• Home »
  • »
  • நெஞ்சை முறிக்கும் இல்லம் (Heartbreak House) மூவங்க நாடகம் அங்கம் -1 காட்சி -9

நெஞ்சை முறிக்கும் இல்லம் (Heartbreak House) மூவங்க நாடகம் அங்கம் -1 காட்சி -9

This entry is part of 33 in the series 20100822_Issue

ஆங்கில மூலம் : ஜார்ஜ் பெர்னாட் ஷா (1856–1950) தமிழாக்கத் தழுவல் : சி. ஜெயபாரதன், கனடா


“மதங்களின் மகிமையை உலகுக்கு வழங்குவது கதை அளப்போர் கையிலும், வெளித் தோற்ற ஒப்பனைவாதிகள் (Image Makers) திறத்திலும் உள்ளது. பெரும்பான்மையோருக்கு அவரது கூறும் புனைகதைகள் இல்லாமல் மதத்தின் மெய்ப்பாடுகள் அறிவோடு இருப்பதும் இல்லை, ஆழ்ந்து புலப்படுவதும் இல்லை. மதத் தூதுவர் முன்னறிவிப்பும், குருமாரின் உபதேசங்களும் அவரின்றி வீணாய்ப் போகின்றன !”

ஜார்ஜ் பெர்னாட் ஷா (Back to Methusaleh Preface 1921)

“இப்போது நாமெல்லாம் அறிவோம் : உடலே ஆத்மா ! ஆத்மாவே உடல் ! ஆனால் அவர் சொல்கிறார் அவை வேறானவை என்று. நம்மை உடலுக்கு அடிமை ஆக்க நாம் அவரை அனுமதித்து விட்டால், நமது ஆத்மாக்களை நாமே வைத்துக் கொள்ளலாம் என்று அவர் நம்மைக் கட்டாயப் படுத்துவார்.”

ஜார்ஜ் பெர்னாட் ஷா (Ellie, The Heartbreak House Act 2)

++++++++++++++++

நாடக ஆசிரியர் பெர்னாட் ஷாவைப் பற்றி:

ஜியார்ஜ் பெர்னாட் ஷா அயர்லாந்தின் தலைநகர் டப்ளினில் 1856 ஆம் ஆண்டில் ஜியார்க் கார் ஷா & லுஸிண்டா எலிஸபெத் ஷா இருவருக்கும் பிறந்தவர். அவரது அன்னை ஆப்ரா (Opera) இசையரங்குப் பாடகி, வாய்க்குரல் பயிற்சியாளி. தந்தையார் தோல்வியுற்ற வணிகத்துறையாளர். வறுமையி லிருந்து குடும்பத்தை விடுவிக்க முடியாத பெருங் குடிகாரர். இருபது வயதில் பெர்னாட் ஷா அன்னையுடன் லண்டனுக்குச் சென்றார். அங்கே தாயார் இசைத்தொழில் மூலம் ஊதியம் பெற்றுக் குடும்பத்தை நடத்திக் கொண்டு வந்தார். நிரம்ப இலக்கிய நூற் படைப்புகளைப் படித்து வந்த பெர்னாட் ஷா, முதலில் ஐந்து தோல்வி நாடகங்களை எழுதினார். பிறகு நாடக மேடை உலகில் புகுந்து மற்றவர் நாடகங்களைக் கண்டு 1894 இல் “சனிக்கிழமை கருத்திதழில்” (Saturday Review) நாடகங்களைப் பற்றித் திறனாய்வு செய்து எழுதி வந்தார். அப்போது பொதுவுடைமைக் கோட்பாடில் ஈடுபாடு மிகுந்து பிரதம மேடைப் பேச்சாளாராகவும் உரைமொழி ஆற்றினார்.

