இந்திய இளவரசர்களே!

This entry is part of 30 in the series 20020302_Issue

புஹாரி, கனடா


ஓ…
இளைஞர்களே…
எந்தக் கிரீடமும்
நமக்குச்
சூட்டப்படவில்லைதான்
அதற்காக
முட்கிரீடங்களையா
நாம்
சூடிக் கொள்வது… ?

நெஞ்சத்தின்
அழிக்க மாட்டாத ஆசைகளுக்கு
வடிகால்களென எண்ணி
கற்பனைக் குதிரைகளைக்
கஞ்சாப் புகையால் தட்டிவிட்டுக்
கல்லறை வீதிகளிலா
பவனி வருவது.. ?

கல் தடுக்கலுக்கெல்லாம்
கல்லூரிக் கதவுகளுக்குத்
தாலாட்டுப் பாடிவிட்டு
பொது உடைமைகளில்
நம்
ஆத்திரங்களைக் கக்கி
நாசமாக்குவதா நமக்கு
வீரம்…. ?

சிசர்…. சார்மினார்… வில்ஸ்களால்
தற்காலிக மேகங்களெழுப்பி
ஜாக்கி… ராணி… ராஜாக்களைத்
தோகைகளாக்கிக்
கால முத்துக்கள்
கணக்கின்றி அழிய
இதய மயிலை
காபரே ஆடச் செய்வதா
நம் முழுநேரப்பொழுது போக்கு… ?

குட்டிச் சுவர்களுக்குப்
பக்கத்தில்
குட்டிச் சுவர்களாய்….
முக
முக்காடுகளுக்குள் புகுந்து….
புட்டிகளைப்
பொசுக்கெனக் கவிழ்த்து….
நடு வீதிகளில் நாணம் துறந்து
தலை கவிழும் சுதந்திரமா
நாம் பெற வேண்டும்…. ?

ஓ…
என்னருமை இளவரசர்களே….
உங்கள்
வெள்ளை ரோஜாக்களில்
சேற்றுக் கறைபடிவதை
அறிவு முட்களால்
தடுக்கவேண்டாமா…. ?

வாலிபம்
இப்படியா கெடுவது… ?

தனியொரு மனிதனுக்கு
உண்ண உணவில்லையெனில்
ஜகத்தினை அழிக்க வேண்டாம்
உருவாக்குவோம்
ஓடி வாருங்கள்.

——————————-
buhari2000@hotmail.com

Series Navigation

புஹாரி, கனடா