திண்ணை

ஜடாயு

வண்டுகள் ரீங்காரம்
ஆடிக்காற்றின் ஆங்காரம்
உள்ளுக்குள் ஓயாமல் ஒலிக்கும்
ஓங்காரம்
குயிலின் கூவல்
ரயிலின் ஊதல்
குழந்தைகள் கும்மாளம்
சாவுப் பறைமோளம்

எத்தனை எத்தனை சத்தங்கள்
சத்தங்களினின்று
சங்கீதம் ஜனிப்பது
சமத்காரம்

எத்தனை எத்தனை ஓசைகள்
ஓசைகளின் ஒத்திசைவில்
இசை இருப்பது
இந்திரஜாலம்

தொப்புள் குழியில் பிறந்து
இதயக் குமிழில் மலர்ந்து
தொண்டைக் குழியில் துலங்கி
வாய் வழி வரும்
ஜீவ நாதம்
உணர்வில் கலந்து
உயிரில் இணைகிறது

குழலும் வீணையும் மத்தளமும்
கூட்டும் உயிரொலிகள்
செவிவழி சிந்தை புகுந்து
அடிமனதின் ஆயிரமாயிரம்
கதவுகளைத் திறக்கின்றன

வக்ரங்கள் கூட
வசீகரம் பெற்று விடும் இசையில்
நடுத்தர மத்யமங்களும்
கடைக்கோடி பஞ்சமங்களும்
சிம்மாசனம் இட்டமரும்
ஏழு ஸ்வரங்களின்
ஏற்ற இறக்கங்கள்
சமச்சீர் கொண்டு
சாகசம் படைக்கும்

கல்யாணியின் கனிவு
காம்போதியின் கம்பீரம்
கரஹரப்ரியாவின் கலகலப்பு
தோடியின் மோடிவித்தை
அடாணாவின் அதட்டல்
சுபபந்துவராளியின் சோகம் –
ஒட்டுமொத்த உணர்ச்சிகளின்
ஊற்றுமுகம்
இசையில் தெரிகிறது

சொல்லில் அடங்காததோர்
காவியத்தை
ஸ்வரங்களால் எழுதிக் காட்ட முயலும்
ஓவியம் இசை

எல்லாம் இசையும் இசையில் – அதன்
ஈர்ப்புக்கு மயங்காததது
இல்லை இப் புவியில்
(c) ஜடாயு (jataayu@hotmail.com)