அவர் எழுதிய சிறப்பான நாடகங்கள்: பிக்மாலியன் (Pygmalion), ஜோன் ஆ•ப் ஆர்க் (Saint Joan), மனிதன் & உன்னத மனிதன் (Man & Superman), ஆப்பிள் வண்டி (The Apple Cart), டாக்டரின் தடுமாற்றம் (The Doctor’s Dilemma), மெதுசேலாவுக்கு மீட்சி (Back to Methuselah), மேஜர் பார்பரா (Major Barbara), கோடீஸ்வரி (Millionairess), ஆனந்த நாடகங்கள் (Plays Pleasant), தூயவருக்கு மூன்று நாடகங்கள் (Three Plays for Puritans), இதயத்தை முறிக்கும் இல்லம் (Heartbreak House), ஆயுத மனிதன் (ஊழ் விதி மனிதன்) (The Man of Destiny) (1898) போன்றவை. ஐம்பது ஆங்கில நாடகங்கள் எழுதிய பெர்னாட் ஷாவுக்கு 1925 இல் இலக்கிய நோபெல் பரிசு அளிக்கப்பட்டது.

+++++++++++++++++++++

இந்த நாடகத்தைப் பற்றி :

ஜார்ஜ் பெர்னாட் ஷாவின் இந்த மோக இன்பியல் நாடகம் (Lusty Comedy) இங்கிலாந்து தேசத்தின் தென் கோடியில் உள்ள ஸஸ்ஸெக்ஸ் குன்றுக் கடல் பகுதியில் (Sussex Area) நிகழ்வதாக எழுதப் பட்டுள்ளது. அங்கே காப்டன் ஷோடோவர் (Captain Shotover) தன்னிரு புதல்வி யருக்கும் மற்றும் சம்பிரதாயம் பேணாத அவரது நண்பருக்கும் தன் இல்லத்தில் (Nautical Sussex Home) விருந்து வைக்கிறார். வாலிப மாது ஒருத்தி விரும்பி மணந்து கொள்வது செல்வத்துக்கா அல்லது காதலுக்கா என்பதுதான் நாடகத்தின் முக்கியக் கேள்வி ! காப்டனின் இல்லம் வாலிப இதயத்தை முறிக்கும் வாழ்வு மர்மங்கள் நிரம்பி மரணச் சாபத்தில் கட்டப் பட்டது ! அந்தக் கொந்தளிப்பு நிலையைக் காட்ட பெர்னாட் ஷா பிரிட்டீஷ் நாட்டுப்புற வீட்டை (Country Home) ஒரு கப்பலாக உருவகப் படுத்திக் கொள்கிறார். அவரது இல்லக் கப்பல் வக்கிரக் காதலர் (Loopy Lovers), போலிப் போதகர் (False Prophets), முதுமையுற்ற தீர்க்க தரிசிகள் (Aging Visionaries), வாலிப ரோமியோக்கள் (Aging Romeos), கவைக்குதவா பூரணவாதிகள் (Ineffectual Idealists), வஞ்சகச் செல்வந்தர் (Mangy Capitalists) பலர் கூடுகின்ற ஒரு விலங்குக் காட்சி சாலை (Menagerie /Zoo). நாடகக் கதைக் கரு (Plot) முன்னாள் கப்பல் காப்டன் ஷோடோவர், புதல்வியர் ஹேஸியோன், ஏரியட்னி, எழில் மாது மிஸ் எல்லி நால்வரை மையமாகக் கொண்டு விரிந்து உச்சக் கட்டத்தைத் தொடுகிறது.

