• Home »
  • »
  • நெஞ்சை முறிக்கும் இல்லம் (Heartbreak House) மூவங்க நாடகம் அங்கம் -1 காட்சி -14

நெஞ்சை முறிக்கும் இல்லம் (Heartbreak House) மூவங்க நாடகம் அங்கம் -1 காட்சி -14

This entry is part of 34 in the series 20100926_Issue

ஆங்கில மூலம் : ஜார்ஜ் பெர்னாட் ஷா (1856–1950) தமிழாக்கத் தழுவல் : சி. ஜெயபாரதன், கனடா


“நீவீர் யாவரும் விஞ்ஞானச் செருக்கு ஆடை அணிந்த அடிப்படை வாதிகள் ! அதனால்தான் அரசியலில் மூடத்தன மரபுவாதிகளாகவும், பிற்போக்காளராகவும் (Conservatives & Reactionists) இருக்கிறீர் ! பொறுமை இல்லாது விஞ்ஞானத்தையே தடுக்கிறீர் ! உங்களை நீக்க வேண்டிய தருணம் வரும் போது நீவீர் யாவரும் ஒரே சிந்தனை உடையவர்தான் : நிறுத்துவீர் அதை ! சவுக்கால் அடிப்பீர் அதை ! அறுத்து விடுவீர் அதை ! வெடி வைப்பீர் அதற்கு ! காலடியில் போட்டு மிதிப்பீர் அதனை !”

ஜார்ஜ் பெர்னாட் ஷா (The Adventures of a Black Girl in Her Search for God) (1932)

“வாழ்க்கையைப் பற்றிய பூர்வீகக் கிறித்துவ நெறிகள் நீடித்திருக்க ஆக்கப்பட்டவை அல்ல ! ஏனெனில் ஆதிகாலக் கிறித்துவர், உலகமே நீடித்திருக்கப் போகிறது என்று நம்ப வில்லை !”

ஜார்ஜ் பெர்னாட் ஷா (Hotchkiss, in Getting Married)

++++++++++++++++

நாடக ஆசிரியர் பெர்னாட் ஷாவைப் பற்றி:

ஜியார்ஜ் பெர்னாட் ஷா அயர்லாந்தின் தலைநகர் டப்ளினில் 1856 ஆம் ஆண்டில் ஜியார்க் கார் ஷா & லுஸிண்டா எலிஸபெத் ஷா இருவருக்கும் பிறந்தவர். அவரது அன்னை ஆப்ரா (Opera) இசையரங்குப் பாடகி, வாய்க்குரல் பயிற்சியாளி. தந்தையார் தோல்வியுற்ற வணிகத்துறையாளர். வறுமையி லிருந்து குடும்பத்தை விடுவிக்க முடியாத பெருங் குடிகாரர். இருபது வயதில் பெர்னாட் ஷா அன்னையுடன் லண்டனுக்குச் சென்றார். அங்கே தாயார் இசைத்தொழில் மூலம் ஊதியம் பெற்றுக் குடும்பத்தை நடத்திக் கொண்டு வந்தார். நிரம்ப இலக்கிய நூற் படைப்புகளைப் படித்து வந்த பெர்னாட் ஷா, முதலில் ஐந்து தோல்வி நாடகங்களை எழுதினார். பிறகு நாடக மேடை உலகில் புகுந்து மற்றவர் நாடகங்களைக் கண்டு 1894 இல் “சனிக்கிழமை கருத்திதழில்” (Saturday Review) நாடகங்களைப் பற்றித் திறனாய்வு செய்து எழுதி வந்தார். அப்போது பொதுவுடைமைக் கோட்பாடில் ஈடுபாடு மிகுந்து பிரதம மேடைப் பேச்சாளாராகவும் உரைமொழி ஆற்றினார்.

