சூடேறும் கோளம், உருகிடும் பனிப்பாறை, காலநிலை மாறுதலுக்குக் காரணமான பூகோளச் சுழற்திரிபுகள் -8

This entry is part of 36 in the series 20060811_Issue

சி. ஜெயபாரதன் B.E.(Hons) P.Eng (Nuclear) கனடா


பட்டப் பகலென்றும்,
நட்ட நிசி யென்றும்,
பொட்டுப் பரிதிக்கு
கட்டுவிதி யில்லை! ஆயினும்
கால விதிக்கடி பணியும்!
வெட்ட வெளியில்
வெப்பத்தைக் கக்கிச்
சுட்டு விடுவதும் அதுவே! கனல்
பட்டெனத் தணிந்து,
பார்மீது
பனிக் குன்றைப்
படைப்பதும் அதுவே!

“பேரளவுக் கொள்ளளவு கார்பன் டையாக்ஸைடு [CO2], தூசிகள் [Aerosols] நமது வாயு மண்டலத்தில் சேர்ந்தால், பூகோளச் சூடேற்றம் அவை ஒவ்வொன்றாலும் எப்படி மாறுபடுகிறது என்பது மதிப்பீடு செய்யப் பட்டுள்ளது! கார்பன் டையாக்ஸைடு அபூர்வமாக அடுத்த சில ஆயிரம் ஆண்டுகளில் 8 மடங்கு ஏறினால், பூதளத்தின் உஷ்ணம் 2 டிகிரி கெல்வினுக்கும் [2 deg K] மிகையாகலாம். ஆனால் வாயு மண்டலத்தில் தூசிகளின் படிமானம் சிறிது மிகையானாலும், பூதள உஷ்ணம் மாறுவது பெருமளவு என்பது தற்போது அறியப் பட்டுள்ளது! உதாரணமாக வாயு மண்டலத்தில் தூசிகளின் சேர்க்கை அடுத்த நூறாண்டுகளில் 4 மடங்காக மிகையானால், பூதளத்தின் உஷ்ணம் 3.5 டிகிரி கெல்வின் குறைந்து தணிந்து போகும் என்பது அறியப்பட்டுள்ளது! அந்த நிலை பல்லாண்டுகள் நீடித்தால், பூமியின் சராசரி உஷ்ண நிலை குறைந்து போய், மறுபடியும் அடுத்தப் பனியுகத்தைத் [Ice Age] தூண்டி விடும்!

ஸ்டீ·பென் ஷ்னைடெர் Ph.D. [Stephen Schneider on Climate Cooling (July 1971)]

மெக்ஸிகன் வளைகுடாவில் கரீபியன் தீவுகளின் கடலில் வெப்பம் பேரளவு ஏறியதால் கடந்த 3000 ஆண்டுகளாக பவளத்தின் வளமை முற்றிலும் அழிந்து போனது அவலம் தரும் தகவல்! 1998 இல் பெலிஸ் [Belize, Near Guatemala, Central America] நாட்டுக்கு அப்பால் கடலின் உஷ்ணம் 31.5 டிகிரி C [The El Nino Climate Effect] என்று பதிவு செய்யப் பட்டது! அந்த உஷ்ண ஏற்றம் பல மாதங்கள் நீடித்து பெலிஸ் கடலில் தோன்றிய பவளக் குடியேற்றங்கள் அனைத்தும் நிறம் வெளுத்து முற்றிலும் அழிந்து போயின!