1917 இல் முதல் உலக மகா யுத்தம் நடந்து கொண்டிருந்த சமயத்தில் ஜார்ஜ் பெர்னாட் ஷா எழுத ஆரம்பித்து 1919 இல் முடித்த நாடகமிது. “நெஞ்சை முறிக்கும் இல்லம்” நாடகம் 1920 ஆண்டில் நியூ யார்க் நகரில் முதன்முதலில் அரங்கேறியது. பெர்னாட் ஷா எழுதிய நாடகங்களிலே இது முற்றிலும் வேறுபாடானது. இந்த நாடகத்தைப் படிக்கும் அல்லது பார்த்துச் சுவைக்கும் வாசகர் பெர்னாட் ஷாவின் நீண்ட பிரச்சாரம் நகைச்சுவை இரண்டையும் ஒருங்கே சம அளவில் அனுபவிப்பர். நாடக ஆசிரியர் வாயிலிருந்து மளமள வென்று கொட்டும் வார்த்தைகளின் நீர்வீழ்ச்சியில் வாசகர் உள்ளம் நனைந்து ஷாவின் உன்னத தீர்க்க தரிசச் சிந்தனைகளோடு பந்தயக் குதிரைபோல் ஓடும். இந்த நாடகம் மிகத் துணிச்சலான ஓர் அழிவுத் தலைப்பை (Subversive Topic) நம் கண்முன் நிறுத்துகிறது. அவை உலகப் போரால் விளையும் தீங்குகள் மட்டுமல்ல ! நமது தன்னிறைவு பெறாத அதிகார ஆற்றலால் (Destruction Power of our Complacency) இல்லத்திலும், சமூகத்திலும் உண்டாக்கப் படும் மிகையான அழிவுக் கோரம் !

நாடகத்தில் வருபவை அனைத்தும் தையலற்ற ஒரு முழுமை அணியாய் ஒருங்கு சேர்கின்றன ! இரண்டரை மணிநேரம் நடக்கும் இந்த நாடகம் குழப்பத்தை உண்டாக்காமல் நகர்ந்து சென்று முடிகிறது. இது காட்டும் நிகழ்ச்சிகள் யாவும் இங்கிலாந்து இல்லம் ஒன்றிலும், கப்பலிலும் நேர்கின்றன. நாடக முக்கியக் கதா பாத்திரம் காப்டன் ஷொடோவர் (Captain Shotover) செழித்த சிந்தனையோடு பேசுகிறார். அரங்க மேடையில் அவர் மனித இனத்தைத் தூக்கி எறிவதை ஒருவர் காணாமலே போய் விடலாம். இந்த நாடகத்தில் பிரிட்டீஷ் மேற்குடிக் கோமகனார் இடையே முதல் உலக யுத்தத்துக்கு முன்னிருந்த மூடத்தனங்கள் காட்டப் பட்டு மக்கள் துயர்க் கொடுமை ஷாவின் கலைத்துவச் செழிப்போடு காட்டப் பட்டுள்ளன.

நெஞ்சை முறிக்கும் இல்லத்தை ஒரு கப்பலாக உருவகம் செய்கிறார் பெர்னாட் ஷா. ஷா இந்த நாடகத்தில் சிரிப்பு வெடி கிளப்பும் வசன வரிகளை இடையிடையே நிரப்பி முடிவில் பெரு வெடிப்பு நிகழ்ச்சியாய்த் தோன்றி உச்சக் கட்டம் வருகிறது. வசன வரிகள் நாடகத்தில் நீண்ட போதிப்பாகத் தெரிந்தாலும் பெர்னாட் ஷாவின் கருத்துக்கள் கேட்கத் தகுந்தவை. சிரிக்க வைப்பவை ! சிந்திக்க வைப்பவை. தற்போதைய நமது சமூகப் பிரச்சனைகளையும் ஆங்காங்கே எதிரொலிப்பவை.

++++++++++++++++++++++

நாடக உறுப்பினர்:

1. காப்டன் ஷொடோவர் (Captain Shotover) : (88 வயது)
(மிஸ். ஹெஸியோன், மிஸ். எரியட்னி இருவரின் தந்தை)

2. மிஸ் எல்லி டன் (Ellie Dunn) : இள வயது மங்கை

3. மிஸ்டர் மாஜினி டன் (Mazzini Dunn) : மிஸ் எல்லியின் தந்தை

4. மிஸிஸ் ஹெஸியோன் குசபி (Hesione Hushabye) காப்டனின் மூத்த புதல்வி (45 வயது)

5. எரியட்னி அட்டர்வுட் (Ariadne Utterwood) : காப்டனின் இளைய புதல்வி

7. ஸர் ஹேஸ்டிங்ஸ் அட்டர்வுட் : (Sir Hastings Utterwood) எரியட்னியின் கணவர்.

