அன்புடன் இதயம் – 28 – என் குடும்பம்

This entry is part of 42 in the series 20040819_Issue

புகாரி


சில்லறையை அள்ளி
தொப்பைக்குள் போட்டுக்கொண்டு
கள்ளச்சாராயச் சந்தைக்குச்
சலாம் அடிக்கும் காவல்காரர்
என் மச்சான்
.

எதைக் கொடுத்தாலும்
குடிப்பேனென்று குடித்துவிட்டு
நாக்குத்தள்ளி செத்துப்போன
குடிகாரன்
என் அண்ணன்
.

பட்டம்
வாங்கிவிட்டேன்
வங்கியில் மட்டும்தான்
வேலை பார்ப்பேனென்று
தெருத் தெருவாய்த் திரியும்
வேலையில்லாப் பட்டதாரி
என் தம்பி
.

மாவட்ட
ஆட்சித்தலைவன் தொட்டு
அடிமட்ட சேவகன் வரை
கை நீட்டிப் பை நிரப்பும்
அரசு நிர்வாகிகள்
என் சகலைப்பாடிகள்
.

ஊரை அரித்து
உலையில் போட்டு
கைத்தட்டல் வாங்கும்
அரசியல்வாதி
என் மாமா
.

ஓர்
எவர்சில்வர் குடத்திற்காக
எவனுக்கும் ஓட்டுப் போடும்
இந்நாட்டு அரசி
என் அம்மா
.

உள்ளூரில் வேலையில்லை
என்று
திசைமாறிப் பறந்து
அத்தோடு
தொலைந்துபோன
அமெரிக்கப் பிரஜை
என் அக்கா
.

சுதந்திரம்
வாங்கித்தந்தத் தியாகி
என்ற பெருமையோடு
சாய்வு நாற்காளியில்
சலனமற்றுக் கிடப்பது
என் தாத்தா
.

வார்த்தைகள் உயர்த்தி
விடியல் திறக்கும்
வலிய பேனாவால்
தொலைந்துபோன காதலிக்காக
புலம்பல் கவிதைகள்
வடிக்கும்
அற்புதக் கவிஞன்
நான்

*

அன்புடன் புகாரி
buhari2000@hotmail.com
buhari@sympatico.ca

Series Navigation

புகாரி