செர்நோபில் அணுமின் உலை விபத்தில் உலகெங்கும் பரவிய கதிரியக்கம் -3

This entry is part of 39 in the series 20060512_Issue

சி. ஜெயபாரதன் B.E.(Hons) P.Eng (Nuclear) கனடா


நினைக்கிறாயா பலியானவரை,
செர்நோபில் விபத்துக் கிரையானவரை?
எனதரும் தோழி எவினீயா, யூரி, ஈகோரின்
கவலை முகங்களை நினைக்கிறாயா?
அவரின் கூந்தல், அவரின் கண்கள்
உனது நெஞ்சில் என்றும் நிலை யாகட்டும்!

கெலன் வாக்கர் [Helen Walker, “In the Memory of Evgeniya (July 2, 1995)]

“நம் நாட்டின் எதிர்காலம் பூராவும் சீர்கேடாகி விட்டது! சமாதான காலத்தில் தாக்கிய அணு ஆயுதம் போல செர்நோபில் விபத்து நிகழ்ந்து விட்டது! அதன் துன்பமய விளைவுகளின் தீவிரத் துவக்கத்தை இப்போதுதான் காண்கிறோம்.”

பீடர் கிரவ்ஷங்கா [பெலாரஸ் நாட்டு முன்னாள் வெளித்துறை அமைச்சர்]

“நகரிலிருந்து 30 மைல் தூரத்தில் உள்ள சிறு அணுமின் நிலையம் ஒன்றில் பெரும் விபத்து நேர்ந்தால், சுமார் 3400 பேர் மரணம் அடையலாம்! கதிரியக்கத்தால் 43,000 நபருக்குத் தீவிரத் தீங்குகள் விளையலாம்! நகரப் புறத்திலும், நிலவளத்திலும் ஏற்படும் பொருட் சேதம் சுமார் 7 பில்லியன் டாலர் நிதி விரையத்தை உண்டாக்கும்.”

அமெரிக்க அணுசக்திப் பேரவை அறிவிப்பு [US Atomic Energy Commission Brookhaven Report (1957)]

“சோவியத் யூனியனிலிருந்து பிரிந்து விடுதலையான நாடுகளில் பழைய ரஷ்ய விஞ்ஞானப் பொறியியல் நிபுணர்கள் டிசைன் செய்து கட்டி இயங்கிக் கொண்டிருக்கும் பல அணு உலைகள், டிசைன் கோளாறுகளாலும், நிதியிருப்பு பற்றாமையாலும், நிர்மூலமாகும் பொருள்வளத்தாலும், அரசாங்கக் கொந்தளிப்பாலும், அணுசக்திக் கட்டுப்பாடு நெறியாளர் தளர்ச்சியாலும், காணாத கண்காணிப்பாலும், புறக்கணிப்பாலும் பாதுகாப்பு முறைகளில் சீர்கேடாகிச் செர்நோபில் போல் விபத்துகள் நேர்ந்து அபாயம் விளைவிக்க வாய்ப்புக்கள் உள்ளன!

அமெரிக்க அணுவியத் துறை ரகசிய அறிக்கை [US Dept of Energy Intelligence Report (1995)]

“மனித இனத்துக்கு அணுமின்சக்தி மிகவும் தேவைப் படுகிறது என்பது என் தனிப்பட்ட கருத்து. அவை விருத்தி செய்யப்பட்டு மக்களுக்கு முழுமையான பாதுகாப்பு அளிப்பவை என்று உறுதிப்பாடாக வேண்டும். அதாவது அணு உலைகள் யாவும் பூமிக்கடியில் நிறுவப்பட வேண்டும். அகில நாடுகளின் பேரவை தாமதமின்றி அணு உலைகள் எல்லாம் அடித்தளங்களில் நிறுவப்பட சட்டமியற்ற வேண்டும்.”

“செர்நோபிலில் மெய்யாக நடந்தவை” என்னும் கிரிகொரி மெத்வெதேவ் [The Truth About Chernobyl By: Grigori Medvedev] எழுதிய நூலில் தீயணைப்பாளிகள், எஞ்சினியர்கள், இயக்குநர்கள் எப்படித் தீவிரமாக முன்வந்து உழைத்து விபத்தின் கோரத்தைத் தம்மால் முடிந்த அளவு குறைத்து உயிர் நீத்தார்கள் என்பது தெளிவாகக் கூறப்பட்டிருக்கிறது.”

