சூடேறும் கோளம், மேலேறும் கடல் உஷ்ணம், உருகிடும் பனிப்பாறை, ஓஸோன் துளைகள், தாக்கிடும் இயற்கைச் சீற்றங்கள்-5

This entry is part of 20 in the series 20060721_Issue

சி. ஜெயபாரதன் B.E.(Hons) P.Eng (Nuclear) கனடா


ஓரிடத்தில் எரிமலை கக்கி
உலகெங்கும் பரவும்
கரும்புகைச் சாம்பல்!
ஓஸோன் குடையில்
ஓட்டை விழுந்து,
உருக்குலையும் உயிரினத் தோல்கள்!
துருவப் பனிமலை
உருகிக்
கண்ணீர் நதிகள் ஓடும்!
பருவக் காலநிலை
தாளம் தடுமாறிப்
பெரும்புயல் தாக்கும்,
பேய்மழை அடிக்கும்,
நிலப்பகுதி நீர்மய மாகும்!
உணவுப் பயிர்கள் சேதமாகும்!
மனித நாகரீகம் நாசமடைய,
புனித வாழ்வு வாசமிழக்க
முனைந்து வரும்,
வெப்ப யுகப் பிரளயம்,
வீட்டு வாசலில் நிற்குதடா!

“உலகத்தின் ஜனத்தொகைப் பெருக்கம் 2050 ஆம் ஆண்டில் 9.1 பில்லியனாக ஏறப் போகிறது! அதனால் எரிசக்தி, நீர்வளம், நிலவளம், உணவுத் தேவைகள் பன்மடங்கு பெருகிப் பூகோளச் சூடேற்றத்தை மிகையாக்கப் போகின்றன. 15 ஆண்டுகளில் கிலிமன்ஞாரோ சிகரத்தில் [Mount Kilimanjaro, Tanzania, Africa] பனிச்சரிவுகள் ஏதுவு மில்லாமல் காணாமல் போய்விடும்! அமெரிக்காவில் உள்ள மான்டானா தேசியப் பூங்காவின் பனிச்சரிவுகள் தெரியாமல் போய் 20 ஆண்டுகளில் வெறும் பூங்காவாக நிற்கும். சுவிட்ஸர்லாந்தில் உள்ள ரோன் பனிச்சரிவுகள் ஏறக்குறைய மறைந்து விட்டன! அண்டார்க்டிகாவின் மேற்குப் பகுதியில் பாதியளவு பனிப்பாறைகள் உருகிப் போயின! அதுபோல் கிரீன்லாந்தில் அரைப் பகுதி பனிக் குன்றுகள் கரைந்து விட்டன! நியூ ஆர்லியன்ஸ் நகரை ஏறக்குறைய கடல்நீரும், நதிநீரும் மூழ்க்கி நாசமாக்கி நகர் மாந்தரைப் புலப்பெயர்ச்சி செய்து விட்டது! வன்முறை மூர்க்கருக்கு மட்டுமா அமெரிக்கர் கவலைப் பட வேண்டும்? அந்தப் பயமுறுத்தல் ஒன்றுதானா நமது கவனத்தைக் கவர வேண்டும்? நமது நாகரீக வாழ்வும், பூகோளமும் மோதிக் கொண்டிருப்பதை மெய்யெனக் கண்டு நாம் சாட்சியம் கூறி நிற்கிறோம்.”