அவர் எழுதிய சிறப்பான நாடகங்கள்: பிக்மாலியன் (Pygmalion), ஜோன் ஆ•ப் ஆர்க் (Saint Joan), மனிதன் & உன்னத மனிதன் (Man & Superman), ஆப்பிள் வண்டி (The Apple Cart), டாக்டரின் தடுமாற்றம் (The Doctor’s Dilemma), மெதுசேலாவுக்கு மீட்சி (Back to Methuselah), மேஜர் பார்பரா (Major Barbara), கோடீஸ்வரி (Millionairess), ஆனந்த நாடகங்கள் (Plays Pleasant), தூயவருக்கு மூன்று நாடகங்கள் (Three Plays for Puritans), இதயத்தை முறிக்கும் இல்லம் (Heartbreak House), ஆயுத மனிதன் (ஊழ் விதி மனிதன்) (The Man of Destiny) (1898) போன்றவை. ஐம்பது ஆங்கில நாடகங்கள் எழுதிய பெர்னாட் ஷாவுக்கு 1925 இல் இலக்கிய நோபெல் பரிசு அளிக்கப்பட்டது.

+++++++++++++++++++++

இந்த நாடகத்தைப் பற்றி :

ஜார்ஜ் பெர்னாட் ஷாவின் இந்த மோக இன்பியல் நாடகம் (Lusty Comedy) இங்கிலாந்து தேசத்தின் தென் கோடியில் உள்ள ஸஸ்ஸெக்ஸ் குன்றுக் கடல் பகுதியில் (Sussex Area) நிகழ்வதாக எழுதப் பட்டுள்ளது. அங்கே காப்டன் ஷோடோவர் (Captain Shotover) தன்னிரு புதல்வி யருக்கும் மற்றும் சம்பிரதாயம் பேணாத அவரது நண்பருக்கும் தன் இல்லத்தில் (Nautical Sussex Home) விருந்து வைக்கிறார். வாலிப மாது ஒருத்தி விரும்பி மணந்து கொள்வது செல்வத்துக்கா அல்லது காதலுக்கா என்பதுதான் நாடகத்தின் முக்கியக் கேள்வி ! காப்டனின் இல்லம் வாலிப இதயத்தை முறிக்கும் வாழ்வு மர்மங்கள் நிரம்பி மரணச் சாபத்தில் கட்டப் பட்டது ! அந்தக் கொந்தளிப்பு நிலையைக் காட்ட பெர்னாட் ஷா பிரிட்டீஷ் நாட்டுப்புற வீட்டை (Country Home) ஒரு கப்பலாக உருவகப் படுத்திக் கொள்கிறார். அவரது இல்லக் கப்பல் வக்கிரக் காதலர் (Loopy Lovers), போலிப் போதகர் (False Prophets), முதுமையுற்ற தீர்க்க தரிசிகள் (Aging Visionaries), வாலிப ரோமியோக்கள் (Aging Romeos), கவைக்குதவா பூரணவாதிகள் (Ineffectual Idealists), வஞ்சகச் செல்வந்தர் (Mangy Capitalists) பலர் கூடுகின்ற ஒரு விலங்குக் காட்சி சாலை (Menagerie /Zoo). நாடகக் கதைக் கரு (Plot) முன்னாள் கப்பல் காப்டன் ஷோடோவர், புதல்வியர் ஹேஸியோன், ஏரியட்னி, எழில் மாது மிஸ் எல்லி நால்வரை மையமாகக் கொண்டு விரிந்து உச்சக் கட்டத்தைத் தொடுகிறது.