ஆன்டிரே ஸெக்காரோவ் [Andrei Sakharov, Russian Nobel Laureate (May 1989)]

முன்னுரை: 1993 ஆண்டு டோக்கியோவில் நடந்த G-7 உலகக் கூட்டு நாடுகளின் பேரவையில் “அணு உலை விபத்துகள் அதிகமாக நேரும் வாய்ப்புள்ள நாடுகளில் அபாயக் குறைப்புகளைப் பற்றி விவாதம் நிகழ்ந்தது. ரஷ்யாவில் இயங்கிக் கொண்டிருக்கும் விபத்து மிகையாக வாய்ப்புள்ள அணு உலைகள்: செர்நோபில் மாதிரி உள்ள RMBK மாடல்கள்: 15. அடுத்து VVER (440-230) மாடல்கள்: 11. ரஷ்ய டிசையினில் தயாராகி அணுமின் உலைகள் கட்டப் பட்டுள்ள நாடுகள்: ஆர்மீனியா, பல்கேரியா, லிதுவேனியா, யுக்ரேயின், ஸ்லோவேகியா, ரஷ்யா. அந்த அணு உலைகளில் நேர்ந்திடக் கூடிய அபாய எதிர்பார்ப்புகளின் தீவிரத்தைக் கணித்து, கீழ்நிலை, நடுநிலை, உயர்நிலை [Low, Medium, High Risk] என்று மூன்று தரங்களில் அபாய வாய்ப்பு உலைகள் பிரிக்கப்பட்டு விபத்துகளின் தடுப்பு, குறைப்பு, மீட்சி, மேன்மை முறைபாடுகள் ஆராயப்பட்டன. மேலும் விபத்துக்கள் நேர்ந்திடக் காத்துக் கொண்டிருக்கும் அணு உலைகளின் ஆயுட்காலம் சுருக்கப்பட்டு மூடும் காலங்களும் முத்திரை அடிக்கப்பட்டன. சோவியத் ரஷ்யாவின் கரங்கள் கட்டிய நான்கு அபாயகரமான அணுமின் நிலையங்கள்: 1. செர்நோபில் [Ukraine], 2. கொஸ்லோடுயி [Kozloduy, Bulgeria], 3. கோலா [ரஷ்யா] 4. இகனாலினா [Iganalina, Armenia].

1990 ஆண்டுகளின் மத்திமக் காலங்களில் அவற்றின் மின்சாரப் பரிமாறுமிழப்பை ஈடுசெய்ய பிறமுறை எரிசக்தி நிலையங்களும் நோக்கப்பட்டன. அடுத்து அணுமின்சக்தி நிலையங்களின் பாதுகாப்பு ஏற்பாடுகள் ஆழ்ந்து உளவப்பட்டுப் பேரளவு நிதிச் செலவில் செம்மைப் படுத்தப்பட்டன. அவ்விதப் பணிகள் செய்ய கீழ்நிலை அபாயப் பாதுகாப்பு உலைகளுக்கு 1993 ஆண்டு முதல் 2000 வரை ஆண்டுக்கு 2.3 பில்லியன் வீதம், மொத்தம் 18 பில்லியன் டாலர்கள் தேவைப் பட்டன! அதே சமயத்தில் நடுநிலை, உயர்நிலை அபாயம் எதிர்பார்க்கப்படும் அணு உலைகள் செம்மை யாக்கப்பட 24 பில்லியனும், புதிதாகக் கட்டப்படுபவை சீராக்கப்பட்டு முடிவு பெற 25 பில்லியனும் செலவாகும் என்று மதிப்பீடு செய்யப்பட்டது. பாதுகாப்புக் கோட்டை அரண்களற்ற செர்நோபில் நிலையத்தின் நான்கு யூனிட்களும் நிரந்தரமாய் 2000 ஆண்டுக்குள் மூடப்பட்டன! ஆர்மீனியாவில் மெட்ஸாமர் யூனிட் 1 & 2 அணுமின் நிலையங்கள் 1989 ஆண்டில் நிறுத்தமாகிச் செம்மைப் படுத்தப் பட்டு 1995-1997 ஆண்டுகளில் மீண்டும் இயங்க ஆரம்பித்தன!

