திண்ணை

அன்புடன் புகாரி

ஒவ்வொரு விரலும்
எழுத்தாணியாக
பத்து விரல்களாலும்
எழுதியவர் சுஜாதா

கணினிக்குள்
சிப்புகளாகவே ஆகிப்போக
இளைஞர்களை
உசுப்பிவிட்டவர் சுஜாதா

நவீனத்தின் மடிகளில்
தமிழைத் தாலாட்டியவர்
சுஜாதா

தமிழின்
மரபுகளையும் விசாரித்து
தொல்லிலக்கியங்களிலும்
தோய்ந்தவர் சுஜாதா

பத்திரிகை விற்பனையை
எழுத்துத்தரம் மாறாமல்
உயர்த்தியவர் சுஜாதா

தமிழ்த் திரைப்படங்களில்
ஹாலிவுட் மின்னல்கள்
தெறிக்கச்செய்தவர் சுஜாதா

நகைச்சுவைகளுக்கும்
அறிவுப்பொறிகளுக்கும்
தையலிடாமலேயே
நெய்து வென்றவர் சுஜாதா

அவதூறு விமரிசங்களுக்கும்
அளவோடு மறுமொழி
தந்தவர் சுஜாதா

கைநாட்டுகளும்
அறியும் வண்ணம்
கணினித் தகவல்களை
பாமரர்களுக்கு
எடுத்துச் சென்றவர் சுஜாதா

இருபது வயது
இளைஞனோடும்
இளமைதுள்ள
தோள் சேர்ந்தவர் சுஜாதா

இவரைப்போல்
இன்னொருவர் இல்லை
இவரை நகலெடுத்தோருக்குக்
குறைவே இல்லை
அவர்தான் சுஜாதா

சிற்றிதழ்களிலும்
பத்திரிகைகளிலும்
ஒரே உயரப்
புகழ் வென்றவர் சுஜாதா

இணையத்திலும்
அச்சுக்களிலும்
இணையாக உலாவந்த
முதல் எழுத்தாளர் சுஜாதா

இப்படியாய்
இன்னும் எத்தனையோ
சொல்லிச் சொல்லி
அவர் புகழ் பாடலாம்

தமிழின் தங்க விளக்கு
அது அணைந்தது என்பது
அழுகைதான் என்றாலும்
எத்தனை
யுகங்களானாலும்
இவரின் வாசனை மட்டும்
தமிழ் முற்றங்களில்
நீங்குமா

தன் நாள்
நெருங்கி வருவதை
அறிந்தவராகவும்
அதை நமக்கெலாம்
அறியத்தந்தவராகவும்
இருந்தார் சுஜாதா

பலகோடி தமிழர்களின்
கண்ணீர் அஞ்சலிகளால்
அவர் வழியனுப்பப்படுவார்
என்றும் அறிந்திருந்தார்
சுஜாதா

அனைத்தும் அறிந்த
அந்த அறிவுச் சுடருக்கு
நம் அஞ்சலிகளை
கண்ணீரோடு சமர்ப்பிப்போம்

anbudanbuhari@gmail.com