அத்தை மகள்!

This entry is part of 59 in the series 20031106_Issue

கரு.திருவரசு


எடுப்பு
அத்தை மகளே அந்த நிலவு – அவள்
அசைந்துவந்தால் எங்கும் அழகு! – அத்தை

தொடுப்பு
மெத்தை மெத்தையாய் மேகங்களே!
மேகங்கள் அசைவில் மோகங்களே! – அத்தை

கண்ணிகள்
முத்துச் சுடர்கள் அந்த நட்சத்திரங்கள்
முல்லைச் சிரிப்பில் சிந்தும் விசித்திரங்கள்!
குத்து விளக்காய் நல்ல குலமகளாய்க்
கோலம் செய்வாள் அந்த நிலவுமகள்! – அத்தை

பத்து வயதில் அவள் பால்நிலவு!
பருவம் வந்தால் சுவைத் தேன்நிலவு!
பித்துக் கவிஞன் மன மேடையிலே
பின்னிப் பின்னி நடக்கும் பெண்நிலவு! – அத்தை

thiruv@pc.jaring.my

Series Navigation