இதயம் சிதைந்த இயந்திர மனிதன்

This entry is part of 52 in the series 20081120_Issue

கோவை புதியவன்


இன்றைய கணணி மனிதன்

இருபதாம் நூற்றாண்டின் இறுதியில்
புதிய இனப் பெருக்கம்
கணணியின் கவர்ச்சியால்

கணணி மாயையில்
கலாச்சார திறவுகோல்
துருப்பிடித்துப் போவதற்கு
கண்டறியப்பட்ட சாதனம்

அமெரிக்க டாலர்களின்
அமோக விற்பனையில்
அன்பை அநாதையாக்கிய
ஆறறிவு புதுயுக அவதாரங்கள்.

உள்ளத்து உணர்வுகளுக்கு
பிண்டம் வைத்து
அண்டம் தங்கள் கரங்களில் என
இறுமாப்பு கொள்ளும் புத்திரர்கள்

அப்பாவின் ஆஸ்தி உருமாறி
அருமை மகனுக்கு அயல்நாட்டுப் பணி
அவரே அஸ்தியாகிப் போனால்
விமானச் சீட்டு குளறுபடியால்
இறுதி ஊர்வலம் வீடியோ ஆதாரம்

கரன்சி மோகத்தில்
பகலும், இரவும் மறந்து
வளர்ச்சிப் பாதை காட்டுவதையாய்
வாழ்வின் பாதையைத் தொலைத்த
நாட்டின் வளைந்த முதுகெலும்புகளே!

அசையாது உறங்கியவன் கும்பகர்ணன்
அமர்ந்தே குறுகியவன் கணணிகர்ணன்
விழித்துக் கொள் கணணி நண்பா!

கணணித் திரையிலருந்து
கொஞ்சம் கண்களைத் திருப்பு.
இல்லையெனில்….
நாளை சிறுநீர் கழிப்பதற்க்கே
சிரமப்படுவாய்


thendral_venkatguru@yahoo.co.in

Series Navigation