காலை

This entry is part of 21 in the series 20011229_Issue

கே ஆர் விஜய்


சிறுவயதில்
உணர்ந்ததில்லை இதன் மகத்துவத்தை….

கல்லூரி நாட்களில்
இதன் பரிச்சயமே
கண்ணில் பட்டதில்லை.

காதலியின் கட்டாயத்திற்காக
சில நாட்கள்
காலைப் பொழுதிலே காத்திருந்ததுண்டு.

பிறந்த நாட்களின் பொழுது
நண்பர்களின் கூவலால்
மிரண்டும் எழுந்ததுண்டு.

விடுமுறை நாட்களில்
வீடு சென்றாலும்
தினமும் அம்மா கத்துவாளே தவிர
ஒரு நாளும் எழுந்ததில்லை….

சின்ன வயதில்
அப்பாவோடு காலை எழுந்து
ஆற்றுக்குப் போய் குளிப்பேனாம்.

நண்பர்களோடு
மாரியம்மனுக்கு நீர் ஊற்றுவதற்காக
சிலமுறை எழுந்ததாக ஞாபகம்.

நீண்ட நாட்கள் கழித்து
இன்று எழுகிறேன்.
காலையில்..

பறவைகளின் சத்தம்…
தூய வானம்…
சுத்தமான காற்று
இரைச்சலில்லாத சாலை.
கதிரவனின் உதயம்.

சீராகிறது சுவாசம்
தெளிவாகிறது மனம்

குழப்பமாக இருந்ததனால்
காலை விரைவாக எழுந்தேன்…
இப்போது தெளிவோடு…

கவிதை வருகிறது..
கற்பனை வளர்கிறது…

கவிதை எழுத
தினம் காலையில் எழவேண்டும் என நினைக்கிறேன்
உறங்கிக் கொண்டே…..

***
கே ஆர் விஜய்
28/12/01

Series Navigation