திண்ணை

பவளமணி பிரகாசம்

வளைத்து வளைத்துப் பார்த்து
இழுத்து இழுத்து சோதித்து
தோதாக ஒரு கிளை தேர்வாகி
ஓடி ஓடி ஒன்றிரண்டு நாளிலே
கட்டி முடிந்தது ஒரு கூடு

இட்ட முட்டைகள் மேலமர்ந்து
அடை காத்ததோர் தவமொத்தது
ஓட்டை உடைத்து வெளி வந்த
கண் திறவா செவ்வாய் குஞ்சுகள்
மூடாத வாய்களில் ஊட்டிடவே
தாயும் தந்தையும் அயராது
பறந்து பறந்து ஓயவில்லையே

பஞ்சு போல் குஞ்சுகள்
சின்ன சின்ன சிறகுகள்
ஆபத்தறியா இளசுகள்
ஆர்வமான துடிப்புடனே
இறக்கை விரித்து பறந்திட
தானே இரையை தேடிட
கற்கும் வரை பெரிசிரண்டும்
தவித்துத் தவித்து தொடர்ந்திட
பரபரப்பாய் கழிந்த நாட்கள்
முடிந்து போயின அமைதியில்

கீச் கீச் கேட்காத கூட்டிலே
கதகதப்பில்லாத வீட்டிலே
ஓய்வாய் இரு பறவை
நீல வானில் கண் பதித்து
வெறிக்கின்ற பொழுதிலே
வெறுமையான கணத்திலே
வியர்த்தமாய் விசாரமாய்
விம்மியழுததேயில்லை
சின்னக் கூட்டில் பெரிய பாடம்

Pavalamani Pragasam
Pavalamani_pragasam@yahoo.com