அமெரிக்கன் செனட்டர் அல் கோர் [Al Gore, American Former Senator/Vice President (June 5, 2005)]

1974 ஆம் ஆண்டில் காலி·போர்னியாவின் பல்கலைக் கழகத்தின் இரண்டு ரசாயன வல்லுநர், ஷெர்வுட் ரோலாண்டு, மாரியோ மொலினா ஆகியோர் முதன்முதலில் தொழிற்சாலைகளில் தயாரிக்கப்படும் “குளோரோ புளுரோ கார்பன் கூட்டுகள்” [Chloro Fluro Carbon (CFC) Compounds] மெதுவாக சூழ்வெளி வாயு மண்டலத்தை அண்டி, 15 மைல் உயரத்தில் பரவிய மிருதுவான ஓஸோன் பாதுகாப்புக் குடையைச் சிதைப்பதாகக் கண்டறிந்தார்கள். அவரது கோட்பாடு மெய்யென்று 1976 இல் நிரூபிக்கப் பட்டு, உலக நாடுகளில் உற்பத்தியாகும் CFC கூட்டுகள் நிறுத்தமாகிப் பில்லியன் டாலர் பெருமான ரசாயனத் திரவ/வாயுக் கூட்டுகள் பாதிக்கப் பட்டுள்ளன.

ஷாரன் ரோவன் விஞ்ஞான எழுத்தாளி [Sharon Roan, Author of the Book: “Ozone Crisis” (1989)]

“பூகோளத்தில் வாழும் மாந்தர்கள் புறக்கணிக்கப்பட வேண்டிய ஒரு மாபெரும் அசுரச் சூழ்மண்டலச் சோதனையை [CFC Production] அமைதியாகச் செய்து வருகிறார்கள்! அந்த சோதனை தவிர்க்கப் பட்டிருக்கலாம். அதற்குப் பதிலாக அதன் பாதிப்புகளைத் தாங்கிக் கொண்டு அடுத்து 150 ஆண்டு காலம் வாழலாம்.”

ஷெர்வுட் ரோலாண்டு, மாரியோ மொலினா [Sherwood Rowland & Mario Molina]

1990 ஆண்டில் பிரென்ச், ரஷிய விஞ்ஞானிகள் அண்டார்க்டிகாவின் தென்துருவத்தில் 1.5 மைல் நீளமான பனித்தண்டைத் தோண்டி எடுத்து 400,000 ஆண்டுகளாக மீண்டும் மீண்டும் தோன்றி மாறிய நான்கு பனியுகங்களின் கரியமில வாயுவை [CO2 in Four Ice-Age Cycles] ஆய்ந்தனர். அந்தச் சோதனையில் உஷ்ணம் ஏற, ஏற கரியமில வாயுவின் கொள்ளளவு படிப்படியாகக் குறைந்து [மூன்றில் ஒரு பங்கு] வந்திருக்கிறது என்று அறியப்பட்டது. காரணம் மற்ற கிரீன்ஹவுஸ் வாயுக்கள் CO2 உடன் மாறி யிருக்க முடியும் என்று எளிதாகக் கருத வழி யிருக்கிறது. அந்த அரியக் கண்டுபிடிப்பு 1896 ஆண்டு விட்ட முன்னறிப்பை உறுதிப் படுத்தியுள்ளது.

பூகோளச் சூடேற்ற விளக்கமும் விவாதமும் [Global Warming Definitions & Debate]

ஆர்க்டிக் வட்டாரத்தைத் துணைக்கோள் கண்காணித்த உளவுகள், பூகோளச் சூடேற்றம் மெய்யானது என்று நிரூபித்ததுடன், அடுத்து வரும் 100 ஆண்டுகளில் முந்தைய காலத்தை விட 8 மடங்கு வேகத்தில் வெப்பச் சீற்றம் ஏறி வருகிறது என்றும் எடுத்துக் காட்டியுள்ளன! கடற்பனி உருகுவதால் கடல் மட்டம் உயராது. காரணம், கடற்பனிக் குன்றுகள் கடலில் மிதக்கின்றன. ஆனால் கிரீன்லாந்தின் நிலப்பகுதிப் பனிக் குன்றுகள் முழுதும் உருகினால் கடல் மட்டம் 7 மீடர் வரை [சுமார் 25 அடி] ஏறிவிடலாம் என்று அஞ்சப் படுகிறது! ஆனால் அவ்விதம் பனிக்குன்றுகள் யாவும் கிரீன்லாந்தில் உருக 1000 ஆண்டுகள் கூட ஆகலாம்!