6. மிஸ்டர் ஹெக்டர் குசபி (Hector Hushabye) : ஹெஸியோனின் கணவர் (50 வயது)

7. வில்லியம் மங்கன் (Bill Mangan, Business Boss) : செல்வந்தர்.

8. மிஸ்டர் காரத் ஸாக்ஸி (Gareth Saxe) செல்வீகக் கோமகன்

9. ஆல்•பிரெட் மங்கன் (Alfred Mangan) – Mr. Mazzini Dunn’s Employer Boss

10 தாதி கின்னஸ் (Nurse Guinness) : காப்டன் இல்லத்து முதிய பணிமாது. (60 வயது)

11 மிஸ் ஜென்னி ஸ்டர்லின் (Jenny Sterlin) : வேலைக்காரி.

***************************

இடம் : இங்கிலாந்தில் ஸஸ்ஸெக்ஸ் குன்றுக் கடற் பகுதியில் இருக்கும் நாட்டுப்புற இல்லம் (A Country Home in North End of Sussex, UK). பழைய இல்லம் உயர்ந்த பீடக் கப்பல் போல் கட்டப் பட்ட மர வீடு. மின்சார விளக்குகள் காணப்படுகின்றன. வரவேற்பு முன்னறையில் சோ•பாக்கள், நாற்காலிகள் உள்ளன.

நேரம் : மாலை ஆறு மணி, குளிர்ந்த தென்றல் வீசும் செப்டம்பர் மாதம்.

அரங்க அமைப்பு : காப்டன் இல்லத்து முன்னறையில் ஓரிளம் மாது (மிஸ் எல்லி டன்) சோ•பாவில் அமர்ந்திருக்கிறாள். மாலை நேரம். சுவர்க் கடிகாரம் 6 மணி அடிக்கிறது. மிஸ். எல்லி பொறுமை இழந்து எழுந்து நின்று அங்குமிங்கும் பார்த்து வருத்தம் அடைகிறாள். இள மாது அழகு பொங்கி உடல் நளினமோடு காணப் படுகிறாள். முகத்தில் அறிவுச் சுடர் ஒளிர்கிறது. அணிந்துள்ள ஆடை பகட்டாக இன்றி நடுத்தரக் குடும்பப் பெண்ணாகக் காட்டுகிறது. மறுபடியும் சோ•பாவில் அமர்ந்து ஷேக்ஸ்பியர் நாடகம் ஒன்றை எடுத்துப் படிக்கிறாள். அப்போது ஒரு வயதான மாது (Nurse Guinness) தட்டில் மூன்று கிளாஸ் தம்ளரில் மதுபானம் எடுத்துச் செல்கிறாள். அவள் குறுக்கிட்ட போது மிஸ் எல்லியின் நூல் தவறிக் கீழே விழுகிறது. வயதான மாது வாலிப மாதை வியப்போடு முதன்முறை பார்க்கிறாள். விருந்தாளிக்கு வேலைக்காரி டீ கொடுப்பதைக் காப்டன் வெறுக்கிறார். அப்போது திடீரெனப் பல வருடங்களுக்குப் பிறகு வரும் அவரது இரண்டாம் புதல்வியை அவர் வரவேற்காது வெறுப்புடன் புறக்கணிக்கிறார்.. ஹெஸியோன் தாமதமாக வந்து மிஸ். எல்லியை வரவேற்கிறாள். அடுத்து வரும் மிஸ் எல்லியின் தந்தை மாஜினியைக் குறைகூறுகிறாள் ஹெஸியோன். மாஜினியின் எஜமானர் மங்கன் எதிர்பாராமல் நுழைகிறார். அடுத்து ஹெஸியோன் கணவர் வருகிறார்.

+++++++++++++++++++++

அங்கம் -1 காட்சி -9
(மூவங்க நாடகம்)

எல்லி: எனக்கு ஓரளவு தெரியும் மிஸ்டர் மங்கனை ! நான் உரையாடக் கூடிய அளவுக்குப் பழக்கமானவர்.

ஹெஸியோன்: ஆனால் நீ அந்தரங்க உறவு கொள்ளக் கூடிய அளவுக்குத் தெரிந்திட விரும்புகிறாய் அல்லவா ?

