கவிதைகள்

This entry is part of 46 in the series 20060217_Issue

கவிஞர் புகாரி


கண்ணீர் மரம்

நானோர்
கண்ணீர் மரம்

என்
கண் கிளைகளின்
கண்ணீர் இலைகளில்
ஓடுவன
வெறும் நார் நரம்புகளல்ல
கவிதை நரம்புகள்

ஆகையினாலேயே
என் வாழ்க்கைப் பயண நிமிடங்கள்
இலையுதிர் காலங்களாய் மட்டுமே
சித்தரிக்கப்பட்டிருக்கின்றன

என் ஞாபக முடிச்சுகள்
அவ்வப்போது அவிழ்க்கப்பட்டு
கண் நதிகளில்
வெப்பக் கண்ணீராய்ப்
பிரவாகமெடுக்கும்

மனமேகங்கள்
அடிக்கடி
ஏமாற்ற மரண அடிகளால்
கறுத்துக் கறுத்து
கண்ணீர்க் கடுமழை
பொழியும்

என்
கற்பனை வசந்தங்களின்
தீவிர நினைவுகள்
தாமே விதைத்துக் கொண்டு
உப்புப் பூக்களைக்
கண் காம்புகளிலிருந்து
கன்ன மாடத்தில்
கணக்கின்றி உதிர்க்கும்

என் கண்புறாக்கள்
கனவுகளை அடைகாத்துக்
கண்ணீர்க் குஞ்சுகளைப்
பொரித்துக் கொண்டே
இருக்கும்

ஆம்…
நானோர்
கண்ணீர் மரம்!

என்
கண் கிளைகளின்
கண்ணிர் இலைகளில்
ஒடுவன
வெறும் நார் நரம்புகளல்ல
கவிதை நரம்புகள்

ஆகையினாலேயே
என் கண்ணீருக்கு நான்
கணக்கற்ற
நன்றி சொல்கிறேன்


ஒரே ஒரு வழிதான்

உன்னைப் பிரிந்து நான்
தூரமாய்ச் செல்லச் செல்ல
மனதுக்குள் மூச்சு முட்டும்
ஏதோ ஒரு பாரம் தன் எடையை
அதிகரித்துக் கொண்டே இருக்கிறது

உன் நினைவுகள்
ஒன்றிரண்டாய் வந்து வந்து
உசுப்பிவிட்டது போக
இன்று மாநாடே கூட்டி
வா… வா… என்றழைக்கும்
மரண வாயிலைத் திறந்து விடுகின்றன

என் மூச்சுக் காற்று என்னை
வாழவைத்ததெல்லாம் பழைய கதை
இன்று அந்த மூச்சுக் காற்றே
என் மூச்சை நிறுத்த வந்த
நெருப்புக் காற்றாகி விட்டது

இப்போதய என் விழிகள்
திறந்தபோதும் நீ மூடிய போதும் நீ

இன்று தெரிந்து கொண்டேன்
நான் என்னை மொத்தமாகவே உன்னிடம்
இழந்து விட்டேன் என்ற உண்மையை

நீயென் அருகில் இருந்த போது
திடாரென்று விரித்துக்கொண்ட
என் சிறகுகளுக்குத்தாம்
எத்துணை வலிமை

என்னைத் தூக்கிக் கொண்டு
நான் கண்டறியாத ஏதேதோ
சொர்க்க வெளிகளிலெல்லாம்
அலைந்தனவே

இன்று தேடிப் பார்த்து
சிறகுகளைக் காணாத என் பார்வை
நிலைகுத்தி நிற்கிறது

விசித்திரம் தான்
உன்னை விட்டு நான்
தூரமாய் நடக்க நடக்க
சிறுமுட் பரப்பாய்த் துவங்கிய என் பாதை
நெருப்பு முட்காடாய் விசுவரூபம் எடுப்பது

ஆச்சரியம்தான்
உன் விழிகளின் ஒளிக்கீற்று
என்னை இவ்வளவு தூரம்கூட
விடாமல் துரத்தி வந்து தாக்குவது

இவற்றிலிருந்து
தப்பித்துக் கொள்ள என்ன வழி ?

ஒரே ஒரு வழிதான்
எனக்குத் தெரிகிறது

அன்பே
நீளமான உன் கார் கூந்தலை
என்பால் அவிழ்த்துவிடு
அதன் நுனியில் தொற்றிக்கொண்டு
மீண்டும் நான் உன்
அந்தப்புரத்துக்குள்ளேயே
வந்து விழுந்துவிடுகிறேன்.

—-

buhari@gmail.com

Series Navigation