மார்க் ஸெர்ரீஸ் [Mark Serreze, University of Colorodo]

பூகோளக் காலநிலைப் போக்கை மனிதரின் சீர்கேடான செயல்கள் மாற்றிக் கொண்டு வருகிறது! கரியமில வாயு, மற்ற கிரீன்ஹவுஸ் வாயுக்களின் கொள்ளளவு பூமண்டலக் காற்றில் மிகையாகும் போது, பூமியின் காலநிலையில் சூடேறுகிறது! கடந்த நூற்றாண்டில் கிரீன்ஹவுஸ் வாயுக்களும், மற்ற மனிதச் செயல்களும் புரிந்த காலநிலை மாறுபாடுகளும், வருங்காலத்தில் நிகழப் போகும் எதிர்பார்ப்புகளும் மனித இனத்துக்குத் தீங்கிழைக்கப் போகும் மெய்யான பிரச்சனைகள்!

அமெரிக்கன் பூதளப் பௌதிகக் குழுவகம் [American Geophysical Union (Dec 2003]

முன்னுரை: பரிதியின் வெப்பநிலைச் சீராகச் சுற்றிலும் நிலைபெறப் பிரம்மாண்டமான ஒரு வாயுக் கோளம், எப்போதும் பூமிக்குக் குடைபிடித்து வருகிறது! வாயுக் குடையில் வாயுக்களின் கொள்ளளவுக் [Volume] கூடிக் குறையும் போது, பூமியில் படும் பரிதியின் உஷ்ணமும் ஏறி, இறங்குகிறது! அந்த வாயு மண்டலத்தில் இயற்கை ஊட்டியுள்ள வாயுக்களைத் தவிர, புதிதாகப் பூமியிலிருந்து கரியமில வாயு [Carbon Dioxide] போல் வேறு வாயுக்களும் சேர்ந்தால் வாயுக்களின் திணிவு [Density] மிகையாகிறது! வாயுக்களின் திணிவு அதிகமாகும் போது, பரிதியின் வெப்ப சேமிப்பும் மிகுந்து, அதன் உஷ்ணமும் கூடுகிறது. அந்தச் சீர்கேடுதான் “கிரீன்ஹௌஸ் விளைவு” அல்லது “கண்ணாடிக் கோட்ட விளைவு” [Greenhouse Effect] என்று குறிப்பிடப் படுகிறது. அந்த உஷ்ணப் பெருக்கால் கடல் நீரின் வெப்பம் அதிகரிக்கிறது! அந்த வெப்ப எழுச்சியால் துருவப் பகுதியில் உறைந்திருக்கும் பனிப்பாறைகள் உருகிக் கடல் மட்டம் உயர்ந்து, கடற்கரைப் பகுதிகள் உப்பு நீரில் மூழ்கி நிலவளம் பாழ்படும். அல்லது சி.எ·ப்.சி [Chloro Fluoro Carbons (CFC)] போன்ற பூமி வாயுக்கள் மேலே பரவிப் பாதுகாப்பாய் உள்ள ஓஸோன் பந்தலில் துளைகளைப் போட்டால், பரிதியின் தீய புறவூதாக் கதிர்கள் பூமியில் பாய்ந்து சேதம் விளைவிக்கும்.