1917 இல் முதல் உலக மகா யுத்தம் நடந்து கொண்டிருந்த சமயத்தில் ஜார்ஜ் பெர்னாட் ஷா எழுத ஆரம்பித்து 1919 இல் முடித்த நாடகமிது. “நெஞ்சை முறிக்கும் இல்லம்” நாடகம் 1920 ஆண்டில் நியூ யார்க் நகரில் முதன்முதலில் அரங்கேறியது. பெர்னாட் ஷா எழுதிய நாடகங்களிலே இது முற்றிலும் வேறுபாடானது. இந்த நாடகத்தைப் படிக்கும் அல்லது பார்த்துச் சுவைக்கும் வாசகர் பெர்னாட் ஷாவின் நீண்ட பிரச்சாரம் நகைச்சுவை இரண்டையும் ஒருங்கே சம அளவில் அனுபவிப்பர். நாடக ஆசிரியர் வாயிலிருந்து மளமள வென்று கொட்டும் வார்த்தைகளின் நீர்வீழ்ச்சியில் வாசகர் உள்ளம் நனைந்து ஷாவின் உன்னத தீர்க்க தரிசச் சிந்தனைகளோடு பந்தயக் குதிரைபோல் ஓடும். இந்த நாடகம் மிகத் துணிச்சலான ஓர் அழிவுத் தலைப்பை (Subversive Topic) நம் கண்முன் நிறுத்துகிறது. அவை உலகப் போரால் விளையும் தீங்குகள் மட்டுமல்ல ! நமது தன்னிறைவு பெறாத அதிகார ஆற்றலால் (Destruction Power of our Complacency) இல்லத்திலும், சமூகத்திலும் உண்டாக்கப் படும் மிகையான அழிவுக் கோரம் !

நாடகத்தில் வருபவை அனைத்தும் தையலற்ற ஒரு முழுமை அணியாய் ஒருங்கு சேர்கின்றன ! இரண்டரை மணிநேரம் நடக்கும் இந்த நாடகம் குழப்பத்தை உண்டாக்காமல் நகர்ந்து சென்று முடிகிறது. இது காட்டும் நிகழ்ச்சிகள் யாவும் இங்கிலாந்து இல்லம் ஒன்றிலும், கப்பலிலும் நேர்கின்றன. நாடக முக்கியக் கதா பாத்திரம் காப்டன் ஷொடோவர் (Captain Shotover) செழித்த சிந்தனையோடு பேசுகிறார். அரங்க மேடையில் அவர் மனித இனத்தைத் தூக்கி எறிவதை ஒருவர் காணாமலே போய் விடலாம். இந்த நாடகத்தில் பிரிட்டீஷ் மேற்குடிக் கோமகனார் இடையே முதல் உலக யுத்தத்துக்கு முன்னிருந்த மூடத்தனங்கள் காட்டப் பட்டு மக்கள் துயர்க் கொடுமை ஷாவின் கலைத்துவச் செழிப்போடு காட்டப் பட்டுள்ளன.

நெஞ்சை முறிக்கும் இல்லத்தை ஒரு கப்பலாக உருவகம் செய்கிறார் பெர்னாட் ஷா. ஷா இந்த நாடகத்தில் சிரிப்பு வெடி கிளப்பும் வசன வரிகளை இடையிடையே நிரப்பி முடிவில் பெரு வெடிப்பு நிகழ்ச்சியாய்த் தோன்றி உச்சக் கட்டம் வருகிறது. வசன வரிகள் நாடகத்தில் நீண்ட போதிப்பாகத் தெரிந்தாலும் பெர்னாட் ஷாவின் கருத்துக்கள் கேட்கத் தகுந்தவை. சிரிக்க வைப்பவை ! சிந்திக்க வைப்பவை. தற்போதைய நமது சமூகப் பிரச்சனைகளையும் ஆங்காங்கே எதிரொலிப்பவை.

++++++++++++++++++++++

நாடக உறுப்பினர்:

1. காப்டன் ஷொடோவர் (Captain Shotover) : (88 வயது)
(மிஸ். ஹெஸியோன், மிஸ். எரியட்னி இருவரின் தந்தை)

2. மிஸ் எல்லி டன் (Ellie Dunn) : இள வயது மங்கை

3. மிஸ்டர் மாஜினி டன் (Mazzini Dunn) : மிஸ் எல்லியின் தந்தை

4. மிஸிஸ் ஹெஸியோன் குசபி (Hesione Hushabye) காப்டனின் மூத்த புதல்வி (45 வயது)

5. எரியட்னி அட்டர்வுட் (Ariadne Utterword) : காப்டனின் இளைய புதல்வி

6. ஸர் ஹேஸ்டிங்ஸ் அட்டர்வோர்டு : (Sir Hastings Utterword) எரியட்னியின் கணவர்.