BBC News [May 4, 2000]
“காலநிலைச் சுற்றுப் போக்கு [Climate Cycles] பரிதியின் கதிர்வீச்சு [Solar Radiation] பூகோளத்தின் மட்டரேகையில் படுவதாலும், விழும் காலத்தைப் பொருத்தும் பல்லாயிரம் ஆண்டுகளுக்கு ஒருமுறை மூன்று வித வேறுபாடுகளால் மாறுபடுகின்றன. முதலாவது பூமி பரிதியை வலம்வரும் சுற்றுவீதி [Orbit] எப்போதும் முழு வட்டமா யில்லாது சற்று நீள்வட்டமாகி மீண்டும் வட்டமாகிறது! இரண்டாவது பூமி ஆடுமோர் பம்பரம் போன்று தலை சுற்றுகிறது [Spin Axis Wobble or Precession]! மூன்றாவது பூகோளத்தின் மத்திம ரேகைத் தளத்திற்கும், சுற்றுவீதித் தளத்திற்கும் இடைப்பட்ட கோணம் சில டிகிரிகளில் மாறி வருகின்றன.”

மிலுடின் மிலான்கோவிச் [Milutin Milankovitch, Yogoslav Geophysicist (1879-1958)]

1990 ஆண்டில் பிரென்ச், ரஷிய விஞ்ஞானிகள் அண்டார்க்டிகாவின் தென்துருவத்தில் 1.5 மைல் நீளமான பனித்தண்டைத் தோண்டி எடுத்து 400,000 ஆண்டுகளாக மீண்டும் மீண்டும் தோன்றி மாறிய நான்கு பனியுகங்களின் கரியமில வாயுவை [CO2 in Four Ice-Age Cycles] ஆய்ந்தனர். அந்தச் சோதனையில் உஷ்ணம் ஏற, ஏற கரியமில வாயுவின் கொள்ளளவு படிப்படியாகக் குறைந்து [மூன்றில் ஒரு பங்கு] வந்திருக்கிறது என்று அறியப்பட்டது. காரணம் மற்ற கிரீன்ஹவுஸ் வாயுக்கள் CO2 உடன் மாறி யிருக்க முடியும் என்று எளிதாகக் கருத வழி யிருக்கிறது. அந்த அரியக் கண்டுபிடிப்பு 1896 ஆண்டு விட்ட முன்னறிப்பை உறுதிப் படுத்தியுள்ளது.

பூகோளச் சூடேற்ற விளக்கமும் விவாதமும் [Global Warming Definitions & Debate]

ஆர்க்டிக் வட்டாரத்தைத் துணைக்கோள் கண்காணித்த உளவுகள், பூகோளச் சூடேற்றம் மெய்யானது என்று நிரூபித்ததுடன், அடுத்து வரும் 100 ஆண்டுகளில் முந்தைய காலத்தை விட 8 மடங்கு வேகத்தில் வெப்பச் சீற்றம் ஏறி வருகிறது என்றும் எடுத்துக் காட்டியுள்ளன! கடற்பனி உருகுவதால் கடல் மட்டம் உயராது. காரணம், கடற்பனிக் குன்றுகள் கடலில் மிதக்கின்றன. ஆனால் கிரீன்லாந்தின் நிலப்பகுதிப் பனிக் குன்றுகள் முழுதும் உருகினால் கடல் மட்டம் 7 மீடர் வரை [சுமார் 25 அடி] ஏறிவிடலாம் என்று அஞ்சப் படுகிறது! ஆனால் அவ்விதம் பனிக்குன்றுகள் யாவும் கிரீன்லாந்தில் உருக 1000 ஆண்டுகள் கூட ஆகலாம்!

மார்க் ஸெர்ரீஸ் [Mark Serreze, University of Colorodo]