21 ஆம் நூற்றாண்டின் முடிவில் கிரீன்ஹவுஸ் வாயுக்களின் பெருக்கத்தால், பூகோளத்தின் உஷ்ணம் 6 டிகிரி F ஏறிவிடும் என்று உலக உடல்நலப் பேரவை மதிப்பிடுகிறது! அதனால் பேரளவு வெள்ளங்கள், பஞ்சம், வெப்ப அலைகள் [Heat Waves] எழுலாம் என்றும் பேரவை கூருகிறது. உலக உடல்நலக் கண்காணிப்புப் பேரவை [World Heath Organization (WHO)] சமீபத்தில் உளவறிந்து வெளியான ஓர் அறிவிப்பின்படி, மனிதத் தூண்டல் மாறுதல்களால் ஏற்பட்டச் சூழ்வெளிக் காலநிலைப் பாதிப்புகளால் மாந்தருக்கு நேரும் 5 மில்லியன் மாறுபட்ட நோய்களில் 150,000 நபர் ஒவ்வோர் ஆண்டும் மரணம் அடைகிறார் என்னும் அதிர்ச்சியான தகவல் கிடைத்துள்ளது! சூடேறிய சூழ்வெளியின் வெப்ப அலைகளாலும், நாட்டில் புயலடித்துப் பேய்மழைகள் பெய்து வெள்ளக்காடாய் ஆவதாலும் மாந்தருக்குத் துர்நீரால் பல்வேறு தொற்று நோய்கள் பீடிக்கின்றன வென்று விஞ்ஞானிகள் கருதுகிறார்கள்!

சூடேறும் பூகோளம் பற்றி முன்னாள் துணை ஜனாதிபதி அல் கோர்

பல்லாண்டுகள் பொய்யென ஒதுக்கணிக்கப்பட்ட பூகோளச் சூடேற்றமும், சூழ்வெளி ஓஸோன் வாயுக் குடையில் இழப்பும் தற்போது அகில நாடுகளின் கவனத்தைக் கவர்ந்திருக்கிறது! ஓஸோன் பிரச்சனையைத் தீர்க்க அகில நாடுகள் கூட்டு ஒப்பந்தம் செய்து பெருத்த மாறுதல்கள் புரிய முனையும் போது, அமெரிக்கா தீவிரப் பங்கு எடுத்துக் கொள்ளாமல் வாளா விருக்கிறது! ஓஸோன் குறைபடுகளால் தீங்கு நேர்வதைக் காட்டும் போது மக்கள் புனைகதையாகப் புறக்கணிக்காமல் காதுகொடுத்துக் கேட்கிறார்கள். கடந்த பத்தாண்டுகளாக (1979-1989) நம்மைப் பாதித்த மாபெரும் அந்த ஓஸோன் சிக்கலுக்கு தீர்வு பெறுவது, மானிடருக்குப் பெரும் சவாலாகப் போகிறது! அமெரிக்காவில் ஓஸோன் பிரச்சனைக்கு ஓரளவு தீர்வு காண, சில ரசாயனப் பண்டங்களை உற்பத்தி செய்யக் கூடாதென்று கருத காங்கிரஸ் பேரவை முன் வந்திருப்பது வரவேற்கத் தக்கது. அவை ஓஸோனை விழுங்கும் “குளோரோ புளோரோ கார்பன்ஸ்” [Chloro Fluro Carbons (CFC)]

ஷாரன் ரோவன் விஞ்ஞான எழுத்தாளியின் எண்ணங்கள்

1974 ஆம் ஆண்டில் காலி·போர்னியாவின் பல்கலைக் கழகத்தின் இரண்டு ரசாயன வல்லுநர், ஷெர்வுட் ரோலாண்டு, மாரியோ மொலினா ஆகியோர் முதன்முதலில் தொழிற்சாலைகளில் தயாரிக்கப்படும் “குளோரோ புளுரோ கார்பன் கூட்டுகள்” [Chloro Fluro Carbon (CFC) Compounds] மெதுவாக சூழ்வெளி வாயு மண்டலத்தை அண்டி, 15 மைல் உயரத்தில் பரவிய மிருதுவான ஓஸோன் பாதுகாப்புக் குடையைச் சிதைப்பதாகக் கண்டறிந்தார்கள். அவரது கோட்பாடு மெய்யென்று 1976 இல் நிரூபிக்கப் பட்டு, உலக நாடுகளில் உற்பத்தியாகும் CFC கூட்டுகள் நிறுத்தமாகிப் பில்லியன் டாலர் பெருமான ரசாயனத் திரவ/வாயுக் கூட்டுகள் பாதிக்கப் பட்டுள்ளன. ஓஸோன் வாயுக் குடை பரிதியின் தீவிர புறவூதா கதிர்களை [Ultra Violet Rays] வடிகட்டி, பூதளத்தில் மானிடருக்கு தோல் புற்று நோய்கள் வராமல் தடுக்கும்.

