கவிதைகள்

This entry is part of 42 in the series 20060505_Issue

ஆ. மணவழகன்


வாழ்க்கை வணிகன்

பாருங்க சார்!
தெய்வப் புலவர் வள்ளுவர்
எழுதியது சார்!

வாழ்க்கைக்குத்
தேவையான வழிகளைச்
சொல்வது சார்!

மூன்று பெரும்பகுப்புகள் …
நூற்று முப்பது அதிகாரங்கள்…
ஆயிரத்து முந்நூற்று முப்பது
குறள்களைக் கொண்டது சார்!

வெளியில் வாங்கினா
இருபத்தி ஐந்து ரூபாய் சார்!
கம்பெனி விளம்பரத்துக்காக
வெறும் பத்து ரூபாய் சார்!
—————————-

தொடர்வண்டிச் சிறுவன்
மலிவு விலையில்
விற்றுச் சென்றான்…

திருக்குறளோடு..
‘வாழ்க்கையையும்’ ..!
***

தித்திப்பு

வெயிலின் வேட்கைக்கு
செதில் செதிலாய்க் கடித்து,

சுவைத்துச் சுவைத்து விழுங்கிய
வெகுநேரம் கழிந்த பின்பும்..

வீடு வந்து குடிக்கும்
நீரோடு உட்செல்லும்…

பெருநெல்லியின்
சுவையோடு..

காட்டுக் கள்ளிமடையானின்
தித்திப்பு!

இதோ,
உன்
நினைவின்
ஒவ்வொரு துளியிலும்!

***
ந(£)கரியம்
————-

சாக்கடை நாற்றத்தோடு
செயற்கை நீரூற்றுகள்!

வேரோடு பறித்து
வேற்றிடத்தில் நடப்பட்டு
அலங்காரத்திற்கு மட்டும்
அணிவகுக்கும் மரங்கள்!

முளைக்காத தானியங்கள்!
விதையில்லா கனிகள்!

உயிர் இல்லா முட்டைகள்!
தாய்-தந்தை உறவறியா
குளோனிங் குழந்தைகள்!

பார்த்துப் பல ஆண்டுகள்
ஆனாலென்ன?
பக்கத்து வீட்டில்
வாழ்ந்தால் என்ன?

விரல் அசைவில்
நலம் கேட்டு
வேலை என்று
விரைந்தோடும் மனிதர்கள்!

ஆணிவேரில்
வெண்ணீர் ஊற்றும்
அறிவியல் வளர்ச்சிகள்!

எதைக் காட்டிச் சொல்வேன்?
‘பச்சைக் கம்பு தின்றதே இல்லை’
ஆதங்கப்பட்ட தோழிக்கு…

ஆடுகளை மலையில் விட்டு..
அருகிருக்கும் கொல்லையில்
கதிரொடித்து…
பால் பருவ கம்பைப்
பக்குவமாய் நெருப்பிலிட்டு…

இம்மி ஊதித் தாத்தா கொடுத்த
இளங்கம்பின் சுவைக்கு
இன்றுவரை மாற்றில்லை என்று!

***
– ஆ. மணவழகன்
manavazhahan_arumugam@yahoo.com

Series Navigation

ஆ. மணவழகன்