7. ரான்டல் அட்டர்வோர்டு (Randal Utterword) (40+) ஹேஸ்டிங்ஸின் சகோதரன்

8. மிஸ்டர் ஹெக்டர் குசபி (Hector Hushabye) : ஹெஸியோனின் கணவர் (50 வயது)

9. வில்லியம் மங்கன் (Bill Mangan, Business Boss) : செல்வந்தர். வயது 55.

10. மிஸ்டர் காரத் ஸாக்ஸி (Gareth Saxe) செல்வீகக் கோமகன்

11. ஆல்•பிரெட் மங்கன் (Alfred Mangan) – Mr. Mazzini Dunn’s Employer Boss

12 தாதி கின்னஸ் (Nurse Guinness) : காப்டன் இல்லத்து முதிய பணிமாது. (60 வயது)

13 மிஸ் ஜென்னி ஸ்டர்லின் (Jenny Sterlin) : வேலைக்காரி.

***************************

இடம் : இங்கிலாந்தில் ஸஸ்ஸெக்ஸ் குன்றுக் கடற் பகுதியில் இருக்கும் நாட்டுப்புற இல்லம் (A Country Home in North End of Sussex, UK). பழைய இல்லம் உயர்ந்த பீடக் கப்பல் போல் கட்டப் பட்ட மர வீடு. மின்சார விளக்குகள் காணப்படுகின்றன. வரவேற்பு முன்னறையில் சோ•பாக்கள், நாற்காலிகள் உள்ளன.

நேரம் : மாலை ஆறு மணி, குளிர்ந்த தென்றல் வீசும் செப்டம்பர் மாதம்.

அரங்க அமைப்பு :

காப்டன் இல்லத்து முன்னறையில் ஓரிளம் மாது (மிஸ் எல்லி டன்) சோ•பாவில் அமர்ந்திருக்கிறாள். மாலை நேரம். சுவர்க் கடிகாரம் 6 மணி அடிக்கிறது. மிஸ். எல்லி பொறுமை இழந்து எழுந்து நின்று அங்குமிங்கும் பார்த்து வருத்தம் அடைகிறாள். இள மாது அழகு பொங்கி உடல் நளினமோடு காணப் படுகிறாள். முகத்தில் அறிவுச் சுடர் ஒளிர்கிறது. அணிந்துள்ள ஆடை பகட்டாக இன்றி நடுத்தரக் குடும்பப் பெண்ணாகக் காட்டுகிறது. மறுபடியும் சோ•பாவில் அமர்ந்து ஷேக்ஸ்பியர் நாடகம் ஒன்றை எடுத்துப் படிக்கிறாள். அப்போது ஒரு வயதான மாது (Nurse Guinness) தட்டில் மூன்று கிளாஸ் தம்ளரில் மதுபானம் எடுத்துச் செல்கிறாள். அவள் குறுக்கிட்ட போது மிஸ் எல்லியின் நூல் தவறிக் கீழே விழுகிறது. வயதான மாது வாலிப மாதை வியப்போடு முதன்முறை பார்க்கிறாள். விருந்தாளிக்கு வேலைக்காரி டீ கொடுப்பதைக் காப்டன் வெறுக்கிறார். அப்போது திடீரெனப் பல வருடங்களுக்குப் பிறகு வரும் அவரது இரண்டாம் புதல்வியை அவர் வரவேற்காது வெறுப்புடன் புறக்கணிக்கிறார்.. ஹெஸியோன் தாமதமாக வந்து மிஸ். எல்லியை வரவேற்கிறாள். அடுத்து வரும் மிஸ் எல்லியின் தந்தை மாஜினியைக் குறைகூறுகிறாள் ஹெஸியோன். மாஜினியின் எஜமானர் மங்கன் எதிர்பாராமல் நுழைகிறார். அடுத்து ஹெஸியோன் கணவர் (ஹெக்டர் குசபி) வந்து எல்லிக்கு மனக் குழப்பத்தை உண்டாக்குகிறார். திடீரென மாஜினியின் மேலதிகாரி வயதான மங்கன் வந்து இளங்குமரி எல்லியை மணக்கப் போவதாகக் கூறுகிறார். அந்தத் திருமணத்தைத் தடுக்க முயல்கிறார் காப்டன் ! திறந்த வாசல் வழியே ஹெஸியோன் மைத்துனன் ரான்டல் அட்டர்வோர்டு வருகிறான்.