எல்லி: (சிரித்துக் கொண்டு) ஆமாம் ! ஆனால் அவரை அந்தரங்க முறையில் சிறிது அறிவேன் !

ஹெஸியோன்: உனக்கு மங்கனை தெரியாது என்று சொல்கிறாய் ! அந்தரங்கமாய் ஓரளவு தெரியும் என்றும் சொல்கிறாய் ! இவற்றில் எது உண்மை ?

எல்லி: நான் சொல்ல வருவது என்ன வெனில் எங்கள் இல்லத்துக்கு மிஸ்டர் மங்கன் வந்ததில்லை. நான் அவரை ஓர் இசைக் கச்சேரியில் சந்தித்தேன்.

ஹெஸியோன்: இசைக் கச்சேரிக் களிப்பில் எப்படி அந்தரங்க நட்பு உண்டானது ? எல்லி !

எல்லி: அப்படி இல்லை ஹெஸியோன் ! ஒப்பனை செய்யும் அறையில் நான் எல்லாருடனும் உரையாடிக் கொண்டிருந்தேன். அவரை நான் ஓர் இசைக் கலைஞராக நினைத்தேன். அவர் எடுப்பாகத் தோன்றினார். ஓர் இசைக் குழுவைச் சேர்ந்தவராகத் தெரிந்தது. தேசீயப் படக் காட்சியில் நான் ஓர் ஓவியத்தைப் பிரதி எடுப்பதாய்ப் பாவனை செய்து கொண்டிருந்தேன். அப்படி வரைந்து விற்பதில் சிறிது ஊதியம் வந்தது எனக்கு ! ஓவியக் கலை எனக்குத் தெரியாது. ஆனால் ஒரே படத்தை விரைவில் வரைந்து பல பிரதிகள் எடுப்பேன். அவற்றை விற்று இரண்டு அல்லது மூன்று பவுண்டு (பிரிட்டன் நாணயம்) சம்பாதித்து விடுவேன். அந்த தேசிய ஓவியப் படக்காட்சிக்கு மிஸ்டர் மங்கன் வந்தார்.

ஹெஸியோன்: ஒருநாள் ஊதியம் மாணவனுக்கு ! அந்த ஓவியக் கலைக் கூட்டத்தில் உன்னை யார் கண்டு கொள்வார் ? மறுநாள் போனால் அங்கே மாணவனுக்கு ஏமாற்றம் ! யாருமில்லை உன்னை வரவேற்க ! அப்படித்தானே !

எல்லி: (பெருமிதமாக) இல்லை ! விருப்பமோடு அவர் என்னை அணுகினார் ! அவர் என்னோடு பேச விரும்பினார் ! அவருக்குப் பெரிய மேதைகளை நன்றாகத் தெரிகிறது. நவயுவ நாகரீகப் பெண்டிர் பலர் அவரை மோகிக்கிறார். அவரை யெல்லாம் தவிர்த்து விட்டு அவர் என்னைக் காண வந்தார், ஓவியக் காட்சி அரங்கிற்கு. முடிந்ததும் தன்னோடு டாக்ஸியில் போக என்னை இழுத்துக் கொண்டு போனார் !

ஹெஸியோன்: எல்லிக் கண்மணி ! காதல் மேகத்தில் நீ மிதந்து செல்கிறாய் ! களிப்பான அனுபவம் ! இனிப்பான சம்பவம் இளம்பெண் உனக்கு ! ஒரு வார்த்தை கூடப் பேசாமல் கிடைக்கும் ஓரினிய பந்தம் !

எல்லி: எனக்கென ஒரு சமூகம் இல்லை ஹெஸியோன் ! இப்படித்தான் நான் மணமகனைப் பற்றிக் கொள்ள வேண்டுமே தவிர வேறு வழியில்லை எனக்கு !

ஹெஸியோன்: (எல்லியைப் பற்றி உட்கார வைத்து) சுவையாக உள்ளது உன் சரிதை ! மங்கனைப் பற்றி இப்போது சொல், எல்லாவற்றையும் சொல் ! நீ அவரை நேசிக்கிறாயா ?