முன்னுரை: முதல் உலக யுத்தத்தின் போது, 1914-1918 ஆண்டுகளில் போர்க் கைதியாக புடாபெஸ்ட்டில் [ஹங்கேரி] சிறைப்பட்ட யுகோஸ்லாவின் பூதளவியல் விஞ்ஞானி மிலுடின் மிலோன்கோவிச் [Geophysicist, Milutin Milankovitch] உறுதியாகக் கண்டறிந்தது இதுதான்: பண்டையக் காலநிலை மாறுபாடுகளுக்கு ஒரு முக்கியக் காரணம், பூகோளத்தின் மீது படும் பரிதியின் கதிர்வீச்சுகள் [Solar Radiations] கோடைக் குளிர் காலத்துக்கும், மட்டத் தளத்துக்கும் [Earth’s Season & Lattitude] ஏற்றபடி மாறுகின்றன! பூகோளம் தன்னச்சில் சுழன்று கொண்டு, பரிதியை ஏறக்குறைய வட்டமான வீதியில் வலம் வருகிறது! வட்ட வீதி சற்று நீண்டு நீள்வட்ட வீதியாகி [Circular Orbit –> Eliptical Orbit –> Circular Orbit] மறுபடியும் வட்டவீதிக்கு மீள்கிறது! இது முதல் மாறுதல். ஆனால் பூமி தானே சுற்றும் அச்சு செங்குத்தாக இல்லது தற்போது 23.5 டிகிரி சாய்ந்து உள்ளது. அதன் அச்சின் கோணமும் 21.5 முதல் 24.5 டிகிரி [Angle of Tilt 21.5 –> 24.5 –> 21.5] மாறுபடுகிறது. இது இரண்டாவது மாறுதல். அடுத்து பூமியின் சுழல் அச்சுத் தலையாட்டும் சுழல் பம்பரம்போல் “தலையாட்டம்” [Precession or Spin Axis Wobble] செய்கிறது! இது மூன்றாவது மாறுதல். அம்மூன்று வேறுபாடான பூகோள நகர்ச்சியும், சுழற்சியும், ஆட்டமும் பல்லாயிரம் ஆண்டுகளுக்கு ஒருமுறை மீளும் சுற்றுகளாக [Repeat Rhythmic Cycles] வந்து, வந்து பரிதியின் வெப்பசக்தியை உறிஞ்சியும், புறக்கணித்தும் பூமியைப் பனிக்கோளாகவும், சூட்டுக் கோளாகவும் மாற்றி வருகின்றன என்று மிலன்கோவிச் எடுத்துக் கூறினார்! பரிதியின் கதிர் வெப்பம் பூகோளத்தின் துருவப் பிரதேசங்களில் குன்றும் போது, வாயுக்களில் சேர்ந்துள்ள நீர்மை ஆவி நீராய்ப் படிந்து பனிப்பாறைகள் ஒன்றின் மீது ஒன்றாய் அடுக்கப்படுகின்றன.

கிரீன்ஹவுஸ் உன்னத நிபுணர் ஸ்டீ·பென் ஷ்னைடெர்

கிரீன்ஹவுஸ் உன்னத நிபுணர் [Stephen Schneider, Greenhouse Superstar] என அழைக்கப்படும் ஸ்டீ·பன் ஷ்னைடெர் என்ன மாதிரி மனிதர்? என்ன மாதிரி விஞ்ஞானி? என்ன மாதிரி காலநிலைக் கண்காணிப்பாளி? ஷ்னைடெர் எப்போதும் சூடேறும் பூகோளத்தைப் [Global Warming] பற்றிப் பறைசாற்றுபவர் அல்லர்! அதற்கு மாறாக அவர் குளிராகும் பூகோளத்தை [Global Cooling] விளக்கி 1978 ஆண்டு வரை எச்சரித்து, மீளப் போகும் பனியுகத்தைப் [Ice Age] பற்றி வியப்பாக அறிவுரை ஆற்றி வந்தார்! “அடுத்து வரப் போகும் 100 ஆண்டுகளுக்குள் உலகம் முழுவதையும் தழுவப் போகும் தீவிரமான குளிர்மண்டலம் தோன்ற நிச்சயமான தொரு வாய்ப்புக்கு ஏது உள்ளது,” என்று 1970 ஆண்டுகளில் ஷ்னைடெர் பல இடங்களில் உரையாற்றி வந்தார். அவரது வியப்பான கொள்கையை அமெரிக்க விஞ்ஞானக் கழகமும் [US National Academy of Sciences] அப்போது ஏற்றுக் கொண்டிருந்தது!

