print.html
14 Meltdown: Arctic Wildlife is On the Brink of Catastrophe By Steve Connor [Nov 11, 2004]
15 Discovery of Greenpeace Expedition on Greenland By: Dr. Gordon Hamilton [July 22, 2005]
16 Carbon Dioxide [CO2] & Global Warming Potential [Several Internet Reports]
17 Ecological Reports: The Data on Global Warming is Conclusive [Jan 29, 2004]
18 Third World Nears Brunt of Global Warming Impacts By: Paroma Basu [July 11, 2006]
19 Ozone Crisis, The 15 Year Evolution of a Sudden Global Emergency By: Shron L. Roan [1989]
20 Evidence for Global Warming: Degradation of Earth’s Atmosphere; Sea Level Raise; Ozone Holes; Vegetation Response By: Dr. Mitchell K. Hobish [Earth System Science]
21 Warning from Al Gore on Future, “Global Warming Called an Emergency” (June 5, 2005)
22 National Geographic: “Unlocking the Climate Puzzle [May 1998]
23 National Geographic: “Global Warming” Your Vacation May Never Be the Same, The Climate Bomg By: Jonathan Tourtellot [July-Aug 2006]
24 Macleans Magazine: Now with the Weather -Al Gore [May 22, 2006]
25 Pledge to See “An Incovenient Truth” Movie [May 27, 2006]
26 Milankovitch Cycles: Changes in Earth-Sun Interaction By: Matt Rosenberg
27 Astronomical Theory of Climate Change -NOAA Paleoclimatology Program [Sep 9, 2003]
28 Anandu Vernekar Home Page Biographical Sketch [www.atmos.umd.edu/~adv/]
29 Sun, Not Carbon dioxide, is the Primary Driver of Ice Ages; Carbon dioxide is only a Secondary Driver [A New Theory (July 24, 2006)]
30 Milankovitch Theory, Ice Age & Glaciation from: Wikipedia
31 Earth Science & The Environment By: Graham Thompson, Ph.D. & Jonathan Turk, Ph.D. [1993]

******************

jayabarat@tnt21.com [August, 17 2006]

Series Navigation

சி. ஜெயபாரதன், கனடா