எல்லி: நான் மூடத்தனமாய் நேசிப்பதில்லை ! என்ன நினைக்கிறாய் நீ ? அப்படி நான் திடீரெனக் காதலில் விழமாட்டேன். நான் ஒன்றும் சின்னத்தனமாய் நடப்பதில்லை !

ஹெஸியோன்: ஓ அப்படியா ? நினைப்பதற்கு இனிப்பாய் நேசத்தில் இருக்கவா ? வாழ்வுக்கு சிறிதளவு இன்சுவை சேர்க்க விழைகிறாய் இல்லையா ?

எல்லி: அப்படியே வைத்துக் கொள் ஹெஸியோன் !

ஹெஸியோன்: (சிரித்துக் கொண்டு) இனிய காதல் கனவுகளில் நேரம் போவதே தெரிய வில்லை அல்லவா ? இரவில் தூங்காமல் வெகு நேரம் விழித்திருக்கிறாயா ? கெட்ட இரவுகள் என்பவை இப்போது இல்லை அல்லவா ? காலை எழுவதில் உனக்குக் களிப்பு பொங்குது இல்லையா ? இனிய கனவுகளை நினைத்துப் பார்க்க உள்ளது பகற் பொழுது ! வாழ்க்கையே நிறம் மாறிப் போகிறது அல்லவா ? புத்தகக் காதலை விட நித்திய நேசம் சுவைக்கிறது அல்லவா ? தனிமை நீங்கி ஒருவரோடு உறவாடும் நிலை ! தனிமையில் இருந்து இனிமை காணும் கனவு வாழ்வு !

எல்லி: (பூரிப்பு அடைந்து) ஹெஸியோன் ! நீ ஒரு மந்திரக்காரி ! எப்படி நீ அழகாகப் பேசுகிறாய் ! உன்னைப் போலோர் அனுதாபி உலகில் வேறு யாரும் இருக்க முடியாது !

ஹெஸியோன்: (அவள் தலையைக் கோதி) உன்மேல் பொறாமை உண்டாகுது எனக்கு. அதே சமயத்தில் உன் மீது பரிதாபமும் எழுகிறது.

(அப்போது நல்ல தோற்றமுள்ள 50 வயது மனிதர் உள்ளே வருகிறார். தலையில் தொப்பி, முகத்தில் மீசை, கையில் கைத்தடியுடன் காணப் படுகிறார். ஷோபவில் அமர்ந்துள்ள எல்லி அவரை வரவேற்க எழுந்து செல்கிறாள்)

எல்லி: (விரைவாய்ச் சென்று) ஹெஸியோன் ! இவர்தான் மிஸ்டர் மார்கஸ் டார்ன்லி !

ஹெஸியோன்: (சிரித்துக் கொண்டு) எல்லி கண்மணி ! இவர்தான் என் கணவர் !

எல்லி: (ஏமாற்றமாய்த் திரும்பி) என்ன ? உன் கணவரா இவர் ? நம்ப முடிய வில்லையே ! என்னை ஏமாற்றிய இந்த மனிதர் உன் கணவரா ?

(தொடரும்)

*******************************

தகவல் :

Based on The Play : Heartbreak House By : George Bernard Shaw (1919)

(A) The Portable Bernard Shaw By : StanleyWeintraub (1977)

(B) Writers & Critics – Shaw By A. M. Gibbs (1969)

(C) The Oxford Dictionary of Quotations (New Edition) (1992)

(D) Heartbreak House By : Elyse Sommer.

(E) Heartbreak House By : Charles Isherwood (October 12, 2006)

(F) Theater Review ‘A Heartening Heartbrek House’ By : Bill Marx (Aug 24, 2009)

(g) BBC DVD Video Classics – Bernard Shaw’s Heartbreak House (1977) (2 Hours)

********************
S. Jayabarathan [jayabarat@tnt21.com] (August 18, 2010)

Series Navigation

சி. ஜெயபாரதன், கனடா