ஓஸோன் வாயுக் குடையில் 1% கொள்ளளவு குன்றினால், புறவூதாக் கதிர்கள் மிகையாகி மெலனோமா வில்லாத புற்றுத்தோல் நோய் [Non-melanoma Skin Cancer] 5%-6% கூடலாம் என்று எதிர்பார்க்கப் பட்டது. 1985 ஆம் ஆண்டில் திடீரென்று ஏதோ காரணத்தால் அண்டார்க்டிகாவின் வானில் ஏறக்குறையப் பாதியளவு ஓஸோன் மாயமாய் மறைந்தது! 1988 இல் அதுபோல் ஜன நெருக்கமான வடபுறக் கோளத்தின் [Northern Hemisphere] வானில் 3% ஓஸோன் குன்றி விட்டதாக விஞ்ஞானிகள் கண்டறிந்தார்கள்! 1987 ஆம் ஆண்டில் 85% CFC கூட்டுகள் உற்பத்தி நிறுத்தப்பட வேண்டும் என்று அகில நாட்டு ஒப்பந்தம் தயாரானது.

(தொடரும்)

************************

தகவல்கள்:

Picture Credits: Time, National Geographic Magazines.

1. Time, Special Report on Global Warming [April 3, 2006]
2. Stop Thermageddon in Our Lifetime [www.thermageddon.com]
3. What is Happening to our Climate? By Samuel Matthews, National Geographic [Nov 1976]
4. The ocean An Era of Discovery National Geographic [Dec 1981]
5. Global Warming from Wikipedia.
6. Climate Change: The Human Influence Analysed By Harry N.A. Priem [Sep 15, 2000]
7. Climate Change: Projected Changes in CO2 & Climate
8. Climate Change: Sea Level Rise Due to Global Warming.
9. Is Our World Warming? By: Samuel Matthews, Senior Assistant Editor National Geographic [Oct 1990]
10 http://www.thinnai.com/sc1014051.html [Author’s Article on Katrina Damage & Evaquation]
11 Stormy Weather: Can We Link to Global Warming By: Jim Motavalli [Nov 11, 2004]
12 A Cold Hard Look at a Telltale Region Arctic By: Peter Spotts, Christian Science Monitor [Nov 18, 2004]
13 Global Warming : Definitions & Debate [http://zfacts.com/p/49print.html
14 Meltdown: Arctic Wildlife is On the Brink of Catastrophe By Steve Connor [Nov 11, 2004]
15 Discovery of Greenpeace Expedition on Greenland By: Dr. Gordon Hamilton [July 22, 2005]
16 Carbon Dioxide [CO2] & Global Warming Potential [Several Internet Reports]
17 Ecological Reports: The Data on Global Warming is Conclusive [Jan 29, 2004]
18 Third World Nears Brunt of Global Warming Impacts By: Paroma Basu [July 11, 2006]
19 Ozone Crisis, The 15 Year Evolution of a Sudden Global Emergency By: Shron L. Roan [1989]
20 Evidence for Global Warming: Degradation of Earth’s Atmosphere; Sea Level Raise; Ozone Holes; Vegetation Response By: Dr. Mitchell K. Hobish [Earth System Science]
21 Warning from Al Gore on Future, “Global Warming Called an Emergency” (June 5, 2005)
22 National Geographic: “Global Warming” Your Vacation May Never Be the Same, The Climate Bomg By: Jonathan Tourtellot [July-Aug 2006]

******************

jayabarat@tnt21.com [July 20, 2006]

Series Navigation

சி. ஜெயபாரதன், கனடா