செர்நோபில் விபத்தில் விளைந்த உடல்நலச் சீர்கேடுகள்:

பெலரஸ்ஸின் மருத்து நிபுணர்கள் செர்நோபில் விபத்தால் விளைந்த நோய்களைச் சோதித்து மக்களின் உடல்நலச் சீர்கேடுகளைக் குறிப்பிட்டுப் பின்வருமாறு பதிவு செய்திருக்கிறார்கள்:

1. பெலரஸ் நாட்டில் புற்று நோய், இரத்த நோய்த் தாக்குதல் 100% மிகையானது.

2. பரம்பரை வழியாக வராது, நேராகப் பிறவழித் தாக்கலில் உண்டான பிறப்புப் பிறழ்ச்சிகள் [Congenital Birth Deformities] 250% அதிகமாயின!

3. தைராய்டு புற்றுநோயின் தாக்கல் 2400% மிகையானது!

4. கதிர்த் தீண்டலான நகர்த் தளங்களில் வீடு, நிலம், பொருள், ஆடை இழந்து புலம்பெயர்ந்தோரில் தற்கொலை மரண எண்ணிக்கை 1000% ஆக ஏறியது!

5. செர்நோபில் விபத்தால் ஸ்டிரான்ட்சியம் (Sr90 Half Life: 30 Years) கதிர்வீச்சு தாக்கி உடலியல் நோய் எதிர்ப்பு ஏற்பாடு [Body’s Immune System] பாதிக்கப்பட்டது! அதனால் நேர்ந்த நோய்களைச் “செர்நோபில் எயிட்ஸ்” [Chernobyl AIDS] என்னும் தனிப் பெயரால் மருத்துவ நிபுணர் அழைத்தனர்! ஸ்டிரான்ட்சியம் கதிர் ஏகமூலமும் [Strontium Isotope] அந்த பாதிப்புகளைக் கொடுக்கப் பெரும் பங்கேற்றது.

1995 ஆம் ஆண்டில் IAEA உதவி மூலம் ஐக்கிய நாடுகளின் பேரவை [UNICEF] தனிப்பட்ட உளவு செய்து வெளியிட்ட அறிக்கையில் பின்வரும் குறிப்புகள் பதிவாகியுள்ளன!

1. பரம்பரை வழியின்றி நேரடித் தாக்கலால் உண்டான இருதயக் குருதியோட்ட நோய்கள் [Congenital Heart & Circulatory Diseases] 25% அதிகரித்துள்ளன.

2. வயிறு, குடல் சம்பந்தப்பட்ட உணவுச் செரிப்பு ஏற்பாடுகளில் சீர்கேடுகள் மிகையாயின.

3. சாவைத் தரும் சீர்கெட்ட கட்டிகள் [Malignant Tumours] 38% பெருகின.

4. பிறப்புறுக்கள், மூத்திரப் பாதை ஏற்பாடுகளில் பாதிப்புகள் 39% மிகையாயின.

5. நரம்பிணைப்பு அமைப்புகள், உணர்வு எழுப்பும் உறுப்புகளின் சீர்கேடுகள் 43% அதிகமாயின.

6. இரத்தக் குழாய்ச் சுற்று அமைப்புகளில் நோய் 43% மிகையானது.

7. எலும்பு, தசைகள், கால் கைகளில் உள்ள பிணைப்புச் சதைகளில் கோளாறுகள் 62% அதிகரித்தன. கால் கைகளில் உள்ள பிணைப்புச் சதைகளில் கோளாறுகள் 62% அதிகரித்தன.