சூழ்வெளி வாயு மண்டலத்தில் கார்பன் டையாக்ஸைடு மிகையாகச் சேரச் சேர பூதள உஷ்ணம் கூடினாலும், உஷ்ணம் ஏறிடும் வீதம் கார்பன் டையாக்ஸைடு மிகை அளவால் குறைந்து வருகிறது [Rate of temperature raise in the atmosphere diminishes with increasing CO2 content] என்பது ஷ்னைடெரின் தர்க்கம்! ஆனால் அதற்கு எதிராக வாயு மண்டலத்தில் சேரும் தூசிகளின் [Aerosols] சேர்க்கை, வாயுவின் திணிவை [Density] அதிகரித்தாலும், பூதளத்தின் உஷ்ண ஏற்றத்தைக் குறைக்கிறது என்பது ஷ்னைடெரின் அடுத்த தர்க்கம்! உதாரணமாகப் பூகோள வாயு மண்டலத்தில் 4 மடங்கு தூசி மிகையானால், பூதளத்தின் உஷ்ணத்தை 3.5 டிகிரி கெல்வின் அளவு குறைக்கிறது! தூசிகள் சேரும் அப்போக்குப் பல ஆண்டுகள் நீடித்தால், உலகம் முழுவதிலும் குன்றிய தள உஷ்ணத்தால், பனியுகம் தூண்டப்படும் தருணம் திரும்பலாம் என்பதே ஷ்னைடெரின் ஆராய்ச்சி. குளிர்ச்சியாகும் பூகோளம் [Global Cooling] என்னும் அந்தக் கொள்கையே ஷ்னைடெரின் வாயுரையாகவும் வெளியாகிக் கொண்டு வந்தது!

1990 ஆம் ஆண்டில் ஷ்னைடெர் பிரிட்டிஷ் டெலிவிஷன் நேர்காணலில் கூறியது முற்றிலும் மெய்யானது! “நாம் அறிவோம், 20,000 ஆண்டுகளுக்கு முன்பு கடந்த பனியுகத்தின் போது பூமி குளிர்ந்து போயிருந்தது! அப்போது வாயு மண்டலத்தில் தற்போதைய CO2 அளவை விட, (அதாவது தொழிற் புரட்சிக்கு முன்பாக) 25% குன்றி யிருந்தது. மேலும் அப்போது மீதேன் வாயும் [Methane Gas] 50% குறையாக இருந்தது. ஆகவே பனியுகத்திலும், குறைவான கிரீன்ஹவுஸ் வாயுக்கள் பரவி யிருந்தன என்பது உறுதியாக்கப் படுகிறது.

கடந்த 160,000 ஆண்டுகள் முதலாக சென்ற பனியுகம் உட்படத் தற்காலம் வரையில் சூழ்மண்டலத்தில் பரவி யிருந்த கார்பன் டையாக்ஸைடு வாயுவின் அளவையும், உஷ்ணத்தின் அளவையும் காலநிலை விஞ்ஞானிகள் கிரீன்லாந்து, அண்டார்க்டிகா ஆகியவற்றின் பனிக்குன்றுகளைத் துளையிட்டு மாதிரி எடுத்து அற்புதமாய்க் கணித்திருக்கிறார்கள். துளைத்தெடுத்த பனித்தண்டில் சிக்கிக் கொண்ட வாயுக் குமிழ்களை உளவி ஆராய்ந்தால், அவற்றில் உள்ள வாயுக்கள் என்ன வென்றும், எத்தனை அளவில் உள்ள தென்றும் [CO2, Methane & other Gases] அறிய முடிகிறது. அத்துடன் குமிழுக்குள் மாட்டிக் கொண்ட ஆக்ஸிஜன் வாயுவின் ஏகமூலங்களின் விகிதத்தைக் [Ratio of Oxygen Isotopes] கணக்கிட்டால் உஷ்ணத்தையும் கணிக்க முடிகிறது. அந்தக் கணிப்புகளின் மூலமாய்க் கார்பன் டையாக்ஸைடுக்கும், சூழ்வெளி உஷ்ணத்துக்கும் உள்ள ஓர் உறவுப்பாடு உறுதியாக்கப் பட்டது.