+++++++++++++++++++++

அங்கம் -1 காட்சி -14
(மூவங்க நாடகம்)

ஹெக்டர்: (எல்லியை நோக்கிப் பரிவோடு) இந்த அப்பாவிப் பெண் என்னால் புண்பட்டு வெந்து போயிருக்கிறாள் ! பொய் சொல்லி நான் எல்லிக்குத் தந்த தலைவலி போதும். ஆம் இப்போது எல்லிக்குத் தேவை ஓய்வுதான் !

ஏரியட்னி: (எல்லியைப் புறக்கணித்துப் புன்னகையோடு) ஹெக்டர் ! ஏன் என்னை ஒரு மாதிரி பார்க்கிறாய் ? என்னை நோக்கி ஏதோ சொல்ல வந்து நிறுத்தி விட்டாயே ! என்ன சொல்ல வந்தாய் ?

ஹெக்டர்: (ஏரியட்னி அழகில் மயங்கி) நான் எண்ணியதைச் சொல்லவா ? உண்மையாகச் சொல்லவா ?

ஏரியட்னி: சொல் ! உண்மையை சொல் !

ஹெக்டர்: என் வாய்ச்சொல் சற்று நாகரீகமாக இருக்காது ! நான் சொல்ல நினைத்தது : நீ ஒரு சாதாரண மாது என்பதுதான் !

ஏரியட்னி: உனக்கு வெட்கமில்லை ஹெக்டர் ! என்ன உரிமை உள்ளது உனக்கு நான் சாதாரண மாதா ஆடம்பர மாதா வென்று சொல்ல ? என்னைப் பற்றி உனக்கென்ன தெரியும் ?

ஹெக்டர்: சொல்வதைக் கேள் ஏரியட்னி ! இதுவரை உன்னிளமைப் படங்களைத்தான் நான் பார்த்திருக்கிறேன். போட்டோ படங்கள் காப்டனின் புதல்விகளை மெய்யாகக் காட்டுவதில்லை ! அவரிடம் மதிப்பும், அவமதிப்பும் கலந்த முரண்பாடுகள் உள்ளன ! அது உனக்கும் தெரியும் அல்லவா ?

ஏரியட்னி: எனக்குத் தெரியலாம் ஹெக்டர் ! ஆனால் ஓர் எச்சரிக்கை ! நானோர் மரபுவாதி தெரிந்து கொள் ! காப்டன் மகள் என்பதால் நானொரு கட்டுப்பாடில்லாத மாது என்று எண்ணாதே ! நாங்கள் இருவரும் கட்டுப்பாடு இல்லாதவர் போல் தோன்றலாம் ! ஆனால் நான் அப்படி இல்லை. கட்டுப்பாடில்லாததை நான் அறவே வெறுப்பவள் ! நான் கட்டுப்பாடின்மையில் இன்னலுற்றது போல் எந்தப் பெண் பிள்ளையும் ஒழுக்க நெறியில் துன்பப் பட்டிருக்காது !

ஹெக்டர்: நீ கட்டுப்பாடில்லாது வளர்ந்தவளும் இல்லை ! ஒழுக்க நெறியில் வாழ்ந்தவளும் இல்லை ! உனது கவர்ச்சி புது மலர்ச்சியோடு உள்ளது. உன் வனப்பு பெரு வல்லமையோடு உள்ளது. என்ன மாதிரிப் பெண்ணாக நீ எண்ணிக் கொள்கிறாய் உன்னை ?

ஏரியட்னி: உலகத்துக்கு ஒத்துப் போகும் பெண் நான் ! ஒரு நடத்தை கெட்ட பெண்ணுக்கு வாய்ப்பு ஒன்றும் கிடைக்காது ! அதுபோல் நடத்தை கெட்ட ஆடவன் எந்தப் பெண் அருகேயும் நாலடி தூரத்தில் கூட வர முடியாது !