செர்நோபில் விபத்தால் விளைந்த உலகச் சூழ்வெளிப் பாதிப்புகள்

செர்நோபில் விபத்தால் ஏற்பட்ட பேரளவுப் பெருஞ்சேதம் நஞ்சை, புஞ்சை வயல்களில் வருடாந்தர விளைச்சல் ஏதுவும் செய்ய முடியாமல் போய் தானியத் தட்டுப்படு உண்டானதுதான்! பெலரஸ்ஸில் மட்டும் 20% விளைச்சல் நிலங்கள், 15% காட்டு வனங்கள் கதிரியக்கத் தீட்டாகிக் குறைந்தது ஒரு நூற்றாண்டுக்குப் பயன்படுத்த முடியாமல் போகும்! சோவியத் ரஷ்யாவுடன் சேர்ந்த மற்ற கூட்டு நாடுகளில் தானியங்கள் கதிர்த் தீண்டலாகித் தின்ன முடியாமல் வீணாகின! ஆடு, மாடு ஆகியவற்றின் பாலாக்கப் பதார்த்தங்கள் [Dairy Products] அனைத்தும் உண்ணப் படாமல் தவிர்க்கப் பட்டன! ஜெர்மனிக்கும் செர்நோபில் விபத்தால் நிதியும், பொருளும் விரையமாயின. உண்ண முடியாது கதிர்த் தீண்டப்பட்ட தானியப் பண்டங்களை ஒதுக்க மேற்கு ஜெர்மனிக்கு 250,000 டாலர் வீணானது! கதிரியக்கத் தாக்குதல்களால் 20 மைல் ஆரத்திற்குள் செர்நோபில் அருகே வாழ்ந்த விலங்கினங்கள், தாவர வகைகள் நேரடியாக கதிரியக்கத் தாக்கம் பெற்று நாசம் அடைந்தன!

பாதிக்கப் பட்ட நேரடிப் பகுதிகளில் வேளாண்மை விலங்கினங்களுக்கு பிறப்புக் கோளாறுகள் ஏற்பட்டன என்று அறியப்படுகிறது! ஆயிரக் கணக்கான ஏக்கர் நிலங்களின் வளமுற்ற மேல்தளமண் கதிர்த் தீண்டப் பட்டதால் அவை அனைத்தும் நீக்கப் பட்டு, மில்லியன் டன்களாய்ச் சேர்ந்து எப்படி புதைப்பது என்பது பிரச்சனையாகி விட்டது! செர்நோபில் உலைக்கு 80 மைல் தூரத்தில், 2.5 மில்லியன் மக்களுக்குக் குடிநீராகப் பயன்படும் திணைப்பர் நதியில் கதிர்த்தீட்டு படாமல் தடுக்கும் பணிகள் மிகவும் சிரமாகப் போயின! செர்நோபில் விபத்து நேர்ந்த நிலப் பகுதிகளில் கதிர்த் தீண்டப்பட்ட ஏரிகளையும், நீர்த் தேக்கங்களையும் காங்கிரீட் மதில்கள் கட்டி ஒதுக்குவதில் சிரமங்கள் இடைபட்டன! பெலரஸ், யுக்ரேயின் பகுதிகளில் வாழும் மாந்தர் இன்னும் நீர் அருந்த முடியாது! பால், மாமிசம், கனிவகை, காய்கறிகளை உண்ண முடியாது! சமாதி கட்டப்பட்ட செர்நோபில் அணு உலைச் சிதைவுகளின் கதிர்வீச்சு அடித்தள நீர் ஓட்டத்தைச் சீர்கேடாக்கும் என்று அஞ்சப்படுகிறது! பிரிட்டனில் வட வேல்ஸ், கும்பிரியா, ஸ்காட்லாந்து ஆகிய பிரதேசங்களில் கதிர்வீசும் சீஸியம் [Cesium 139] படிந்து நிலங்களில் புல்மேய்ந்த ஆயிரக் கணக்கான மந்தை ஆடுகள் கதிர்த் தீட்டாகின. அவற்றில் பாலையோ, மாமிசத்தையோ யாரும் பயன்படுத்த முடியாது. ஆறாயிரம் மைல்களுக்கு அப்பால் உள்ள கனடாவின் ரெயின்டீயர் மான்களின் மாமிசத்தப் புசித்த மனிதரின் உடல்களில் கதிரியக்கம் காணப்பட்டது!

செர்நோபில் விபத்தின் மூலம் கற்றுக் கொண்ட பாடங்கள் என்ன?

1. நியூட்ரான் பெருக்கத்தைக் குறைக்கும் சுயப் பாதுகாப்புக் கருவி ஏற்பாடுகள் மனிதக் குறுக்கீடால் முடமாக்கப் பட்டால் அணு உலைகளில் விபத்துக்கள் நேரிடும்!