ஷ்னைடெர் கார்பன் டையாக்ஸைடுதான் குற்றவாளி எனப் பழி சுமத்தினார்! 160,000 ஆண்டுகளாக ஏறி யிறங்கி வந்த உஷ்ண, கரிவாயு அளவுகளின் வரைபதிவுக் கவனித்தால், உஷ்ண ஏற்றங்கள் CO2 மாறுபாடுகளுக்கு முன்னதாகவே ஏற்பட்டுள்ளன என்பது தெளிவாகத் தெரிய வருகிறது! அதாவது உஷ்ண மாறுபடுகளை CO2 வாயு உண்டாக்க வில்லை! CO2 மாறுபாடுகள்தான் உஷ்ண ஏற்ற யிறக்கத்தால் நேர்ந்தன என்பதே ஷ்னைடெரின் உறுதியான கண்டுபிடிப்பு! 1990 ஆம் ஆண்டில் வெளியான மற்ற அறிக்கைகளும் [Reports By: Kuo, Lindberg & Thompson] ஷ்னைடெர் கருத்தையே வலியுறுத்தின! ஆனால் ஷ்னைடெர் சொல்லாமல் விட்டது: சூழ்மண்டல உஷ்ணம், கரிவாயு ஆகிய இரண்டு மாறுபாடுகளும் ஒன்றை ஒன்று சார்ந்து உள்ளன! ஒன்றை ஒன்று மாற்றும் தன்மை படைத்து உள்ளன! அதுபோல் மற்ற வெளிப்புற வேறுபாடுகளாலும் அவை மாறுபவை என்னும் மெய்யான நியதிதான்!

ஸ்டீ·பென் ஷ்னைடெர் வாழ்க்கை வரலாறு:

ஸ்டீ·பன் ஷ்னைடெர் நியூ யார்க் நகரத்தில் 1945 ஆம் ஆண்டில் பிறந்தார். அவர் பெற்ற பட்டங்கள்: B.S., M.S. (Mech Engg), Ph.D. (Mech Engg & Plasma Physics 1971)]. பல்கலைக் கழகப் படிப்பிற்குப் பிறகு, அமெரிக்காவின் நாசா அண்டவெளிப் பயணத் துறையகத்தில் சில காலம் பணிபுரிந்து, 1972 இல் தேசீயச் சூழ்வெளி ஆய்வுக் கூடத்தில் [National Center for Atmospheric Research, Boulder, Colorado] சேர்ந்தார். 1987-1992 ஆண்டுகளில் அங்கே அகப்பிணைப்புக் காலநிலை ஏற்பாடுத் துறையின் [Interdisciplinary Climate System] அதிபராகப் பணியாற்றினார். 1992 இல் ஸ்டான்·போர்டு பல்கலைக் கழகத்தில் உயிரியல் விஞ்ஞானப் பேராசிரியராகப் [Professor of Environmental Biology & Global Change] பதவி ஏற்றார். மேலும் அவர் சூழ்மண்டல மையத்தின் முதிய நிபுணராகவும் [Senior Fellow of Center of Environmental Science] மதிப்பளிக்கப் பட்டார். அவரின் ஆய்வுப் பணிகள்: சூழ்வெளிக் காலநிலை மாறுதல் பற்றிய கம்பியூடர் கணித மாடல் அமைப்புகளும், மெய்யான நிகழ்ச்சிப் பதிவுகளை ஒப்புநோக்குதலும் ஆகும். காலநிலை மாறுபாடு [Climate Change] வெளியீட்டு இதழின் படைப்பு ஆசிரியரும் அவரே! அவரது ஆராய்ச்சி வெளியீடுகள் 450 மேற்பட்டவை. ஷ்னைடெர் ஆலோசகராக ரிச்சர்டு நிக்ஸன், ஜிம்மி கார்டர், ரொனால்¡டு ரேகன், மூத்த ஜியார்ஜ் புஷ், கிளிண்டன், இளைய ஜியார்ஜ் புஷ் அனைத்து அமெரிக்க ஜனாதிபதிகளின் அரசாங்கத்தில் பணியாற்றி யுள்ளார்.