ஹெக்டர்: நீ கட்டுப்பாடில்லாத பெண்ணுமில்லை ! ஒழுக்க நெறியைப் பேணும் பெண்ணு மில்லை ! நீ ஓர் அபாயகரமான மாது !

ஏரியட்னி: (சிரித்துக் கொண்டு) அப்படி இல்லை ஹெக்டர் ! நான் ஒரு விந்தை மாது ! பாதுகாப்பான மாது !

ஹெக்டர்: நீ ஒரு கவர்ச்சி மாது ! கவனமாய்க் கேள் ! நான் உன்னைக் காதலிக்க வில்லை ! என்னை யாரும் கவர்வதை நான் விரும்ப மாட்டேன் ! நீ இங்கு தங்கப் போவதாயின் என்னைப் பற்றி நன்றாகத் தெரிந்து கொள் !

ஏரியட்னி: நீ ஒரு சாமர்த்தியான பெண் மோகி ! பெண் மயக்கி ! பெண் கொல்லி ஆடவன் ! ஓர் ஆண் அழகன் ! ஆசை மீசைக்காரன் ! இந்த ஆண் பெண் கூட்டுக் களியாட்டத்தில் நான் பலே கெட்டிக்காரி ! ஒப்புக் கொள்வாயா நாம் விளையாடப் போவது வெறும் களியாட்டம் என்று ?

ஹெக்டர்: தகுதியில்லாத ஒரு முட்டாளாய் நான் விளையாடலாம்.

ஏரியட்னி: நீ என் மைத்துனன் ! நீ என்னை முத்தமிட வேண்டுமென என் சகோதரி ஹெஸியோன் உனக்கு உத்தரவு இட்டிருக்கிறாள் ! (உடனே ஹெக்டர் பாய்ந்து வந்து மைத்துனியை அணைத்துக் கொண்டு வாயில் அழுத்தமான நீடித்த முத்தமிட்டு மகிழ்கிறான்.) (பிடியிலிருந்து விடுவித்துக் கொண்டு) இது விளையாட்டுக்கு அப்பாற் பட்டது மைத்துனரே ! (ஹெக்டரைத் தள்ளி விட்டு) இனிமேல் இப்படிச் செய்யாதே !

ஹெக்டர்: நான் எதிர்பார்த்தை விட ஆழமாகவே உன் நகங்களை என்னுள் பிறாண்டி விட்டாய் நீ !

ஏரியட்னி: அந்த வலியால் என்னை நினைத்துக் கொண்டிருக்காதே ஹெக்டர் ! இதோ உன் அருமை மனைவி ஹெஸியோன் வருகிறாள் ! அவளை நீ மறக்க எண்ணாதே !

ஹெஸியோன்: (தோட்டத்திலிருந்து வந்து கொண்டே வருத்தமுடன்) நான் உங்கள் இடையே வரவில்லை ! முதலில் நான் தந்தையைக் காப்பாற்ற வேண்டும். தோட்டத்தில் அவருக்கு எதுவும் வந்துவிடக் கூடாது ! சூரியன் அத்தமிக்கப் போது ! அப்பாவுக்கு 88 வயது. குளிர்க் காய்ச்சல் வந்துவிடக் கூடாது !


(தொடரும்)

*******************************

தகவல் :

Based on The Play : Heartbreak House By : George Bernard Shaw (1919)

(A) The Portable Bernard Shaw By : StanleyWeintraub (1977)

(B) Writers & Critics – Shaw By A. M. Gibbs (1969)

(C) The Oxford Dictionary of Quotations (New Edition) (1992)

(D) Heartbreak House By : Elyse Sommer.

(E) Heartbreak House By : Charles Isherwood (October 12, 2006)

(F) Theater Review ‘A Heartening Heartbrek House’ By : Bill Marx (Aug 24, 2009)

(g) BBC DVD Video Classics – Bernard Shaw’s Heartbreak House (1977) (2 Hours)

********************
S. Jayabarathan [jayabarat@tnt21.com] (September 22, 2010)

Series Navigation

சி. ஜெயபாரதன், கனடா