2. அணு உலை இயக்க அமைப்புகள், அபாய வெப்பத் தணிப்பு, கழிவு வாயுக் கட்டுப்பாடு ஏற்பாடுகள் விபத்தின் தீவிரத்தை உடனே குறைக்கத் தானாக முன்னியங்க வேண்டும்.

3. மனிதத் தவறாலோ, யந்திர ஏற்பாடுக் குறையாலோ, பிசகாலோ விபத்துக்கள் நேர்ந்தால், கதிரியக்க வாயுக்கள், கழிவுத் திரவம் வெளியே கசியாதபடி அணு உலைக் கோட்டை அரண் வாயில்களை அடைத்துத் தடுக்க வேண்டும்.

4. அணு உலை இயக்குநர் அனைவரும் எவ்வித விபத்துகளைக் கையாளும் திறமைப் பயிற்சிகள் கொடுக்கப்பட்டுக் கதிரியக்க வெளியேற்றத்தை தடுக்கும் அணு உலை ஆட்சி வல்லமையும் பெற்றிருக்க வேண்டும்.

5. குறைந்தது முப்பது மைல் ஆரத்தில் அணு உலையைச் சுற்றி வாழுகின்ற மக்கள் விபத்து நேர்ந்தால் என்ன விளைவுகள் தம்மைத் தாக்க வாய்ப்புள்ளன என்ற விளக்கமும், தடுக்கும் முறைகள் என்ன வென்றும் அறிந்திருக்க வேண்டும்.

6. அணு உலை விபத்துகளின் விளைவுகளைப் பொறுப்புடன் பலநாட்கள் கட்டுப்படுத்திச் சீர்ப்படுத்த ஊராட்சி, நகராட்சி, மாநில அரசு, காவல் துறையினர், தீயணைப்புப் படையினர், இராணுவம் அனைத்தும் ஒருங்கே ஒத்துழைக்கப் பயிற்சிகள் அளிக்க வேண்டும்.

[தொடரும்]

தகவல்:

1. Chernobyl 20 Years On: UN Finds Impact of Reactor Disaster Much Less Than Feared, But Few are Reassured. By: Mara D. Bellaby Associated Press [Sep 5, 2005 & Apr 23, 2006]

2. A Trip to Chernobyl By Awake Writer in Ukraine “Awake” [April 2006]

3. Remember Chernobyl Day (April 26, 1986) – 20 Years After

4. Chernobyl Day Action: Wednes day (26 April 1986) By: Fang Bot [April 24, 2006] From: [http://www.chernobyl-children.com/, http://perth.indymedia.org]

5. Chernobyl Accident, Nuclear Issues Briefing Paper 22 [March 2006]

6. Children of Chernobyl Belarus “Two Decades After the Disaster, Chernobyl’s Children Struggle to Live By: Anatol Klascuk [http://indexline.org/en/news/articles/2006/belarus-childern-of-chernoby.shtml]

7. Chernobyl Radiation Still Lingering, Experts Say By: Associated Press [Nov 15, 2004]

8. Officials Worry About Chernobyl Reactor Cracking Seal By: Associated Press [April 23, 2006]

9. Chernobyl Debate Still Rages On 20th Anniversary By: Alec Gazdic CTV.ca News [Apr 24, 2006]

10 Chernobyl Death Toll Will Top 90,000: Greenpeace Report By: Associated Press [Apr 18, 2006]

11 The Truth About Chernobyl By: Grigori Medvedev [1991]

12 The Aftermath of Chernobyl By Grigori Medvedev [1993]

13 How Safe? Three Mile Island, Chernobyl & Beyond By: James Megaw [1987]

14 Nuclear Energy Agency (NEA), France: Chernobyl Assessment of Radiological & Health Impact [2002 Update]

15 Nuclear Safety & The G7 Summit Reports (1991-2000) -A Contradiction in Terms? [http://archive.greenpeace.org/~comms/nukes/chernob/rep01.html (Nov 5, 2003)]

16. Safety Benefits of Risk Assessment at the U.S. Nuclear Power Plants [http://www.nei.org/ (March 2002)]

17. Nuclear Power, From Physics to Politics By: Laurence Pringle [1979]
******************

jayabarat@tnt21.com [May 11, 2006]

Series Navigation