(தொடரும்)

************************

தகவல்கள்:

Picture Credits: Time, National Geographic Magazines.

1. Time, Special Report on Global Warming [April 3, 2006]
2. Stop Thermageddon in Our Lifetime [www.thermageddon.com]
3. What is Happening to our Climate? By Samuel Matthews, National Geographic [Nov 1976]
4. The ocean An Era of Discovery National Geographic [Dec 1981]
5. Global Warming from Wikipedia.
6. Climate Change: The Human Influence Analysed By Harry N.A. Priem [Sep 15, 2000]
7. Climate Change: Projected Changes in CO2 & Climate
8. Climate Change: Sea Level Rise Due to Global Warming.
9. Is Our World Warming? By: Samuel Matthews, Senior Assistant Editor National Geographic [Oct 1990]
10 http://www.thinnai.com/sc1014051.html [Author’s Article on Katrina Damage & Evaquation]
11 Stormy Weather: Can We Link to Global Warming By: Jim Motavalli [Nov 11, 2004]
12 A Cold Hard Look at a Telltale Region Arctic By: Peter Spotts, Christian Science Monitor [Nov 18, 2004]
13 Global Warming : Definitions & Debate [http://zfacts.com/p/49print.html
14 Meltdown: Arctic Wildlife is On the Brink of Catastrophe By Steve Connor [Nov 11, 2004]
15 Discovery of Greenpeace Expedition on Greenland By: Dr. Gordon Hamilton [July 22, 2005]
16 Carbon Dioxide [CO2] & Global Warming Potential [Several Internet Reports]
17 Ecological Reports: The Data on Global Warming is Conclusive [Jan 29, 2004]
18 Third World Nears Brunt of Global Warming Impacts By: Paroma Basu [July 11, 2006]
19 Ozone Crisis, The 15 Year Evolution of a Sudden Global Emergency By: Shron L. Roan [1989]
20 Evidence for Global Warming: Degradation of Earth’s Atmosphere; Sea Level Raise; Ozone Holes; Vegetation Response By: Dr. Mitchell K. Hobish [Earth System Science]
21 Warning from Al Gore on Future, “Global Warming Called an Emergency” (June 5, 2005)
22 National Geographic: “Unlocking the Climate Puzzle [May 1998]
23 National Geographic: “Global Warming” Your Vacation May Never Be the Same, The Climate Bomg By: Jonathan Tourtellot [July-Aug 2006]
24 Macleans Magazine: Now with the Weather -Al Gore [May 22, 2006]
25 Pledge to See “An Incovenient Truth” Movie [May 27, 2006]
26 Milankovitch Cycles: Changes in Earth-Sun Interaction By: Matt Rosenberg
27 Astronomical Theory of Climate Change -NOAA Paleoclimatology Program [Sep 9, 2003]
28 Anandu Vernekar Home Page Biographical Sketch [www.atmos.umd.edu/~adv/]
29 Sun, Not Carbon dioxide, is the Primary Driver of Ice Ages; Carbon dioxide is only a Secondary Driver [A New Theory (July 24, 2006)]
30 Milankovitch Theory, Ice Age & Glaciation from: Wikipedia
31 Earth Science & The Environment By: Graham Thompson, Ph.D. & Jonathan Turk, Ph.D. [1993]

******************

jayabarat@tnt21.com [August, 10 2006]

Series Navigation

சி. ஜெயபாரதன், கனடா